ທາງລົດໄຟຈີນ-ລາວ ກະກຽມການຂົນສົ່ງຜູ້ໂດຍສານໃນໄລຍະບຸນກຸດຈີນ
ຂປລ.ວິທະຍຸ ສາກົນ ແຫ່ງ ສປ ຈີນ, ວັນທີ 26 ທັນວານີ້, ລົດໄຟພິເສດ ກວດກາ ບົວລະບັດ ທາງລົດໄຟ ຂະບວນໜຶ່ງ ໄດ້ອອກເດີນທາງ ຈາກສະຖານີ ບໍ່ເຕນ ຂອງທາງລົດໄຟຈີນ-ລາວ ຂຶ້ນເໜືອໄປສູ່ ນະຄອນຄຸນມີງ ຂອງ ສປ ຈີນ, ຊຶ່ງເປັນຂີດໝາຍ ສະແດງໃຫ້ເຫັນວ່າ: ວຽກງານ ກວດກາ ບົວລະບັດ ທາງລົດໄຟຈີນ-ລາວ ໝົດຕອນ ຢ່າງຂະໜາດໃຫຍ່ ເປັນຄັ້ງທໍາອິດ ທີ່ດຳເນີນມາ ເປັນເວລາ 4 ເດືອນ ໄດ້ສິ້ນສຸດລົງ ຢ່າງຈົບງາມ, ຊຶ່ງເປັນການຮັບປະກັນ ອັນໜັກແໜ້ນ ໃຫ້ແກ່ ວຽກງານຂົນສົ່ງ ຜູ້ໂດຍສານ ໃນໄລຍະບຸນກຸດຈີນ 2025 ທີ່ໃກ້ຈະໝູນວຽນ ມາເຖິງ.ພາກສ່ວນ ທາງລົດໄຟ ລະຫວ່າງ ສປ ຈີນ- ສປປ ລາວ ໄດ້ຮ່ວມມື ຢ່າງໃກ້ຊິດ ນັບແຕ່ ເດືອນກັນຍາປີນີ້ ເປັນຕົ້ນມາ ໂດຍໄດ້ຮ່ວມກັນ ວາງແຜນ ດຳເນີນ ງານກວດກາ ບົວລະບັດ ທີ່ລະອຽດເຖິງຖອງ. ຝ່າຍຈີນ ໄດ້ສະໜອງ ກົນຈັກ ບົວລະບັດ ຂະໜາດໃຫຍ່ 5 ຄັນ ແລະ ສົ່ງນັກວິຊາການ 200 ກວ່າຄົນ, ສ່ວນຝ່າຍ ສປປ ລາວ ໄດ້ສົ່ງນັກວິຊາການ 60 ກວ່າຄົນ ແລະ ກົນຈັກ ບົວລະບັດ ຂະໜາດໃຫຍ່ 2 ຄັນ. ພະນັກງານ ທາງລົດໄຟ ສອງປະເທດ ໄດ້ກວດກາ ບົວລະບັດ ຢ່າງຂະໜາດໃຫຍ່ ຕໍ່ທາງໃຫຍ່ ແລະ ທາງແຍກ ທັງໝົດ ຂອງທາງລົດໄຟຈີນ-ລາວ, ເພື່ອຮັບປະກັນ ໃຫ້ທາງລົດໄຟຈີນ-ລາວ ໝູນເດີນທາງ ຢ່າງປອດໄພ ແລະ ສະດວກສະບາຍ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ