ຂປລ. ກອງປະຊຸມທາບທາມຮ່າງລາຍງານການເມືອງ, ຮ່າງບົດສໍາຫລວດການນໍາພາລວມ ຂອງຄະນະບໍລິຫານງານພັກ ກະຊວງປ້ອງກັນຄວາມສະຫງົບ ແລະ ທາບທາມບຸກຄະລາກອນ ສະໝັກຮັບເລືອກຕັ້ງເຂົ້າໃນ ຄະນະບໍລິຫານງານພັກ ກະຊວງປ້ອງກັນຄວາມສະຫງົບ ສະໄໝທີ 6 ຮອບທີ 2 ຈັດຂຶ້ນໃນວັນທີ 9 ກໍລະກົດ 2025 ພາຍໃຕ້ການເປັນປະທານຂອງ ສະຫາຍ ພົນເອກ ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ເລຂາອົງຄະນະພັກກະຊວງ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນຄວາມສະຫງົບ, ມີສະຫາຍຮອງເລຂາອົງຄະນະພັກກະ ຊວງ, ຄະນະປະຈໍາພັກ, ຄະນະພັກ, ພ້ອມດ້ວຍສະຫາຍຄະນະຜູ້ແທນສົມບູນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ ​ແລະ ຮັບຟັງການຜ່ານຮ່າງລາຍງານການເມືອງ ຂອງຄະນະບໍລິຫານງານພັກ ກະ ຊວງປ້ອງກັນຄວາມສະຫງົບ ສະໄໝທີ 5 ​ແລະ ຮ່າງບົດສໍາຫລວດການນໍາພາລວມ ຂອງຄະນະບໍລິ ຫານງານພັກ ກະຊວງປ້ອງກັນຄວາມສະຫງົບ ສະໄໝທີ 5.

ເນື້ອໃນທັງສອງເອກະສານດັ່ງກ່າວ ໄດ້ຕີລາຄາສູງເຖິງຜົນງານ ການຈັດຕັ້ງປະຕິບັດ ວຽກງານກໍາລັງປ້ອງກັນຄວາມສະຫງົບ ໃນໄລຍະຜ່ານມາ, ພ້ອມທັງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ທີ່ຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ, ສະແດງໃຫ້ເຫັນສາເຫດຕ່າງໆ ແລະ ສະຫລຸບສັງລວມຖອດຖອນເປັນບົດຮຽນ ໃຫ້ແກ່ການນຳພາຂອງຄະນະບໍລິຫານງານພັກ ກະຊວງປ້ອງກັນຄວາມສະຫງົບ ໃນໄລຍະຜ່ານມາ. ພ້ອມນີ້, ກອງປະຊຸມກໍໄດ້ຮັບຟັງການປະກອບຄໍາເຫັນ ຕໍ່ຮ່າງລາຍງານການເມືອງ ແລະ ບົດສໍາຫລວດການນໍາພາ ຢ່າງມີວິໄສທັດທີ່ກວ້າງຂວ້າງ, ເລິກເຊິງ.

ໂອກາດນີ້,  ສະຫາຍ ພົນເອກ ວິໄລ ຫລ້າຄໍາຟອງ ໄດ້ເນັ້ນ​ໃຫ້ຜູ້ແທນກອງປະຊຸມ ຈົ່ງຍົກສູງສະ ຕິຄວາມຮັບຜິດຊອບ ແລະ ຄຳນຶງເຖິງຄວາມສຳຄັນ ຂອງການຕັດສິນໃຈໃນການເລືອກເອົາ ຄະນະບໍລິ ຫານງານພັກ ກະຊວງປ້ອງກັນຄວາມສະຫງົບ ຊຸດໃໝ່ ເຊິ່ງຈະເປັນຜູ້ນຳພາການເຄື່ອນໄຫວວຽກງານ ກໍາລັງປ້ອງກັນຄວາມສະຫງົບ ໃນອີກ 5 ປີຕໍ່ໜ້າ ໂດຍສະເພາະ ຜູ້ທີ່ມີມາດຖານເງື່ອນໄຂ, ຄວາມຮູ້-ຄວາມສາມາດ, ມີວິໄສທັດ, ມີຄວາມເປັນຜູ້ນຳ ແລະ ໃຫ້ປະຕິບັດກົດລະບຽບ, ຂັ້ນຕອນຕ່າງໆ ທີ່ທາງຄະນະຄວບຄຸມ ການປ່ອນບັດແນະນໍາຢ່າງເຂັ້ມງວດ.

ຈາກ​ນັ້ນ, ກອງ​ປະຊຸມ​ຍັງໄດ້ດໍາເນີນການປ່ອນບັດທາບທາມ ເອົາບຸກຄະລາກອນສະໝັກຮັບເລືອກຕັ້ງເຂົ້າໃນ ຄະນະບໍລິຫານງານພັກ ກະຊວງປ້ອງກັນຄວາມສະຫງົບ ສະໄໝທີ 6 ຮອບທີ 2 ຕື່ມອີກ.

ຂ່າວ: ວາລະສານປ້ອງກັນຄວາມສະຫງົບ

KPL