*ຖ້າທ່ານໄດ້ຕິດຕາມການຖະແຫລງຂ່າວຂອງທ່ານນາງ ເມົານີງ ໂຄສົກກະຊວງການຕ່າງປະເທດຈີນ ໃນກອງປະຊຸມເຜີຍແຜ່ “ບົດລາຍງານຈ້ອງເບິ່ງການພັດທະນາທົ່ວໂລກ 2024” ຢູ່ທີ່ປັກກິ່ງເມື່ອກາງເດືອນ ທັນວາ 2024 ຈະເຂົ້າໃຈຢ່າງແຈ່ມແຈ້ງວ່າ: ບັນດາປະເທດທົ່ວໂລກທີ່ຮັກຫອມສັນຕິພາບ ຕ່າງກໍໃຫ້ການຕີລາຄາສູງຕໍ່ຈີນ ທີ່ໄດ້ປະກອບສ່ວນສຳຄັນໃນພາລະກິດຊຸກຍູ້ການພັດທະນາທົ່ວໂລກ. ນີ້ເປັນການຢັ້ງຢືນວ່າ: ສປຈີນ ພາຍໃຕ້ການນໍາຂອງປະທານ ສີ ຈິ້ນຜິງ ໄດ້ຮັບການສ້າງສາພັດທະນາຢ່າງບໍ່ຢຸດຢັ້ງ, ເຊິ່ງບໍ່ພຽງແຕ່ເປັນຜົນສໍາເລັດໃຫຍ່ຫຼວງຕໍ່ປະຊາຊົນຈີນເທົ່ານັ້ນ, ແຕ່ຍັງເປັນຜົນສໍາເລັດໃນການສ້າງສາພັດທະນາທີ່ເຫັນປະຈັກຕາຕໍ່ຊາວໂລກ, ອັນເຮັດໃຫ້ຖານະບົດບາດຂອງ ສປ ຈີນ ສູງເດັ່ນຂຶ້ນຢູ່ໃນເວທີສາກົນ. ພິເສດສາມຂໍ້ລິເລີ່ມໃຫຍ່ທົ່ວໂລກທີ່ທ່ານ ສີ ຈິ້ນຜິງ ປະທານປະເທດແຫ່ງ ສປຈີນ ໄດ້ສະເໜີອອກມາຄື: ຂໍ້ລິເລີ່ມການພັດທະນາທົ່ວໂລກ (ປີ 2021),ຂໍ້ລິເລີ່ມຄວາມໝັ້ນຄົງທົ່ວໂລກ (ປີ 2022), ແລະ ຂໍ້ລິເລີ່ມ ຄວາມສີວິໄລທົ່ວໂລກ (ປີ 2023) ໄດ້ສະທ້ອນໃຫ້ເຫັນເຖິງໝາກຜົນການຄົ້ນຄວ້າວິໄຈຢ່າງສັດຈະວິພາກຈາກທິດສະດີສູ່ພຶດຕິກໍາ, ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາບັນດາປະເທດຕ່າງໆ, ທັງຖືກກັບຄວາມເປັນຈິງ ແລະ ຖືກກັບເວລາທີ່ທົ່ວໂລກພວມຕ້ອງການແກ້ໄຂບັນຫາລວມຮ່ວມກັນ,ທັງແທດເໝາະກັບການຈັດຕັ້ງປະຕິບັດວາລະການພັດທະນາແບບຍືນຍົງປີ 2030 ຂອງອົງການສະຫະປະຊາຊາດ ເພື່ອສ້າງຄວາມສຸກໃຫ້ແກ່ປະຊາຊົນໃນທົ່ວໂລກ ໃຫ້ຫລາຍຂື້ນກວ່າເກົ່າ ແລະ ໃນຖານະທີ່ຈີນເປັນປະເທດພວມພັດທະນາທີ່ໃຫຍ່ທີ່ສຸດຂອງໂລກ, ຍາມໃດກໍຍິນດີລົງເລິກການຮ່ວມມືໃນດ້ານການພັດທະນາກັບບັນດາປະເທດຕ່າງໆ.

ດວ້ຍເຫດຜົນໃດ ທ່ານສີຈິ້ນຜິງ ເລຂາທິການໃຫຍ່, ປະທານປະເທດຈີນຈິ່ງມີແນວຄວາມຄິດສະເໜີທິດສະດີອັນສໍາຄັນ ຂອງການສ້າງປະຊາຄົມຮ່ວມຊະຕາກໍາມວນມະນຸດ ແລະ ສາມຂໍ້ລິເລີ່ມໃຫຍ່ທົ່ວໂລກຂື້ນມາໃຫ້ຊາວໂລກໄດ້ຮັບຮູ້ ແລະ ຮວ່ມກັນຈັດຕັ້ງປະຕິບັດ? ເຫດຜົນກໍຍ້ອນວ່າແຕ່ລະປະເທດລ້ວນແລ້ວແຕ່ແມ່ນຈຸລັງໜຶ່ງ ຫລື ອົງປະກອບໜຶ່ງຂອງສັງຄົມໂລກ, ປະເທດໃດໜຶ່ງບໍ່ສາມາດຢູ່ຢ່າງໂດດດ່ຽວ ແລະ ບໍ່ສາມາດພັດທະນາຢ່າງວ່ອງໄວໄດ້ຖ້າບໍ່ໄດ້ມີການພົວພັນຮວ່ມມືກັບປະເທດຕ່າງໆ. ພ້ອມນັ້ນການພັດທະນາແບບຕ່າງຝ່າຍຕ່າງເຮັດແມ່ນຍາກທີ່ຈະປະສົບຜົນສຳເລັດ. ຍ້ອນແນວນັ້ນທ່ານສີຈິ້ນຜິງ ຈິ່ງໃຫ້ການຢັ້ງຢືນວ່າມີແຕ່ການສ້າງປະຊາຄົມຮ່ວມຊະຕາກໍາມວນມະນຸດ ແລະ ການພັດທະນາທົ່ວໂລກຮວ່ມກັນຕາມ 3 ຂໍ້ລິເລີ່ມກວມລວມທົ່ວໂລກເທົ່ານັ້ນຈິ່ງແມ່ນຫົນທາງດຽວທີ່ຈະພາໃຫ້ແຕ່ລະປະເທດປະສົບຜົນສຳເລັດຢ່າງຍືນຍົງ. ຍ້ອນແນວນັ້ນ, ສປຈີນ ໃນຖານະເປັນປະເທດເປີດປະຕູສູ່ໂລກພາຍນອກທີ່ມີແນວຄິດມອງກວ້າງເບິ່ງໄກຈິ່ງມີຄວາມຍິນດີຮ່ວມມືກັບທຸກປະເທດ ແລະ ປະຊາຊົນໃນໂລກທີ່ສະໜັບສະໜູນຂໍ້ລິເລີ່ມດັ່ງກ່າວ ເພື່ອສະແຫວງຫາສັນຕິພາບ ແລະ ຄວາມຈະເລີນກ້າວໜ້າຂອງມວນມະນຸດລວມທັງຮ່ວມກັນຊຸກຍູ້ ການປະຕິບັດຂໍ້ລິເລີ່ມເຫລົ່ານັ້ນໃຫ້ເປັນຮູບປະທໍາຢ່າງຕັ້ງໜ້າ ປະກອບສ່ວນເຂົ້າໃນການແກ້ໄຂບັນຫາໂລກທີ່ມີການຜັນແປ ພ້ອມທັງຊຸກ ຍູ້ການປະຕິຮູບການປົກຄອງທົ່ວໂລກໃຫ້ມີທິດທາງການພັດທະນາທີ່ຍຸຕິທຳ ແລະ ສົມເຫດສົມຜົນກວ່າເກົ່າ.

ຜ່ານການຈັດຕັ້ງປະຕິບັດເຫັນວ່າການສ້າງປະຊາຄົມຮ່ວມຊະຕາກໍາມວນມະນຸດ ແລະ ການຈັດຕັ້ງປະຕິບັດ 3 ຂໍ້ ລິເລີ່ມກວມລວມທົ່ວໂລກແມ່ນໄດ້ຮັບການສະໜັບສະໜູນ ແລະ ມີການຕອບຮັບຢ່າງຕັ້ງໜ້າຈາກສັງຄົມສາກົນຢ່າງກວ້າງຂວາງ, ຫລາຍປະເທດທີ່ໄດ້ເຂົ້າຮວ່ມກໍປະສົບຜົນສຳເລັດໃນການພັດທະນາປະເທດຕົນ, ປະຊາຊົນກໍໄດ້ຫລຸດພົ້ນອອກຈາກຄວາມທຸກຍາກ. ເວົ້າສະເພາະ, ສປປ ລາວ ແມ່ນຍິນດີສະໜັບສະໜູນ ແລະ ຮ່ວມກັບຝ່າຍຈີນຈັດຕັ້ງປະຕິບັດ 3 ຂໍ້ລິເລີ່ມກວມລວມທົ່ວໂລກ, ດັ່ງທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຮອງປະທານປະເທດແຫ່ງ ສປປ ລາວ ໄດ້ກ່າວໃນກອງປະຊຸມປາຖະກະຖາພາຍໃຕ້ຫົວຂໍ້ “ຈັບມືຮ່ວມກັນຈັດຕັ້ງປະຕິບັດ 3 ຂໍ້ລິເລີ່ມກວມລວມທົ່ວໂລກຮ່ວມກັນເປີດສັງກາດໃໝ່ ຂອງຄູ່ຮ່ວມຊະຕາກໍາລາວ- ຈີນ” ທີ່ນະຄອນຫຼວງວຽງຈັນໃນຕົ້ນເດືອນກັນຍາ 2024 ວ່າ: ພັກແລະລັດຖະບານລາວຍາມໃດກໍຊົມເຊີຍ ແລະ ຕີລາຄາສູງຕໍ່ 3 ຂໍ້ລິເລີ່ມກວມລວມທົ່ວໂລກແລະຝ່າຍລາວຍິນດີຮ່ວມມືກັບຈີນ ເພື່ອຊຸກຍູ້ການປະຕິບັດ 3 ຂໍ້ລິເລີ່ມສຳຄັນດັ່ງກ່າວຢ່າງຕັ້ງໜ້າເພື່ອປະກອບສ່ວນເຂົ້າໃນການສ້າງສັນຕິພາບ ແລະ ການພັດທະນາຂອງໂລກ ກໍຄືຄວາມຈະເລີນກ້າວໜ້າ ແລະ ຄວາມສີວິໄລຂອງມວນມະນຸດ. ພາຍໃຕ້ການຊີ້ນໍານໍາພາ ແລະ ການເອົາໃຈໃສ່ຂອງການນໍາສູງສຸດຂອງສອງປະເທດ, ການສ້າງຄູ່ຮ່ວມຊະຕະກໍາຈີນ-ລາວ ໄດ້ຮັບຜົນສຳເລັດ ແລະ ຕໍ່ເນື່ອງ,ສອງຝ່າຍຄວນສືບຕໍ່ປະຕິບັດຄວາມເຫັນດີເຫັນພ້ອມທີ່ສຳຄັນຂອງການນຳສູງສຸດຂອງສອງປະເທດ, ເພີ່ມທະວີການແລກປ່ຽນ ແລະ ການຮ່ວມມືໃນຂົງເຂດຕ່າງໆ, ຮ່ວມກັນສ້າງສາຍພົວພັນແບບຄູ່ຮ່ວມຊະຕະກໍາລາວ-ຈີນໃຫ້ມີມາດຕະຖານສູງ, ຄຸນນະພາບສູງ ແລະ ລະດັບສູງ.

ສາມຂໍ້ລິເລີ່ມໃຫຍ່ທົ່ວໂລກຍັງມີຄວາມໝາຍສໍາຄັນຕໍ່ສປປ ລາວ, ທັງສອດຄ່ອງກັບແນວທາງນະໂຍບາຍການຕ່າງປະເທດອັນຖືກຕ້ອງເປັນທໍາຂອງ ສປປ ລາວ ຄືສັນຕິພາບ, ເອກະລາດ, ມິດຕະພາບ ແລະ ການຮ່ວມມື. ສປປ ລາວ ທີ່ເຄີຍຜ່ານສົງຄາມມາຫລາຍສິບປີແມ່ນບໍ່ຢາກເຫັນສົງຄາມອີກແລ້ວ, ປາຖະໜາຢ່າງແຮງກ້າຢາກເຫັນສັນຕິພາບເກີດຂຶ້ນຢູ່ໃນໂລກ. ເມື່ອໂລກມີສັນຕິພາບ ຈຶ່ງຈະມີສະພາບແວດລ້ອມອ້ອມຂ້າງທີ່ດີ ແລະ ຈຶ່ງຈະມີເວລາສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ, ປະຊາຊົນຮັ່ງມີຜາສຸກ ແລະ ມີຄວາມສີວິໄລຢ່າງຍືນຍົງ.ເພາະສະນັ້ນ, ສາມຂໍ້ລິເລີ່ມໃຫຍ່ທົ່ວໂລກຈິ່ງແມ່ນຜະລິດຕະພັນຮ່ວມກັນ ທັງແມ່ນເພື່ອຫຼຸດຜ່ອນການປະທະກັນ, ສະໜອງວິທີການແກ້ໄຂບັນຫາທີ່ມີປະສິດທິພາບໃຫ້ແກ່ໂລກ, ພ້ອມທັງຊຸກຍູ້ການສ້າງປະຊາຄົມຮ່ວມຊະຕາກໍາມວນມະນຸດໃຫ້ເຕີບໃຫຍ່ຂະຫຍາຍຕົວຢ່າງຍືນຍົງຮ່ວມກັນ. ສະນັ້ນ, ຈຶ່ງເຫັນວ່າ ສປ ຈີນ ສະໜີສາມຂໍ້ລິເລີ່ມໃຫຍ່ທົ່ວໂລກອອກມາ ແມ່ນຖືກຍາມຖືກເວລາທີ່ສຸດເພື່ອສ້າງຜົນປະໂຫຍດໃຫ້ແກ່ໂລກ ກໍຄືແກ່ບັນດາປະເທດ ແລະ ແກ່ ສປປ ລາວ.

    ໂດຍລວມແລ້ວ,10 ປີຜ່ານມານີ້, ປະເທດຈີນ ແລະ ລາວລ້ວນແຕ່ໄດ້ກ້າວເຂົ້າສູ່ລວງເລິກໃນການສ້າງປະຊາຄົມຮ່ວມຊະຕາກໍາ ຂອງມະນຸດຢ່າງສະເໝີຕົ້ນສະເໝີປາຍ ແລະ ໄດ້ສ້າງຫຼາຍບົດເລື່ອງທີ່ໂດດເດັ່ນໃຫ້ແກ່ຊາວໂລກໄດ້ຮັບຮູ້ ໜຶ່ງໃນນັ້ນກໍແມ່ນເສັ້ນທາງລົດໄຟລາວ-ຈີນ ໄດ້ກາຍເປັນ​ໂຄງ​ການແບບຢ່າງທີ່ດີທີ່ສຸດໃນການ​​ເຊື່ອມ​ຕໍ່​​ຂໍ້​ລິ​ເລີ່ມ “ໜຶ່ງ​ແລວ​ໜຶ່ງ​ເສັ້ນ​ທາງ”​ຂອງສ​ປ ​ຈີນ ເຂົ້າ​ກັບ​ຍຸດ​ທະ​ສາດ“ຫັນຈາກປະເທດບໍ່ມີທາງອອກສູ່ທະເລມາເປັນປະເທດເຊື່ອມໂຍງເຊື່ອມຈອດ”ຂອງ ສປປ ລາວ ດວ້ຍຜົນສຳເລັດ, ອີງຕາມຂໍ້ມູນຈາກບໍລິສັດທາງລົດໄຟລາວ-ຈີນ ຈໍາກັດລາຍງານໃຫ້ຮູ້ວ່າ: ສະເພາະໝົດປີ 2024 ບໍລິການຜູ້ໂດຍສານໄດ້ 3,7 ລ້ານກວ່າຄົນ, ເພີ່ມຂຶ້ນ 46% ເມື່ອທຽບໃສ່ໄລຍະດຽວກັນຂອງປີ2023, ສະເລ່ຍ 10,348 ຄົນ/ມື້. ໃນນັ້ນ ຂົນສົ່ງຜູ້ໂດຍສານຂ້າມແດນທັງໝົດ 280,000 ຄົນ, ຂາອອກໄປຈີນ 137,000 ຄົນ ສະເລ່ຍ 375 ຄົນ/ມື້. ໃນດ້ານການຂົນສົ່ງສິນຄ້າໝົດປີ 2024 ຂົນສົ່ງສິນຄ້າໄດ້ 4,7 ລ້ານກວ່າໂຕນ, ເພີ່ມຂຶ້ນ 17% ເມື່ອທຽບໃສ່ໄລຍະດຽວກັນຂອງປີ2023, ສະເລ່ຍແມ່ນ 13 ພັນກວ່າໂຕນ/ມື້, ການສົ່ງອອກສິນຄ້າສູງສຸດ 22,217ໂຕນ/ມື້. ຜົນສຳເລັດນີ້ສະແດງໃຫ້ເຫັນເຖິງບົດບາດຂອງລົດໄຟລາວ-ຈີນ ໄດ້ກາຍເປັນສັນຍາລັກຂອງເສັ້ນທາງຄຳດ້ານການຂົນສົ່ງທີ່ດີທີສຸດຂອງ ສປປ ລາວ ແລະ ເຊື່ອແນ່ວ່າລົດໄຟລາວ-ຈີນ ຈະສືບຕໍ່ເປັນທີ່ນິຍົມຂື້ນຂອງຜູ້ຊົມໃຊ້ຢ່າງຫລວງຫລາຍຂື້ນກວ່າເກົ່າໃນປີ 2025 ແລະ ໃນປີຕໍ່ໆໄປ. ຢັ້ງຢືນໄດ້ວ່າ: 3ຂໍ້ ລິເລີ່ມກວມລວມທົ່ວໂລກມີຜົນດີຕໍ່ການຂັບເຄື່ອນພັດທະນາໂລກ. ຈີນກາຍເປັນປະເທດໜຶ່ງທີ່ປະກອບສ່ວນສຳຄັນ ໃນການຊຸກຍູ້ພາລະກິດພັດທະນາທົ່ວໂລກ ລວມທັງ ສປປ ລາວ ຢ່າງມີຜົນສຳເລັດ.

ໂດຍ: ດວງຈິດສະຫວັດບຸນມີ

KPL