ຂປລ. ນັບແຕ່ເດືອນມັງກອນ-ພະຈິກ 2024 ທົ່ວນະຄອນຫລວງວຽງຈັນ (ນວ) ມີອຸບັດເຫດຕາມທ້ອງຖະໜົນ ເກີດຂຶ້ນ ຈຳນວນ 994 ເລື່ອງ, ມີພາຫະນະເປ່ເພ ທັງໝົດ 1.994 ຄັນ. ໃນນີ້, ເປ່ເພເລັກໜ້ອຍ ຈຳນວນ 592 ຄັນ, ເປ່ເພສົມຄວນ 1.386 ຄັນ ແລະ ໃຊ້ການບໍ່ໄດ້ 16 ຄັນ, ມີຄົນໄດ້ຮັບບາດເຈັບ ທັງໝົດ 1.120 ຄົນ. ໃນນີ້, ບາດເຈັບເລັກໜ້ອຍ 326 ຄົນ, ເຈັບສົມຄວນ 544 ຄົນ, ບາດເຈັບສາຫັດ 250 ຄົນ ແລະ ເສຍຊີວິດ 113 ຄົນ. ໃນນັ້ນ, ພະແນກຕຳຫລວດຈະລາຈອນ ປກສ ນະຄອນຫລວງວຽງຈັນ ໄດ້ສະຫລຸບສັງຮວມ 10 ເຫດການອຸບັດເຫດຕາມທ້ອງຖະໜົນ ທົ່ວນະຄອນຫລວງວຽງຈັນ ທີ່ມີຄວາມຮຸນແຮງ.

 


ທ່ານ ພັຕ ແສງ ພົມມະວົງ ຫົວໜ້າກອງສືບສວນ-ສອບສວນ ແກ້ໄຂຄະດີອຸບັດຕິເຫດຈະລາຈອນ ນະ ຄອນຫລວງວຽງຈັນ ໄດ້ໃຫ້ສຳພາດຕໍ່ສື່ມວນຊົນວ່າ: ໃນປີ 2024 ນີ້, ພະແນກຕຳຫລວດຈະລາຈອນ ປກສ ນະ ຄອນຫລວງວຽງຈັນ ໄດ້ສະຫລຸບສັງຮວມ 10 ເຫດການອຸບັດເຫດຕາມທ້ອງຖະໜົນ ທົ່ວນະຄອນຫລວງວຽງຈັນ ທີ່ມີຄວາມຮຸນແຮງ ແລະ ມີຜົນເສຍຫາຍຫລາຍ ມີດັ່ງນີ້: ອຸບັດເຫດລົດຕຳກັນສາມຄັນຊ້ອນ ຄື: ລົດຈັກຕຳກັບລົດໃຫຍ່ ແລ້ວຕຳກັບລົດບັນທຸກ ສົ່ງຜົນເຮັດໃຫ້ມີຄົນເສຍຊີວິດ 2 ຄົນ ມູນຄ່າປະມານ 550 ລ້ານກີບ; ເຫດການດັ່ງກ່າວ ເກີດຂຶ້ນໃນເວລາປະມານ 17:00 ໂມງຂອງວັນທີ 8 ກຸມພາ 2024  ຢູ່ທີ່ຖະໜົນ 13 ໃຕ້ ເຂດບ້ານນາລ້ອມ ເມືອງໄຊທານີ; ອຸບັດເຫດລົດໃຫຍ່ຕຳກັບລົດຈັກ ເຮັດໃຫ້ມີຄົນເສຍຊີວິດ 2 ຄົນ ຜົນເສຍຫາຍ ປະມານ 300 ລ້ານກີບ, ເຫດການນີ້ ເກີດຂຶ້ນເວລາປະມານ 22:58 ໂມງ ຂອງວັນທີ 2 ກໍລະກົດ 2024 ຢູ່ຖະໜົນທ່າເດື່ອ ເຂດບ້ານດົງໂພສີ ເມືອງຫາດຊາຍຟອງ; ອຸບັດເຫດລົດ ຕຳກັນສາມຄັນຊ້ອນ ຄື: ລົດຈັກຕຳກັບລົດຈັກ ແລ້ວຕຳກັບລົດໃຫຍ່ ສົ່ງຜົນເຮັດໃຫ້ມີຄົນເສຍຊີວິດ 2 ຄົນ ຜົນເສຍຫາຍ ປະມານ 300 ລ້ານກີບ, ເຫດການດັ່ງກ່າວ ເກີດຂຶ້ນໃນເວລາປະມານ 00:28 ໂມງຂອງວັນທີ 2 ທັນວາ 2024 ຢູ່ເສັ້ນທາງເຂດບ້ານຊຽງດາ ເມືອງໄຊເສດຖາ; ອຸບັດເຫດລົດໃຫຍ່ຕຳກັບລົດຈັກ ມີຄົນເສຍຊີວິດ 2 ຄົນ ຜົນເສຍຫາຍປະມານ 250 ລ້ານກີບ, ເຫດການດັ່ງກ່າວ ເກີດຂຶ້ນໃນເວລາປະມານ 20:20  ໂມງ ຂອງວັນທີ 9 ສິງຫາ 2024 ຢູ່ທີ່ຖະໜົນລ້ານຊ້າງ ເຂດບ້ານຫັດສະດີ ເມືອງຈັນທະບູລີ; ອຸບັດເຫດລົດຈັກຕຳກັບລົດຈັກ ຢ່າງຮຸນແຮງ ສົ່ງຜົນເຮັດໃຫ້ມີຄົນເສຍຊີວິດ 2 ຄົນ ຜົນເສຍຫາຍປະມານ 150 ລ້ານກີບ; ອຸບັດເຫດໃນຄັ້ງນີ້, ເກີດຂຶ້ນໃນເວລາປະມານ 21:15 ໂມງ ຂອງວັນທີ 19 ສິງຫາ 2024 ຢູ່ທີ່ຖະໜົນ ເລກ 11 ເຂດບ້ານອ່າງນ້ອຍ ເມືອງສີໂຄດຕະບອງ; ອຸບັດເຫດລົດຈັກຕຳກັບລົດໃຫຍ່ ເຮັດໃຫ້ມີຄົນເສຍຊີວິດ 1 ຄົນ ຜົນເສຍຫາຍປະມານ 800 ລ້ານກີບ, ເຫດການເກີດຂຶ້ນໃນວັນທີ 25 ສິງຫາ 2024 ເວລາປະມານ 00:10 ໂມງ ຢູ່ທີ່ຖະໜົນດອນຈັນ ເຂດບ້ານທາດຂາວ ເມືອງສີສັດຕະນາກ; ອຸບັດເຫດລົດຕຳກັນ 6 ຄັນຊ້ອນ ຄື: ລົດບັນທຸກຕຳກັບລົດບັນທຸກ ຕໍ່ໃສ່ລົດໃຫຍ່ ກັບລົດໃຫຍ່ ຕຳລົດບັນທຸກ ແລະ ຕຳກັບລົດຈັກ ເຮັດໃຫ້ມີຄົນເສຍຊີວິດ 1 ຄົນ, ຜົນເສຍຫາຍປະມານ 600 ລ້ານກີບ, ເຫດການນີ້ ເກີດຂຶ້ນໃນວັນທີ 7 ຕຸລາ 2024 ເວລາປະມານ 11:30 ໂມງ ຢູ່ຖະໜົນຕາດມູນ ເຂດບ້ານວຽງຄໍາ ເມືອງສີໂຄດຕະບອງ; ອຸບັດເຫດລົດຈັກຕຳກັບລົດໃຫຍ່ (ຕຳແລ້ວໜີ) ແຕ່ນໍາກັກຕົວຄູ່ກໍລະນີໄດ້ ເຮັດໃຫ້ມີຄົນເສຍຊີວິດ 1 ຄົນ ຜົນເສຍຫາຍປະມານ 400 ລ້ານກີບ, ເຫດເກີດຂຶ້ນ ເວລາປະມານ 22:10 ໂມງ ຂອງວັນທີ 28 ພະຈິກ 2024 ຢູ່ເສັ້ນທາງ ເຂດບ້ານປາກທ້າງ ເມືອງສີໂຄດຕະບອງ; ອຸບັດເຫດລົດຈັກຕຳກັບລົດໃຫຍ່ (ຕຳແລ້ວໜີ) ສາມາດຕິດຕາມນໍາກັກຕົວຄູ່ກໍລະນີໄດ້ ເຮັດໃຫ້ມີຄົນເສຍຊີວິດ 1 ຄົນ ແລະ ບາດເຈັດສາຫັດ 1 ຄົນ, ຜົນເສຍຫາຍປະມານ 300 ລ້ານກີບ, ເຫດເກີດໃນວັນທີ 15 ທັນວາ 2024 ເວລາປະມານ 00:48 ໂມງ ຢູ່ເສັ້ນທາງເຂດບ້ານຕານມີໄຊ ເມືອງໄຊທານີ ແລະ ອຸບັດເຫດລົດຈັກຕຳກັບລົດໃຫຍ່ ສົ່ງຜົນເຮັດໃຫ້ມີຄົນເສຍຊີວິດ 1 ຄົນ ຜົນເສຍຫາຍປະມານ 200 ລ້ານກີບ, ອຸບັດເຫດດັ່ງກ່າວ ເກີດຂຶ້ນໃນເວລາປະມານ 15:30 ໂມງ ຂອງວັນທີ 21 ກັນຍາ 2024 ຢູ່ທີ່ຖະໜົນ ເລກ 10 ເຂດບ້ານທ່າສະຫວ່າງ ເມືອງໄຊທານີ ນະຄອນຫລວງວຽງຈັນ.

ທ່ານ ພັຕ ແສງ ພົມມະວົງ  ຍັງໃຫ້ຮູ້ອີກວ່າ: ຕະຫລອດໄລຍະປີ 2024 ນີ້, ເຈົ້າໜ້າທີ່ຕຳຫລວດວິຊາສະ ເພາະ ພາຍໃນ ກອງສືບສວນ-ສອບສວນ ແກ້ໄຂຄະດີອຸບັດເຫດຈະລາຈອນ ນວ ໄດ້ເອົາໃຈໃສ່ປະຕິບັດໜ້າທີ່ ວຽກງານວິຊາສະເພາະຢ່າງຕັ້ງໜ້າ ເປັນຕົ້ນແມ່ນວຽກງານຫລດຜ່ອນ ການເກີດອຸບັດເຫດຕາມທ້ອງຖະໜົນ ໂດຍສຸມໃສ່ການລົງໂຄສະນາເຜີຍແຜ່ ກົດລະບຽບການສັນຈອນ ໃຫ້ຜູ້ຂັບຂີ່ຍານພາຫະນະ ກໍຄື ຜູ້ໃຊ້ລົດ-ໃຊ້ຖະໜົນ ຢູ່ຕາມສະຖານທີ່ຕ່າງໆ ເຊັ່ນ: ຢູ່ພາຍໃນໂຮງຮຽນ, ໂຮງຈັກ-ໂຮງງານ ແລະ ຢູ່ຕາມເສັ້ນທາງຕ່າງໆໃນເຂດຊຸມຊົນ ເພື່ອແນໃສ່ເຮັດໃຫ້ຜູ້ຂັບຂີ່ ໄດ້ຮັບຮູ້ ແລະ ເຂົ້າໃຈຕໍ່ກົດລະບຽບການສັນຈອນ ເພື່ອຊ່ວຍຫລຸດຄວາມສ່ຽງ ທີ່ອາດຈະເກີດອຸບັດເຫດຕາມທ້ອງຖະໜົນ.

ຂ່າວ:​ ລັດດາວັນ

KPL