ຂປລ
ຂປລ. ນິຄົມອຸດສາຫະກຳປຸງແຕ່ງປາສະຫວາຍ ເມືອງໂຂງ ແຂວງຈໍາປາສັກ ໂດຍແມ່ນ ບໍລິສັດແມ່ຂອງ ອຸດສາຫະກຳການປະມົງ ຈໍາກັດ ເປັນບໍລິສັດ ລົງທຶນກໍ່ສ້າງໂຮງງານແປຮູບປາສະຫວາຍ ແມ່ຂອງອາຫານສົດ ຈໍາກັດ ໂດຍຮ່ວມກັບ ກະຊວງກະສິກໍາ ແລະ ປ່າໄມ້ ຂອງ ສປປ ລາວ ຈະເປັນການລ້ຽງ ແລະ ການຜະລິດ ແບບຕ່ອງໂສ້ອາຫານ ແລະ ການຕະຫລາດແບບຄົບວົງຈອນ
ຂປລ. ນິຄົມອຸດສາຫະກຳປຸງແຕ່ງປາສະຫວາຍ ເມືອງໂຂງ ແຂວງຈໍາປາສັກ ໂດຍແມ່ນ ບໍລິສັດແມ່ຂອງ ອຸດສາຫະກຳການປະມົງ ຈໍາກັດ ເປັນບໍລິສັດ ລົງທຶນກໍ່ສ້າງໂຮງງານແປຮູບປາສະຫວາຍ ແມ່ຂອງອາຫານສົດ ຈໍາກັດ ໂດຍຮ່ວມກັບ ກະຊວງກະສິກໍາ ແລະ ປ່າໄມ້ ຂອງ ສປປ ລາວ ຈະເປັນການລ້ຽງ ແລະ ການຜະລິດ ແບບຕ່ອງໂສ້ອາຫານ ແລະ ການຕະຫລາດແບບຄົບວົງຈອນ ໂດຍອີງໃສ່ທ່າແຮງ ແລະ ສະພາບແວດລ້ອມ ຂອງປະເທດລາວທີ່ເໝາະສົມໃນການລ້ຽງ ເພື່ອສົ່ງອອກໄປຕ່າງປະເທດ ເຊິ່ງໂຄງການດັ່ງກ່າວຈະປະກອບສ່ວນສ້າງວຽກເຮັດງານທໍາ ໃຫ້ແກ່ປະຊາຊົນໃນເຂດໂຄງການ ແລະ ເຂດໃກ້ຄຽງ.
ທ່ານXu Yun, ປະທານບໍລິສັດ ວິທະຍາສາດ ແລະ ເຕັກໂນໂລຊີ ການປະມົງ ເຊີນເຈີ້ນ ຈໍາກັດ ໄດ້ໃຫ້ສໍາພາດເມື່ອບໍ່ດົນນີ້ວ່າ: ໂຮງງານປຸງແຕ່ງປາສະຫວາຍ ໄດ້ເປີດດໍາເນີນການຜະລິດຢ່າງເປັນທາງການ ໃນວັນທີ 9 ທັນວາ 2024, ໄດ້ແປຮູບ ແລະ ປຸງແຕ່ງປາສະຫວາຍ 100 ໂຕນຕໍ່ມື້ ເພື່ອສົ່ງອອກໄປຕ່າງປະເທດ ໂດຍໄດ້ຮັບອະນຸຍາດ ຈາກກົມໃຫຍ່ພາສີ ສປ ຈີນ ແລະ ໃນທ້າຍເດືອນທັນວານີ້ ໄດ້ສົ່ງຜະລິດຕະພັນອອກໄປ ສປ ຈີນ. ສໍາລັບ ເນື້ອ ທີ່ການລ້ຽງປາ ແມ່ນ 107 ເຮັກຕາ, ສະເພາະໂຮງງານໜຶ່ງ ຄາດວ່າຈະສົ່ງປາສະຫວາຍແປຮູບອອກໄປຕ່າງ ປະເທດ 1.500 ໂຕນ/ປີ ແລະ ໃນອະນາຄົດຈະສ້າງໂຮງງານແປຮູບເພີ່ມອີກ 10 ແຫ່ງ, ຄາດວ່າຈະເປັນໂຮງງານທີ່ໃຫຍ່ທີ່ ສຸດໃນ ສປປ ລາວ ໂດຍຈະສາມາດສ້າງວຽກເຮັດງານທໍາ ໃຫ້ແກ່ປະຊາຊົນໃນທ້ອງຖິ່ນ ແລະ ແຂວງໃກ້ຄຽງ ປະມານ 200-300 ຄົນ, ທັງເປັນການປະກອບສ່ວນເຂົ້າໃນ ການພັດທະນາເສດຖະກິດຂອງ ສປປ ລາວ, ທັງສາມາດສ້າງ ລາຍຮັບໃຫ້ແກ່ປະຊາຊົນ.
ທ່ານXu Yun ຍັງໃຫ້ຮູ້ອີກວ່າ: ໃນອະນາຄົດ, ບໍລິສັດມີແຜນຈະຂະຫຍາຍ ໂຄງການການລ້ຽງປາສະ ຫວາຍ ແລະ ສ້າງໂຮງງານແປຮູບ ຢູ່ບາງແຂວງຂອງລາວ ທີ່ມີເງື່ອນໄຂຕື່ມອີກ.
ຂ່າວ: ຈັນທະລອນ
ພາບ: ອ່າຍຄໍາ
KPL
