ຜູ້ບັນຊາການທະຫານສູງສຸດອາຊຽນ ຫາລື ແລະ ຕົກລົງ ຫລາຍບັນຫາສຳຄັນ
ຂປລ. ກອງປະຊຸມຜູ້ບັນຊາການທະຫານສູງສຸດອາຊຽນ ຄັ້ງທີ 21 ທີ່ຈັດຂຶ້ນໃນລະຫວ່າງວັນທີ 4-7 ກັນຍາ 2024 ຢູ່ນະຄອນຫລວງວຽງຈັນ ສປປ ລາວ, ໄດ້ປິດລົງດ້ວຍຜົນສຳເລັດຢ່າງຈົບງາມ ພາຍໃຕ້ຄໍາຂວັນ “ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງອາຊຽນ” ໂດຍມີຜູ້ບັນຊາການທະຫານສູງສຸດ 10 ປະເທດອາຊຽນ ພ້ອມຄະນະຜູ້ແທນ ແລະ ຕີມໍແລັດສະເຕ ໃນນາມເປັນປະເທດສັງເກດການ ເຂົ້າຮ່ວມ.
ໂອກາດດັ່ງກ່າວ, ທ່ານ ພົນໂທ ຄຳລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະ ເທດ, ຫົວໜ້າກົມໃຫຍ່ເສນາທິການກອງທັບປະຊາຊົນລາວ ໃນນາມປະທານກອງປະຊຸມ ຜູ້ບັນຊາການທະຫານສູງສຸດອາຊຽນ ຄັ້ງທີ 21 ໄດ້ຖະແຫລງຂ່າວຜົນສໍາເລັດ ຂອງກອງປະຊຸມດັ່ງກ່າວ ວ່າ: ໃນກອງປະຊຸມຄັ້ງນີ້, ໄດ້ຮັບຟັງການລາຍງານ ກ່ຽວກັບຜົນສໍາເລັດຂອງກອງປະຊຸມ ຫົວໜ້າສືບຂ່າວທະຫານອາຊຽນ ຄັ້ງທີ 21 ແລະ ກອງປະຊຸມຫົວໜ້າສູ້ຮົບອາຊຽນ ຄັ້ງທີ 14. ພ້ອມນັ້ນ, ບັນດາຜູ້ບັນຊາການທະຫານສູງສຸດ ກອງທັບປະເທດອາຊຽນ ຍັງໄດ້ພ້ອມກັນແລກປ່ຽນກ່ຽວກັບ ສະພາບທີ່ພົ້ນເດັ່ນໃນພາກພື້ນ ແລະ ປຶກສາຫາລື ກ່ຽວກັບການຮ່ວມມືວຽກງານປ້ອງກັນຊາດ ເພື່ອເສີມສ້າງຂີດຄວາມສາມາດ, ຄວາມເຊື່ອໝັ້ນ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ລະຫວ່າງກອງທັບ ຂອງບັນດາປະເທດສະມາຊິກອາຊຽນ ໃນການຮັບມືກັບສິ່ງທ້າທາຍ ຕໍ່ຄວາມໝັ້ນຄົງ ໃນປັດຈຸບັນ ແລະ ໃນອະນາຄົດ, ທັງເປັນການປະກອບສ່ວນເຂົ້າໃນການຮັກສາສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງພາກພື້ນ.
ພ້ອມນີ້, ກອງປະຊຸມ ຍັງໄດ້ຮັບຮອງເອົາແຜນການ 2 ປີຂອງທະຫານອາຊຽນ 2024-2026, ເຊິ່ງລວມມີບັນດາກອງປະຊຸມ ແລະ ກິດຈະກໍາຕ່າງໆ ພາຍໃຕ້ແຜນງານຂອງກອງປະຊຸມ ລັດຖະມົນຕີປ້ອງກັນປະເທດອາຊຽນ, ອາຊຽນ-ບວກ, ກອງປະຊຸມຜູ້ບັນຊາການທະຫານສູງສຸດອາຊຽນ ແລະ ອື່ນໆ. ນອກນັ້ນ, ຍັງໄດ້ພິຈາລະນາ, ຮັບຮອງ ແລະ ລົງນາມຖະແຫລງການຮ່ວມ ກອງປະຊຸມ ຜູ້ບັນຊາການທະຫານສູງສຸດອາຊຽນ ຄັ້ງທີ 21 ເຊິ່ງເປັນພື້ນຖານສໍາຄັນ ໃຫ້ແກ່ການສືບຕໍ່ຈັດຕັ້ງປະຕິບັດ ທິດທາງການຮ່ວມມືຂອງທະຫານອາຊຽນ. ພ້ອມນີ້, ກອງທັບປະຊາຊົນລາວ ຍັງໄດ້ມອບໂອນການເປັນປະ ທານ ກອງປະຊຸມຜູ້ບັນຊາການທະຫານ ສູງສຸດອາຊຽນ ຄັ້ງທີ 22, ກອງປະຊຸມຫົວໜ້າສືບຂ່າວທະຫານອາຊຽນຄັ້ງທີ 22 ແລະ ກອງປະຊຸມຫົວໜ້າສູ້ຮົບອາຊຽນຄັ້ງທີ 15 ໃຫ້ແກ່ມາເລເຊຍ ສືບຕໍ່ເປັນປະທານກອງປະຊຸມ ໃນປີ 2025.
ໂອກາດນີ້, ທ່ານ ພົນໂທ ຄຳລຽງ ອຸທະໄກສອນ ຍັງໄດ້ຕາງໜ້າໃຫ້ນາຍ ແລະ ພົນທະຫານ ຂອງກອງທັບປະຊາຊົນລາວ, ສະແດງຄວາມຂອບໃຈ ມາຍັງກອງທັບບັນດາປະເທດ ສະມາຊິກອາຊຽນ ແລະ ຕີມໍແລັດສະເຕ ທີ່ໄດ້ໃຫ້ການສະໜັບສະໜູນ, ຊ່ວຍເຫລືອ ແລະ ປະກອບສ່ວນຢ່າງຕັ້ງໜ້າ ເຂົ້າໃນກອງປະຊຸມຄັ້ງນີ້, ພ້ອມທັງສະແດງຄວາມຂອບໃຈ ແລະ ຊົມເຊີຍ ມາຍັງກອງເລຂາອາຊຽນ ຂອງກະ ຊວງປ້ອງກັນປະເທດ, ບັນດາອານຸກໍາມະການ ແລະ ທຸກພາກສ່ວນທີ່ກ່ຽວຂ້ອງ ທີ່ໄດ້ປະກອບສ່ວນເຂົ້າໃນການຫ້າງຫາກະກຽມ ແລະ ຈັດຕັ້ງກອງປະຊຸມຄັ້ງນີ້ ດ້ວຍຜົນສໍາເລັດ ອັນຈົບງາມ.