ສ.ອາເມລິກາ ຈະປິດສະຖານທູດ-ສະຖານກົງສຸນລວມ 5 ແຫ່ງ ຢູ່ຕ່າງປະເທດ
ຂປລ.ວິທະຍຸ-ໂທລະພາບ ສູນກາງຈີນ, ວັນທີ 3 ສິງຫານີ້, ກະຊວງການຕ່າງປະເທດ ສະຫະລັດ ອາເມລິກາ ໄດ້ແຈ້ງຕໍ່ສະພາ ກ່ຽວກັບແຜນການປິດ ສະຖານທູດແລະ ສະຖານກົງສຸນ 5 ແຫ່ງ ຢູ່ຕ່າງປະເທດ ລວມມີ: ສະຖານທູດ ທີ່ ນະຄອນ ເຊນຈໍຈ ໃນ ເກຣີນາດາ, ສະຖານກົງສຸນ ທີ່ ນະຄອນ ນະໂກຢະ ປະເທດຍີ່ປຸ່ນ, ສະຖານກົງສຸນ ທີ່ ນະຄອນ ເມດານ ປະເທດ ອິນໂດເນເຊຍ, ສຳນັກງານສາຂາ ຂອງສະຖານທູດ ທີ່ ນະຄອນ ດູອາລາ ປະເທດ ກາເມີຣູນ ແລະ ສະຖານກົງສຸນ ທີ່ ນະຄອນ ວີນນີເປັກ ປະເທດ ການາດາ. ແຜນການປິດສະຖານທູດ ແລະ ສະຖານກົງສຸນຄັ້ງນີ້ ແມ່ນສ່ວນໜຶ່ງໃນວາລະການຫລຸດຜ່ອນ ລະບົບການທູດ ແລະ ຊຸກຍູ້ໃຫ້ “ສ.ອາເມລິກາ ຕ້ອງມາກ່ອນ” ຂອງລັດຖະບານ ໂດນັນ ທຣຳ. ກ່ອນໜ້ານີ້ ຫ້ອງການບໍລິຫານ ແລະງົບປະມານຂອງທຳນຽບຂາວ ເຄີຍສະເໜີ ໃຫ້ປິດສະຖານທູດ ແລະ ສະຖານກົງສຸນເຖິງ 30 ແຫ່ງ. ໃນປີກາຍນີ້ ເຖິງວ່າກະຊວງການຕ່າງປະເທດ ສະຫະລັດ ອາເມລິກາ ໄດ້ຫລຸດຜ່ອນກົງຈັກ ແລະ ພະນັກງານ ຢ່າງຫລວງຫລາຍ ກໍ່ຕາມ, ແຕ່ກໍ່ບໍ່ໄດ້ປິດສະຖານທູດ ຫລື ສະຖານກົງສຸນໃດ ໃນຕ່າງປະເທດ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ