ຂປລ. ຮ້ານອາຫານຟໍເລດບິດໂຕດ ຕັ້ງຢູ່ບ້ານທ່າແປ້ນ ແຂວງຫລວງພະບາງ (ຢູ່ເສັ້ນທາງຂຶ້ນໄປ ຫາສະຖານທີ ທ່ອງທ່ຽວນ້ຳຕົກຕາດກວາງຊີ) ເປັນຮ້ານທີ່ມີເອກະລັກສະເພາະ ຂອງຊົນເຜົ່າໄທດຳ, ຕິດພັນກັບການປົກປັກຮັກສາສິ່ງແວດລ້ອມ, ທັງສ້າງວຽກເຮັດງານທຳ ໃຫ້ປະຊາຊົນໃນທ້ອງຖິ່ນ.

ທ່ານ ກິພອນ ວົງສະຫວັດ ເຈົ້າຂອງຮ້ານອາຫານຟໍເລດບິດໂຕດ ​ໄດ້ໃຫ້ສຳພາດຕໍ່​ສື່ເມື່ອບໍ່ດົນນີ້ວ່າ: ຮ້ານອາຫານຟໍເລດບິດໂຕດ ເປັນຮ້ານອາຫານທີ່ມີເອກະລັກສະເພາະ ຂອງຊົນເຜົ່າໄທດຳ, ຕິດພັນກັບທຳມະຊາດ, ວັດທະນະທຳ ແລະ ຮີດຄອງປະເພນີ, ມີອາຫານຕາມສັ່ງ ຫລາຍປະເພດ ໂດຍສະເພາະອາຫານພື້ນເມືອງ ຂອງແຂວງຫລວງພະບາງ, ອ້ອມຮອບດ້ວຍປ່າໄມ້ ທີ່ສຽວສົດງົດງາມ, ມີສຽງນ້ຳໄຫລ ທີ່ອອນຊອນຫູ ບວກກັບລົດຊາດອາຫານ ພື້ນເມືອງ ທີ່ແຊບຊ້ອຍ ແລະ ເປັນເອກະລັກສະເພາະຂອງທ້ອງຖິ່ນ, ລວມເຖິງການຕົບແຕ່ງຮ້ານທີ່ສວຍງາມ, ແບບດັ່ງເດີມ ຫລື ແບບລາວໆ ແລະ ການນຸ່ງຖື ຂອງພະນັກງານ ພາຍໃນຮ້ານ​ແມ່ນນຸ່ງຊຸດຊົນເຜົ່າແບບດັ່ງເດີມ ທີ່ຜະລິດຈາກຜ້າແຜ, ຖັກແສ່ວດ້ວຍມື ເປັນການສະແດງອອກເຖິງຄວາມສວຍງາມ, ຄວາມພາກພູມໃຈ ແລະ ເອກະລັກຂອງຊົນເຜົ່າ. ນອກ ຈາກມີອາຫານລາວ ທີ່ເປັນເອກະລັກສະເພາະແລ້ວ, ຍັງໄດ້ປະສົມປະສານ ລົດຊາດອາຫານລາວ ແລະ ຕາເວັນຕົກ ໂດຍນຳໃຊ້ວັດຖຸດິບ ທີ່ສົດໃໝ່ໃນທ້ອງຖິ່ນ ແລະ ສວນຜັກປອດ​ສານພິດ ຢູ່ພາຍໃນຮ້ານອາຫານ ຕື່ມອີກ.

ທ່ານ ກິພອນ ວົງສະຫວັດ ຍັງໃຫ້ຮູ້ອີກວ່າ: ຮ້ານອາຫານຟໍເລດບິດໂຕດ ໄດ້ເປັນສ່ວນໜຶ່ງ ຂອງການສະໜັບສະໜູນ, ສົ່ງເສີມ, ປົກປັກຮັກສາສິ່ງແວດລ້ອມ, ມີຄວາມຕັ້ງໃຈຢ່າງເລິກເຊິ່ງ ໃນການປົກປັກຮັກສາທຳມະຊາດ, ປະຕິບັດຕາມແບບແຜນການທ່ອງທ່ຽວ ແບບຍືນຍົງ ໂດຍການຫລຸດຜ່ອນສິ່ງເສດເຫລືອ, ຫລີກເວັ້ນການໃຊ້ປລາສຕິກ ແລະ ນໍາໃຊ້ຜະລິດຕະພັນທ້ອງຖິ່ນ ເພື່ອຫລຸດຜ່ອນຜົນກະ ທົບຕໍ່ສິ່ງແວດລ້ອມ. ພ້ອມນີ້, ຍັງໄດ້ສະໜັບສະໜູນຊຸມຊົນທ້ອງຖິ່ນ ໂດຍການສະໜອງໂອກາດ ສ້າງວຽກເຮັດງານທຳ ໂດຍສະເພາະ ສໍາລັບໄວໜຸ່ມໃນຊຸມຊົນທ້ອງຖິ່ນ ດ້ວຍການຝຶກອົບຮົມ ແລະ ໃຫ້ອາຊີບແກ່ພະນັກງານທ້ອງຖິ່ນ ແລະ ອື່ນໆ.

ຮ້ານອາຫານຟໍເລດບິດໂຕດ ເລີ່ມເປີດໃຫ້ບໍລິການ ແຕ່ເວລາ 7:00-16:30 ໂມງ, ສາມາດຮັບລູກ​ຄ້າ ໄດ້ 200 ກວ່າຄົນ.

ຂ່າວ-ພາບ: ທະນູທອງ

KPL