ຂປລ. ພິທີມອບ-ຮັບລົດຖີບ 1.000 ຄັນ ທີ່ໄດ້ຮັບການສະໜັບສະໜູນຈາກ ໂຄງການນໍ້າໃຈຮັກລາວ ຂອງມູນນິທິເພື່ອພັດທະນາຊົນນະບົດ ຂອງຈີນ ຈັດຂຶ້ນໃນວັນທີ 25 ທັນວາ 2024 ທີ່ສະພາແຫ່ງຊາດລາວ ໂດຍໃຫ້ກຽດເຂົ້າຮ່ວມຂອງທ່ານ ສົມມາດ ພົນເສນາ ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີຂອງລາວ.

ຈຳນວນລົດຖີບດັ່ງກ່າວ ໄດ້ຂົນສົ່ງຈາກນະຄອນໜານໜິງ ເຂດປົກຄອງຕົນເອງຊົນເຜົ່າຈ້ວງກວາງຊີ ສປ ຈີນ ມາຮອດນະຄອນຫລວງວຽງຈັນ ສປປ ລາວ ດ້ວຍລົດໄຟລາວ-ຈີນ ໃນວັນທີ 24 ທີ່ຜ່ານມາ ເພື່ອນຳໄປມອບໃຫ້ນ້ອງນັກຮຽນທີ່ດ້ອຍໂອກາດ ຢູ່ເຂດຊົນນະບົດຂອງ ສປປ ລາວ.

ໂອກາດນີ້, ທ່ານ ສົມມາດ ພົນເສນາ ໄດ້ຕີລາຄາສູງຕໍ່ການຮ່ວມມື ລະຫວ່າງຄະນະສັນຕິພາບ ແລະ ສາມັກຄີລາວ ກັບມູນນິທິເພື່ອພັດທະນາຊົນນະບົດຂອງຈີນວ່າ: ເປັນການປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ຄູ່ຮ່ວມຊະຕາກຳລາວ-ຈີນຮອບດ້ານ ລະຫວ່າງສອງພັກສອງລັດ ແລະ ປະຊາຊົນສອງຊາດລາວຈີນ. ພ້ອມທັງກ່າວສະແດງຄວາມຂອບໃຈຢ່າງຍິ່ງ ມາຍັງພັກ-ລັດຖະບານ ແລະ ປະຊາຊົນຈີນ ໂດຍສະເພາະ ກອງທຶນມູນນິທິ ເພື່ອພັດທະນາຊົນນະບົດ ຂອງຈີນ ກໍຄື ບໍລິສັດ ທາງລົດໄຟລາວ-ຈີນ ຈຳກັດ ແລະ ພາກສ່ວນຕ່າງໆທີ່ກ່ຽວຂ້ອງ ທີ່ໄດ້ໃຫ້ການສະໜັບສະໜູນຕະຫລອດມາ. ຫວັງວ່າໃນອະນາຄົດ ຈະສືບຕໍ່ລົງເລິກການຮ່ວມມື ແລະ ແລກປ່ຽນຖອດຖອນບົດຮຽນນຳ ສປ ຈີນ ໂດຍສະເພາະ ດ້ານການພັດທະນາການສຶກສາ ຢູ່ເຂດຊົນນະບົດ ແລະ ການແກ້ໄຂບັນຫາຄວາມທຸກຍາກ.

ປັດຈຸບັນ ລົດຖີບທັງໝົດຈາກໂຄງການນໍ້າໃຈຮັກລາວ ພວມທະຍ່ອຍຂົນສົ່ງ ໄປບັນດາແຂວງຕ່າງໆຂອງ ສປປ ລາວ ເພື່ອນໍາໄປມອບໃຫ້ ນ້ອງນັກຮຽນທີ່ດ້ອຍໂອກາດ ຢູ່ເຂດຊົນນະບົດ ແລະ ຫ່າງໄກສອກຫລີກເພື່ອກຳລັງໃຈ ແລະ ເປັນພາຫານະອຳນວຍຄວາມສະດວກ ໃນການໄປໂຮງຮຽນຂອງນ້ອງໆນັກຮຽນ. ສະເພາະແຂວງທາງພາກເໜືອ ແມ່ນຈະຂົນສົ່ງຜ່ານທາງລົດໄຟລາວ-ຈີນ ໂດຍໃສ່ຕູ້ຄອນເທັນເນີ ເພື່ອຮັບປະກັນໃຫ້ລົດຖີບທຸກຄັນ ຈະບໍ່ໄດ້ຮັບຄວາມເສຍຫາຍ ແລະ ໄປຮອດມືຂອງນ້ອງໆນັກຮຽນຢ່າງສະຫວັດດີພາບ.

ໃນອະນາຄົດ ບໍລິສັດທາງລົດໄຟລາວ-ຈີນ ຈໍາກັດ ຈະສືບຕໍ່ຮ່ວມມືກັບບັນດາກັບອົງການຕ່າງໆ ເພື່ອສົ່ງເສີມການພັດທະນາໃນຊົນນະບົດ ໂດຍສະເພາະດ້ານການສຶກສາ ແລະ ການສ້າງໂອກາດໃຫ້ຊາວໜຸ່ມລາວ ຕາມແລວເສັ້ນທາງລົດໄຟລາວ-ຈີນ ໃຫ້ມີວຽກເຮັດງານທຳ ໂດຍທີ່ຜ່ານມາທາງລົດໄຟລາວ-ຈີນ ໃນເວລາຮັບພະນັກງານ ເຂົ້າເຮັດວຽກຢູ່ທາງລົດໄຟ ພາຍໃຕ້ເງື່ອນໄຂອັນດຽວກັນ ຈະໃຫ້ບຸລິມະສິດພິເສດ ສຳລັບລູກຫລານຜູ້ຖືກໂຄງການ ທາງລົດໄຟ ແລະ ຜູ້ທີ່ອາໄສຢູ່ຊົນນະບົດ ຕາມແລວທາງລົດໄຟລາວ-ຈີນ.

KPL