ການລ້ຽງສັດ ພາໃຫ້ຊີວິດດີຂຶ້ນເປັນກ້າວໆ
*ການປູກຝັງ - ລ້ຽງສັດ ຖືເປັນອາຊີບທີ່ມີຄວາມສໍາຄັນ ແລະ ຈໍາເປັນຕ່ໍຊິວິດການເປັນຢູ່ຂອງປະຊາຊົນລາວບັນດາເຜົ່າ ເນື່ອງຈາກວ່າ ອາຊີບນີ້ນອກຈາກຈະຂາຍເປັນສິນຄ້າສ້າງລາຍຮັເຂົ້າຄອບຄົວແລ້ວ ຍັງເປັນຄັງສະບຽງອາຫາພາຍໃນຄອບຄົວອີກດ້ວຍ. ສະນັ້ນ, ອົງການອາຫານໂລກກໍເປັນໜຶ່ງໃນຫລາຍອົງການ ທີ່ໃຫ້ການສະໜັບສະໜູນປະຊາຊົນລ້ຽງໄກ່ພັນໄຂ່ ເພື່ອຄໍ້າປະກັນສະບຽງອາຫານໃຫ້ແກ່ຄອບຄົວ ສ້າງເສດຖະກິດຄອບຄົວ ແລະ ປະກອບສ່ວນເຂົ້າໃນກິດຈະກຳອາຫານທ່ຽງໃນໂຮງຮຽນ.
ນາງ ສຸກສາຄອນ ແມງມະນີຄູ ສອນຢູ່ປະຖົມບ້ານນາຊຽງດີ ເມືອງຮຸນ ແຂວງອຸດົມໄຊ ໜຶ່ງໃນຄອບຄົວທີ່ໄດ້ຮັບໂຄງການຊ່ວຍເຫລືອ ຈາກອົງການອາຫານໂລກໃຫ້ສຳພາດເມື່ອບໍ່ດົນມານີ້ວ່າ: ຕົນເອງ ແລະ ສາມີເປັນຄູສອນຢູ່ໂຮງຮຽນປະຖົມບ້ານນາຊຽງດີໄລຍະຜ່ານ ມາພາຍໃນບ້ານນາຊຽງດີອົງການອາຫານໂລກໄດ້ໃຫ້ການສະໜັບສະໜູນປະຊາຊົນປູກຝັງ- ລ້ຽງສັດ ຕົນເອງເລີຍເລືອກການລ້ຽງໄກພັນໄຂ່ ເນື່ອງຈາກວ່າຄອບຄົວມັກລ້ຽງໄກ່ຢູ່ແລ້ວເພາະລູກເປັນຄົນມັກກິນໄຂ່ ອີກຢ່າງໜຶ່ງເນື້ອທ່ີກໍ່ບໍ່ກວ້າງຫລາຍຈ່ຶງ ຄິດວ່າການລ້ຽງໄກ່ເໝາະສມກວ່າການປູກຜັກ.
ສໍາລັບການລ້ຽງໄກ່ ໂຄງການໄດ້ສະໜອງອຸປະກອນສຳລັບເຮັດຄອກໄກ່, ແມ່ພັນໄກ່ 50 ໂຕ ແລະ ຫົວອາຫານຈຳນວນໜຶ່ງ; ພ້ອມກັນນັ້ນກໍໄດ້ແນະນຳໃຫ້ໃຊ້ສາລີບົດ, ຕົ້ນກ້ວຍບົດປົນອາຫານໄກ່ ເພື່ອຫລຸດຜ່ອນຕົ້ນທຶນໃນການຊື້ຫົວອາຫານໃນຕໍ່ໜ້າ. ມາຮອດປັດຈຸບັນ ໄກ່ເລີ່ມໄຂ່ແລ້ວກໍມີຄວາມອຸ່ນໃຈຂຶ້ນເພາະຊ່ວຍຫລຸດຜ່ອນການຊື້ໄຂ່ ຈາກຕະຫລາດມາປຸງແຕ່ງອາຫານໃຫ້ລູກກິນ ໃນອະນາຄົດອາດຈະສາມາດນຳມາຈຳໜ່າຍໄດ້ຖ້າມີທຶນ ຮອນຕື່ມຈະນຳເອົາໄກ່ພັນໄຂ່ມາລ້ຽງເພີ່ມຂຶ້ນເລື້ອຍໆເພື່ອຄໍ້າປະກັນສະ ບຽງອາຫານ ແລະ ກາຍເປັນສິນຄ້າຂອງຄອບຄົວໃນອະນາຄົດ.
ນາງ ໄຊສະໝອນ ໄຊຍະສິດ ອີກໜຶ່ງຄອບຄົວທີ່ໄດ້ຮັບໂຄງການຊ່ວຍເຫລືອຈາກອົງການອາຫານໂລກ ໃນການລ້ຽງໄກ່ພັນໄຂ່ ໃຫ້ຮູ້ວ່າຕົນເອງໄດ້ຮັບຄວາມຊ່ວຍເຫລືອ ໃນການລ້ຽງໄກ່ຈະສ້າງຜົນດີໃຫ້ແກ່ຄອບຄົວ ເປັນຕົ້ນແມ່ນນຳໄຂ່ມາປຸງແຕ່ງອາຫານເນື່ອງຈາກວ່າຄອບຄົວມີເດັກນ້ອຍ ອາຫານທີ່ມັກກິນສ່ວນໃຫຍ່ກໍຈະແມ່ນໄຂ່ ຖ້າອາໄສແຕ່ຊື້ຈາກຕະຫລາດກໍບ່ໍພຽງພໍ. ດັ່ງນັ້ນ, ເມື່ອລ້ຽງເອງຈະສາມາດສະໜອງໄດ້ພຽງພໍ ໃນຕໍ່ໜ້າອາດກາຍເປັນສິນຄ້າກໍເປັນໄດ້, ໃນເບື້ອງຕົ້ນໂຄງການອາຫານໂລກໄດ້ຊື້ແມ່ພັນໄກ່ໃຫ້ 50 ໂຕ ຫົວອາຫານ ພ້ອມດ້ວຍອຸປະກອນສຳລັບເຮັດຄອກໄກ່ຈຳນວນໜຶ່ງ ໄລຍະນີ້ຍັງຢູ່ໃນທົດລອງລ້ຽງຢູ່ຖ້າໄດ້ຮັບຜົນດີກໍຈະຂະຫຍາຍໃຫ້ຫລາຍຂຶ້ນຕື່ມ ປັດຈຸບັນເລີ່ມໄດ້ເກັນໄຂ່ແລ້ວ. ພາຍຫລັງໄກ່ໄຂ່ແລ້ວກໍຈະໄດ້ນຳເອົາໄຂ່ໄປປະກອບສ່ວນເຂ້ົາໃນໂຄງການອາຫານທ່ຽງໃນໂຮງຮຽນ 30 ເປີເຊັນ ທີ່ໂຄງການກຳນົດໄວ້ ການປະກອບສ່ວນເຂົ້າໃນໂຄງການອາຫານທ່ຽງໃນໂຮງຮຽນແມ່ນມີຄວາມພູມໃຈຫລາຍ ເມື່ອເຫັນລູກຫລາຍໄດ້ກິນອາຫານອີ່ມ ການປຸງແຕ່ງຖືກຫລັກອະນາໄມ ກິນອາຫານທີ່ມີປະໂຫຍດ ເຊິ່ງເຮັດໃຫ້ລູກຫລານມີສຸຂະພາບແຂງແຮງ, ມີເວລາຮຽນບໍ່ກັບມາກິນເຂົ້າຢູ່ເຮືອນ ຫລຸດຜ່ອນພາລະຂອງພໍ່ແມ່ໃນການແຕ່ງອາຫານທ່ຽງໃຫ້ລູກກິນໃນແຕ່ລະວັນ.
ໂດຍ: ມາລີດາໂດຍ: ມາລີດາ