ຄື້ນຄວາມຮ້ອນຢູ່ຝຣັ່ງ ເຮັດໃຫ້ມີ ຜູ້ເສຍຊີວິດສູງເຖິງ 1.243 ຄົນ
ຂປລ.ວິທະຍຸ ໂທລະພາບ ສູນກາງຈີນ, ວັນທີ 19 ສິງຫານີ້, ກະຊວງສາທາລະນະສຸກຝຣັ່ງ ຢືນຢັນວ່າ: ໃນໄລຍະເກີດຄື້ນຄວາມຮ້ອນຢູ່ຝຣັ່ງ ລະຫວ່າງ ວັນທີ 3-22ກໍລະກົດປີນີ້, ທົ່ວປະເທດ ຝຣັ່ງ ມີຜູ້ເສຍຊີວິດ ເກີນປົກກະຕິ ສູງເຖິງ 1.243 ຄົນ. ກ່ອນໜ້ານີ້, ອີງຕາມຂໍ້ມູນສະຖິຕິ ຈາກກະຊວງສາທາລະນະສຸກຝຣັ່ງ ສະແດງໃຫ້ເຫັນວ່າ: ໃນໄລຍະເກີດຄື້ນຄວາມຮ້ອນ ລະຫວ່າງ ວັນທີ 17ມິຖຸນາ ຫາວັນທີ 2 ກໍລະກົດປີນີ້ ຝຣັ່ງ ໄດ້ມີຜູ້ເສຍຊີວິດ ເກີນປົກກະຕິ5.764ຄົນ, ເພີ່ມຂຶ້ນ 36,2%ເມື່ອທຽບໃສ່ ລະດັບຄາດຄະເນໄວ້ ຕາມປົກກະຕິ, ເຊິ່ງເປັນຈຳນວນຜູ້ເສຍຊີວິດ ເກີນປົກກະຕິ ຫລາຍທີ່ສຸດ ນັບແຕ່ມີການບັນທຶກ ໄລຍະຄື້ນຄວາມຮ້ອນຢູ່ຝຣັ່ງ ໃນປີ2023ເປັນຕົ້ນມາ. ການເສຍຊີວິດ ເກີນປົກກະຕິ ໝາຍເຖິງຄວາມແຕກຕ່າງ ລະຫວ່າງ ຍອດຈຳນວນຜູ້ເສຍຊີວິດ ຕາມຄາດຄະເນໄວ້ ໃນສະຖານທີ່ ແລະ ໄລຍະເວລາສະເພາະໃດໜຶ່ງ ທີ່ກຳນົດກັບຈຳນວນ ຜູ້ເສຍຊີວິດ ທີ່ຄາດຄະເນໄວ້ພາຍໃຕ້ ກໍລະນີທີ່ບໍ່ມີວິກິດດ້ານສຸຂະພາບ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ