*ສະຖານທ່ອງທ່ຽວອ່າງຫລວງ ເປັນອີກໜຶ່ງແຫລ່ງທ່ອງທ່ຽວທາງທຳມະຊາດຂອງເມືອງ ວັງວຽງ ແຂວງວຽງຈັນ ທີ່ໄດ້ຮັບລາງວັນການພັດທະນາທ່ອງທ່ຽວດີເດັ່ນ ແລະ ຍືນຍົງຂອງ ສປປ ລາວ ເຊິ່ງສະຖານທີ່ດັ່ງກ່າວອ້ອມຮອບໄປດ້ວຍປ່າໄມ້ທ່ີຂຽວສົດງົດງາມ, ອາກາດເຢັນ ແລະ ມີອ່າງນໍ້າໃສທີ່ສາມາດແນມເຫັນຝູງປານ້ອຍ-ໃຫຍ່ ຢູ່ໃນນໍ້າເຮັດໃຫ້ນັກທ່ອງທ່ຽວເພີດເພີນ ແລະ ຮູ້ສຶກຜ່ອນຄາຍເມື່ອໄດ້ເຂົ້າມາທ່ຽວຊົມ, ເໝາະແກ່ການມາພັກຜ່ອນແບບຄອບຄົວ, ຄູ່ຮັກ ຫລື ຈະມາກັບໝູ່ເພື່ອນ.

    ທ່ານ ມອກ ສະຫວັນ ເຈົ້າຂອງແຫລ່ງທ່ອງທ່ຽວທໍາມະຊາດອ່າງຫລວງ ໄດ້ໃຫ້ຮູ້ວ່າ: ອ່າງຫລວງ ເປັນແຫລ່ງທ່ອງທ່ຽວທາງທໍາມະຊາດຕັ້ງຢູ່ບ້ານນາມ່ວງຫ່າງຈາກຕົວເມືອງວັງວຽງ ປະມານ 13 ກິໂລແມັດ, ບໍລິເວນອ່າງຫລວງ ມີທິວທັດທໍາມະຊາດທີ່ສວຍງາມອ້ອມຮອບໄປດ້ວຍພູຜາປ່າໄມ້, ມີອ່າງນໍ້າທີ່ໃສເຮັດ ໃຫ້ນັກທ່ອງທ່ຽວເພີດເພີນ ແລະ ຮູ້ສຶກຜ່ອນຄາຍເມື່ອໄດ້ເຂົ້າມາທ່ຽວຊົມ ເຊິ່ງກິດຈະກໍາຍອດນິຍົມຂອງນັກທ່ອງທ່ຽວແມ່ນການໂດດນໍ້າ, ຂີ່ສະລິງ, ຍ່າງປ່າຊົມທໍາມະຊາດທີ່ສວຍງາມ, ການນັ່ງຕູບກິນອາຫານທີ່ແຊບຊ້ອຍ ແລະ ກິດຈະກໍາອື່ນໆ. ນອກຈາກນີ້, ສະຖານທີ່ທ່ອງທ່ຽວອ່າງຫລວງຍັງເປັນສະຖານທີ່ ທີ່ປະຊາຊົນມີສ່ວນຮ່ວມໃນການສ້າງກິດຈະກໍາ ໂດຍສະເພາະແມ່ນການຂາຍອາຫານພື້ນບ້ານ, ເຄື່ອງທີ່ລະນຶກເຊິ່ງໄດ້ສ້າງສີສັນ ແລະ ດຶງດູດຄວາມສົນໃຈຈາກນັກທ່ອງທ່ຽວທັງພາຍໃນ ແລະ ຕ່າງປະເທດຢ່າງຫລວງຫລາຍ.

   ທ່ານ ມອກ ສະຫວັນ ຍັງໃຫ້ຮູ້ອີກວ່າ: ຕົນເອງໄດ້ມາພັດທະນາອ່າງຫລວງ ໃນປີ 2014  ໂດຍສະເພະແມ່ນຂະຫຍາຍປຸກສ້າງຮ້ານອາຫານໃໝ່, ປັບປຸງສະຖານທ່ີທ່ຽວຊົມຖໍ້າ ແລະ ການຍ່າງປ່າຕາມຈຸດຕ່າງໆ ແລະ ກິດຈະກໍາອື່ນໆ ໃຫ້ມີຄວາມຫລາກຫລາຍ, ສວຍງາມຂຶ້ນ ແລະ ຮັບປະກັນໄດ້ຄວາມປອດໄພຂອງນັກທ່ອງທ່ຽວ. ໃນຂະນະດຽວກັນ, ກໍໄດ້ເອົາໃຈໃສ່ໃນການຮັກສາສ່ິງແວດລ້ອມໄປຄຽງຄູ່ກັບການພັດທະນາ ໂດຍສິ່ງດັ່ງກ່າວກໍເປັນປັດໄຈເຮັດໃຫ້ສະຖານທີ່ທ່ອງທ່ຽວອ່າງຫລວງ ໄດ້ຮັບລາງວັນການພັດທະນາທ່ອງທ່ຽວດີເດັ່ນ ແລະ ຍືນຍົງຂອງ ສປປ ລາວ.

     ສ່ວນທິດທາງແຜນການໃນຕໍ່ໜ້າແມ່ນຈະສືບຕໍ່ພັດທະນາແຫລ່ງທ່ອງທ່ຽວທໍາມະຊາດອ່າງຫລວງ ໃຫ້ໄປຕາມທິດສີຂຽວ ແລະ ຍືນຍົງ, ມາຮອດປັດຈຸບັນກຳລັງກໍ່ສ້າງສະຖານທີ່ສະແດງສິລະປະພື້ນບ້ານເປັນອີກກິດຈະກຳໜຶ່ງ ຂອງແຫລ່ງທ່ອງທ່ຽວອ່າງຫລວງ. ທັງນີ້, ກໍເພື່ອໃຫ້ນັກທ່ອງທ່ຽວໄດ້ຊົມ ແລະ ເພີດເພີນໄປກັບງານສິລະປະຕື່ມອີກ. 

ບົດ-ພາບໂດຍ: ກິດຕາ

KPL