ເກຣັກ ຈະກອງປະຊຸມໂລກກ່ຽວກັບວັນນະກຳຄຣາສສິກ ຄັ້ງທີ 2
ຂປລ. ວິທະຍຸ ໂທລະພາບ ສູນກາງຈີນ, ວັນທີ 1 ມິຖຸນານີ້, ສະພາບັນດິດ ວິທະຍາສາດສັງຄົມຈີນ ໄດ້ຈັດກອງປະຊຸມຖະແຫລງຂ່າວ ກ່ຽວກັບ ກອງປະຊຸມວັນນະກຳຄຣາສສິກ ໂລກຄັ້ງທີ 2 ຢູ່ນະຄອນຫລວງປັກກິ່ງ ໂດຍແຈ້ງໃຫ້ຮູ້ວ່າ: ກອງປະຊຸມ ວັນນະກຳຄຣາສສິກໂລກ ຄັ້ງທີ 2 ພາຍໃຕ້ຫົວຂໍ້ “ການສົນທະນາ ລະຫວ່າງ ສະໄໝບູຮານ ແລະ ປັດຈຸບັນ: ການສັ່ງສອນຂອງສະຕິປັນຍາບູຮານ ທີ່ມີຕໍ່ຍຸກປັດຈຸບັນ ຈະຈັດຂຶ້ນຢູ່ນະຄອນຫລວງ ອາແຕນ ຂອງເກຣັກ ລະຫວ່າງວັນທີ 9 ຫາ 10 ມິຖຸນານີ້ ໂດຍຈະເຊື້ອເຊີນ ນັກວິຊາການຄົ້ນຄວ້າ ວັນນະກຳ ຄຣາສສິກຈີນ ແລະ ຕ່າງປະເທດ ລວມທັງຜູ້ຊ່ຽວຊານ ແລະ ນັກວິຊາການໃນຂົງເຂດ ອະລິຍະທຳ, ວັດທະນະທຳ, ບູຮານນະຄະດີ ແລະ ຂົງເຂດອື່ນໆເຂົ້າຮ່ວມ ເພື່ອລົງເລິກສົນທະນາກັນ ກ່ຽວກັບ ຫົວຂໍ້ທີ່ກ່ຽວຂ້ອງກັບ ອະລິຍະທຳ ວັນນະກຳຄຣາສສິກ,ເຊິ່ງຈະເປັນເວທີທີ່ສຳຄັນໃຫ້ແກ່ ນັກຄົ້ນຄວ້າ ອະລິຍະທຳ ວັນນະກຳ ຄຣາສສິກ ທົ່ວຂອງໂລກ ໃນການແລກປ່ຽນ ຄວາມຄິດເຫັນແລະ ເຕົ້າໂຮມຄວາມຮັບຮູ້ ທີ່ເປັນເອກະພາບກັນ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ