ຂປລ. ກອງປະຊຸມເຈົ້າໜ້າທີ່ອາວຸໂສ ຄະນະເຮັດວຽກອາຊຽນ+3 ຄັ້ງທີ 4 ສົກປີ 2024 (4th  ASEAN+3 Task Force Meeting) ໄດ້ຈັດຂຶ້ນໃນວັນທີ 7 ພະຈິກ 2024 ທີ່ນະຄອນຫລວງວຽງຈັນ ພາຍໃຕ້ການເປັນປະທານຮ່ວມຂອງ ທ່ານ ວົງຄໍາແຫງ ວົງທະຈັກ ຫົວໜ້າກົມການເງິນຕ່າງປະເທດ ກະຊວງການເງິນ; ທ່ານ ນາງ ມາລີນີ ຊາວັນນາ ຮັກສາການຫົວໜ້າກົມຮ່ວມມືສາກົນ ທະນາຄານແຫ່ງ ສປປ ລາວ, ທ່ານ ໂຊຮີ ກວັກ ຫົວໜ້າພະແນກຮ່ວມມືການເງິນສາກົນ ກະຊວງເສດຖະກິດ-ການເງິນ ແລະ ທ່ານ ຊູຮຸນ ຢຸນ ຮອງຫົວໜ້າກົມຮ່ວມມືການເງິນ ທະນາຄານກາງ ສ ເກົາຫລີ, ພ້ອມດ້ວຍຄະນະຜູ້ແທນ ກອງປະຊຸມ ຈາກກະຊວງການເງິນ ແລະ ທະນາຄານກາງ ຂອງບັນດາປະເທດສະມາ ຊິກອາຊຽນ+3, ກອງເລຂາອາຊຽນ, ອົງການຕິດຕາມເສດຖະກິດ ມະຫາພາກອາຊຽນ+3 (AMRO) ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.

ໃນໂອກາດນີ້, ທ່ານ ວົງຄໍາແຫງ ວົງທະຈັກ ກໍໄດ້ເນັ້ນເຖິງຄວາມສຳຄັນ ຂອງການຮ່ວມມືໃນພາກພື້ນອາຊຽນ, ພ້ອມທັງຍົກຜົນສຳເລັດຂອງ ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ຈັດຂຶ້ນຢູ່ ສປປ ລາວ ໂດຍວຽກງານການພັດທະນາ ດ້ານການເງິນອາຊຽນ+3 ກໍໄດ້ນໍາເຂົ້າໄປລາຍງານ ໃນກອງປະຊຸມດັ່ງກ່າວ ເຊິ່ງເປັນຂີດໝາຍສຳຄັນ ຕໍ່ກັບວຽກງານການຮ່ວມມື ດ້ານການເງິນອາຊຽນ+3. ສຳລັບການຈັດກອງປະຊຸມເຈົ້າໜ້າທີ່ ອາວຸໂສຄະນະເຮັດວຽກ ຄັ້ງທີ 4 ນີ້, ມີຈຸດປະສົງ ແລະ ເປົ້າໝາຍ ເພື່ອສືບຕໍ່ປຶກສາຫາລື ບັນດາວຽກງານການຮ່ວມມື ດ້ານການເງິນອາຊຽນ+3 ໂດຍຄາດວ່າຈະສາມາດສະຫລຸບ ແລະ ຮັບຮອງຄວາມຄືບໜ້າ ບັນດາໜ້າວຽກຕ່າງໆ ເພື່ອກະກຽມເອົາເຂົ້າລາຍງານ ໃນກອງປະ ຊຸມຮອງລັດຖະມົນຕີ ແລະ ຮອງຜູ້ວ່າການທະນາຄານກາງອາຊຽນ+3 ທີ່ຈະໄດ້ຈັດຂຶ້ນໃນລະຫວ່າງ ວັນທີ 17-18 ທັນວາ 2024 ທີ່ ສ ເກົາຫລີ.

 


ສະນັ້ນ, ກອງປະຄັ້ງທີ 4 ນີ້, ຈຶ່ງເປັນກອງປະຊຸມໜຶ່ງທີ່ສຳຄັນ ແລະ ເປັນກອງປະຊຸມທ້າຍປີ ຂອງການເປັນປະທານຮ່ວມ ລະຫວ່າງ ສປປ ລາວ ແລະ ສ ເກົາຫລີ ໃນການຄົ້ນຄວ້າ ແລະ ຮັບຮອງບັນດາແຜນວຽກ ການຮ່ວມມືດ້ານການເງິນອາຊຽນ+3 ປະຈໍາປີ 2024 ແລະ ສືບຕໍ່ປຶກສາຫາລືບັນຫາຄົງຄ້າງ,
ລວມທັງບັນດາຂໍ້ລິເລີ່ມ ການຮ່ວມມືໃໝ່ໆ ເພື່ອການເພີ່ມທະວີ ສ້າງຄວາມເຂັ້ມແຂງ ໃຫ້ແກ່ວຽກງານການຮ່ວມມື ດ້ານການເງິນອາຊຽນ+3 ເປັນຕົ້ນ ການຄົ້ນຄວ້າກ່ຽວກັບກົນໄກ ການສະໜອງທຶນສໍາລັບພາກພື້ີ້ນ  Regional Financial Arragement: RFA), ທີ່ຈະໄດ້ມີການຄົ້ນຄວ້າກ່ຽວກັບ ໂຄງສ້າງຂອງກອງທຶນ, ການປະກອບທຶນ, ການນໍາໃຊ້ທຶນ ແລະ ອື່ນໆ. ຄຽງຄູ່ກັນນັ້ນ, ກອງປະຊຸມຍັງຈະໄດ້ສືບຕໍ່ ປຶກສາຫາລືການປັບປຸງສັນຍາ CMIM ແລະ ການຮັບຮອງຜົນການທົດລອງການກູ້ຢືມພາຍໃຕ້ສັນຍາ CMIM ຄັ້ງທີ 15; ສ້າງຄວາມເຂັ້ມແຂງໃຫ້ແກ່ອົງການ ຕິດຕາມເສດຖະກິດມະຫາພາກອາ ຊຽນ+3, ໂດຍສະເພາະ ການຮັບຮອງແຜນການ ຈັດຕັ້ງປະຕິບັດໄລຍະກາງ 2025-2027, ການຮັບ ຮອງແຜນການຈັດຕັ້ງປະຕິບັດ ງົບປະມານປະຈໍາປີ 2025, ຄົ້ນຄວ້າ ແລະ ປຶກສາຫາລືບັນດາວຽກງານບໍລິຫານ, ການສ້າງຍຸດທະສາດ, ການປັບປຸງຮ່າງຄູ່ມື ຮັບໃຊ້ໃຫ້ແກ່ວຽກງານ ການຮ່ວມມືດ້ານການເງິນ ອາຊຽນ+3 ແລະ ວຽກປິ່ນອ້ອມຕ່າງໆ ຂອງ AMRO; ການແລກປ່ຽນ ແລະ ປຶກສາຫາລືບັນດາຄວາມຄືບໜ້າ ຂອງວຽກງານ ຂໍ້ລິເລີ່ມການພັດທະນາ ຕະຫລາດພັນທະບັດອາຊີ ເພື່ອຊຸກຍູ້ການອອກພັນທະບັດ ສະກຸນເງິນທ້ອງຖິ່ນ ພາຍໃນພາກພື້ນ. ລວມທັງ, ຂໍ້ລິເລີ່ມ ວຽກງານການສະໜອງທຶນໄພພິ ບັດທາງທຳມະຊາດ ເຊິ່ງເປັນວຽກໜຶ່ງທີ່ສຳຄັນ ທີ່ຄົ້ນຄວ້າກົນໄກ ທາງດ້ານການເງິນ, ຄົ້ນຄວ້າດ້ານນະໂຍ ບາຍ ເພື່ອສະໜັບສະໜູນ ໃຫ້ແກ່ວຽກງານການປ້ອງກັນໄພພິບັດ ທາງທຳມະຊາດຂອງພາກພື້ນ ອາຊຽນ+3. ນອກຈາກກອງປະຊຸມທາງການແລ້ວ, ຍັງມີກອງປະຊຸມສຳມະນາປິ່ນອ້ອມ ຈັດຂຶ້ນໃນໄລຍະດຽວກັນປະກອບມີ ກອງປະຊຸມສໍາມະນາກ່ຽວກັບ ການສະໜອງທຶນ ສໍາລັບວຽກງານ ໄພພິບັດ ທາງທໍາມະຊາດ ແລະ ການແລກປ່ຽນດ້ານວິຊາການ ລະຫວ່າງອາຊຽນ +3 ແລະ IMF.

ກອງປະຊຸມຈະໄດ້ ດຳເນີນເປັນເວລາໜຶ່ງວັນເຄິ່ງ ທີ່ປະເທດສະມາຊິກຈະໄດ້ແລກປ່ຽນ, ຄົ້ນ ຄວ້າ ແລະ ປຶກສາຫາລື ເພື່ອສັງລວມ, ສະຫລຸບວຽກງານ ແລະ ກະກຽມນໍາໄປລາຍງານ ໃນກອງປະຊຸມເຈົ້າຮອງລັດຖະມົນຕີ ແລະ ຮອງຜູ້ວ່າທະນາຄານກາງ ອາຊຽນ+3 ທີ່ຈະຈັດຂຶ້ນໃນລະຫວ່າງວັນທີ 17-18 ພະຈິກ 2024, ຢູ່ ສ ເກົາຫລີ.

KPL