ຂປລ. ໃນວັນທີ 19 ມັງກອນ 2025 ຜ່ານມາ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງຕ່າງປະເທດ ພ້ອມຄະນະ ໄດ້ເຂົ້າຮ່ວມກອງປະຊຸມລັດຖະມົນຕີ ຕ່າງປະເທດອາຊຽນ ແບບວົງແຄບ ຢູ່ ລັງກາວີ ປະເທດ ມາເລເຊຍ, ມີບັນດາລັດຖະມົນຕີຕ່າງປະເທດອາຊຽນ, ຕີມໍແລັດສະເຕ ແລະ ເລຂາທິການໃຫຍ່ ອາຊຽນ ເຂົ້າຮ່ວມ. ກອງປະຊຸມຄັ້ງນີ້, ແມ່ນຄັ້ງທໍາອິດ ຈັດຂຶ້ນພາຍໃຕ້ການເປັນປະທານອາຊຽນຂອງ ມາເລເຊຍ ປີ 2025 ພາຍໃຕ້ຄໍາຂວັນ “ການມີສ່ວນຮ່ວມຢ່າງທົ່ວເຖິງ ແລະ ຍືນຍົງ (Inclusivity and Sustainability)”.

ໃນກອງປະຊຸມ, ມາເລເຊຍໄດ້ແຈ້ງ ກ່ຽວກັບບຸລິມະສິດ ແລະ ພາຍໃຕ້ການເປັນປະທານອາ ຊຽນຂອງມາເລເຊຍ ໃນປີ 2025 ເຊິ່ງເນັ້ນໃສ່ການພັດທະນາແບບຍືນຍົງ ໂດຍພ້ອມກັນກ້າວໄປ ແລະ ໜ້າວຽກອື່ນໆ ທີ່ສືບຕໍ່ການເປັນປະທານອາຊຽນຂອງ ສປປ ລາວໃນປີຜ່ານມາ. ພາຍໃຕ້ປະຊາຄົມການ ເມືອງ-ຄວາມໝັ້ນຄົງ, ອາຊຽນຈະເນັ້ນໃສ່ການສົ່ງເສີມ ສັນຕິພາບ,​ ສະຖຽນລະພາບ ແລະ ຄວາມໝັ້ນ ຄົງໃນພາກພື້ນ; ສົ່ງເສີມການສ້າງປະຊາຄົມອາຊຽນ; ສົ່ງເສີມອາຊຽນ ເປັນກອງກໍາລັງທີ່ມີປະສິດທິພາບ ໃນການສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກໃນຂົງເຂດອິນໂດ-ປາຊີຟິກ ແລະ ນອກພາກພື້ນ; ສົ່ງເສີມຄວາມອາດສາມາດທາງດ້ານສະຖາບັນ ແລະ ຄວາມມີປະສິດທິພາບຂອງອາຊຽນ; ເພີ່ມທະວີຄວາມພະຍາຍາມ ໃນການສ້າງປະຊາຄົມອາຊຽນທີ່ຖື ເອົາປະຊາຊົນເປັນແກນກາງຢ່າງແທ້ຈິງ. ສໍາລັບປະຊາຄົມເສດຖະກິດ, ອາຊຽນ ຈະເນັ້ນໃສ່ການສົ່ງເສີມການຄ້າ ແລະ ການລົງທຶນ, ກຳນົດທິດທາງ ທີ່ມີສ່ວນຮ່ວມ ຢ່າງທົ່ວເຖິງ ແລະ ຍືນຍົງ, ສົ່ງເສີມການເຊື່ອມໂຍງ ແລະ ເຊື່ອມຈອດດ້ານເສດຖະກິດ ແລະ ສ້າງຄວາມເຂັ້ມແຂງດ້ານ ດີຈິຕອນຂອງອາຊຽນ. ສ່ວນປະຊາຄົມວັດທະນະ ທຳ-ສັງຄົມ, ອາຊຽນ ຈະເນັ້ນໃສ່ສ້າງຄຸນຄ່າດ້ານວັດທະນະທຳ ແລະ ມໍລະດົກ, ສົ່ງເສີມວຽກງານປັນຍາປະດິດ, ການຫັນເປັນດີຈິຕອນ ແລະ ສົ່ງເສີມໜ້າວຽກທີ່ກ່ຽວກັບ ການຟື້ນຟູສະພາບດິນຟ້າອາກາດ ແລະ ໂລກ. ພ້ອມນີ້, ຍັງສົ່ງເສີມທ່າແຮງຂອງ ຊາວໜຸ່ມ ແລະ ກິລາ ເພື່ອຮັດແໜ້ນຄວາມສາມັກຄີ ແລະ ສົ່ງເສີມມາດຕະການດ້ານ ສະພາບດິນຟ້າອາກາດເພື່ອເປັນຜູ້ນໍາພາ, ເປັນຄູ່ຮ່ວມ ແລະ ເປັນເຈົ້າການ. ພ້ອມນີ້, ກອງປະຊຸມ ຍັງໄດ້ເຫັນດີຕໍ່ບັນດາບຸລິມະສິດ ສຳລັບປີ 2025 ພາຍໃຕ້ການເປັນປະທານອາຊຽນຂອງ ມາເລເຊຍ.

ກອງປະຊຸມ ຍັງໄດ້ຮັບຊາບຄວາມຄືບໜ້າ ການຈັດຕັ້ງປະຕິບັດຜົນຂອງກອງປະຊຸມ ສຸດຍອດອາຊຽນຄັ້ງທີ 44, 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ທີ່ຈັດຂຶ້ນໃນເດືອນ ຕຸລາ 2024 ຜ່ານມາ ທີ່ນະຄອນຫລວງວຽງຈັນ, ພາຍໃຕ້ການເປັນປະທານອາຊຽນຂອງ ສປປ ລາວ ແລະ ຊຸກຍູ້ໃຫ້ສືບຕໍ່ຈັດຕັ້ງປະຕິບັດ ຜົນກອງປະຊຸມສຸດຍອດດັ່ງກ່າວ ໃຫ້ມີປະສິດທິຜົນ.

ພ້ອມນີ້, ກອງປະຊຸມ ຍັງໄດ້ເນັ້ນຢ້ຳວ່າ: ປີ 2025 ເປັນປີສໍາຄັນ ເພາະເປັນປີສຸດທ້າຍ ຂອງການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດຂອງທັງສາມເສົາຄໍ້າປະຊາຄົມ ໃຫ້ສໍາເລັດຕາມເປົ້າໝາຍ ແລະ ສ້າງບັນດາແຜນຍຸດທະສາດ ເພື່ອຈັດຕັ້ງປະຕິບັດ ວິໄສທັດປະຊາຄົມອາຊຽນ 2045 ເພື່ອໃຫ້ຜູ້ນໍາອາຊຽນ ຮັບຮອງເອົາໃນກອງປະຊຸມສຸດຍອດອາຊຽນ ຄັ້ງທີ 46 ທີ່ຈະໄດ້ຈັດຂຶ້ນໃນເດືອນ ພຶດສະພາ 2025.

ນອກນີ້, ກອງປະຊຸມຍັງໄດ້ປຶກສາຫາລື ກ່ຽວກັບການຮ່ວມມື ລະຫວ່າງອາຊຽນ ກັບພາຍນອກ ແລະ ໄດ້ເນັ້ນຄວາມສຳຄັນຂອງການຮັດແໜ້ນ ຄວາມເປັນເອກະພາບ ແລະ ຄວາມເປັນແກນກາງຂອງອາຊຽນ ໃນການພົວພັນກັບຄູ່ຄວາມຮ່ວມມືພາຍນອກ ໂດຍຜ່ານບັນດາກົນໄກ ທີ່ອາຊຽນເປັນຜູ້ນໍາພາ. ພ້ອມນີ້, ກອງປະຊຸມ ຍັງໄດ້ແລກປ່ຽນ ທັດສະນະກ່ຽວກັບ ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

ຂ່າວ-ພາບ: ກຕທ

KPL