ຂປລ
ສປຈີນ ອອກຊຸດແນວປະຕິບັດ ເພື່ອເລັ່ງສ້າງຕະຫລາດ ການຂົນສົ່ງແບບລວມສູນ ທີ່ເປີດກ້ວາງ, ໂດຍເອກະສານ ສຳນັກງານທົ່ວໄປແຫ່ງ ຄະນະລັດຖະມົນຕີ ສປຈີນ ລະບຸວ່າ ສປຈີນ ຈະສົ່ງເສີມ ແລະ ຊີ້ນຳທຶນ ທາງສັງຄົມເຂົ້າມາ
ຂປລ.ສຳນັກຂ່າວ ຊິນຮວາຂອງ ສປຈິນ, ສປຈີນ ອອກຊຸດແນວປະຕິບັດ ເພື່ອເລັ່ງສ້າງຕະຫລາດ ການຂົນສົ່ງແບບລວມສູນ ທີ່ເປີດກ້ວາງ, ໂດຍເອກະສານ ສຳນັກງານທົ່ວໄປແຫ່ງ ຄະນະລັດຖະມົນຕີ ສປຈີນ ລະບຸວ່າ ສປຈີນ ຈະສົ່ງເສີມ ແລະ ຊີ້ນຳທຶນ ທາງສັງຄົມເຂົ້າມາ ມີສ່ວນຮ່ວມໃນການກໍ່ສ້າງ ແລະ ດຳເນີນງານທາງລົດໄຟ ຕາມກົດໝາຍແລະ ຂໍ້ບັງຄັບ.
ສປຈີນ ຈະພະຍາຍາມ ສົ່ງເສີມ ການສ້າງຄວາມຫລາກຫລາຍ ແລະ ການແຂ່ງຂັນລະດັບປານກາງໃນກຸ່ມອົງກອນ ທີ່ກ່ຽວຂ້ອງກັບການຂົນສົ່ງ ທາງລາງ ແລະ ສະໜັບສະໜູນ ບໍລິສັດ ຜູ້ປະກອບການ ທີ່ມີຄຸນສົມບັດຜ່ານເກນ ເຂົ້າມາດຳເນີນງານ ຜ່ານທາງລົດໄຟ ລະຫວ່າງເມືອງ, ລວມເຖິງທາງລົດໄຟໃນເມືອງ ແລະ ຊານເມືອງ.
ສປຈີນ ຈະປັບປຸງນະໂຍບາຍທີ່ກ່ຽວຂ້ອງ ກັບການໃຊ້ພະລັງງານ ສະອາດທົດແທນໃນອຸປະກອນການຂົນສົ່ງ ເພື່ອສົ່ງເສີມການປະຍຸກໃຊ້ພະລັງງານ ແຫ່ງໃໝ່ແລະ ສະອາດໃນລົດບັນທຸກຂະໜາດກາງ ລົດບັນທຸກໜັກ, ເຮືອ ແລະ ຍານພາຫະນະຂົນສົ່ງອື່ນໆ.ນອກນີ້ ສປຈີນ ຈະສົ່ງເສີມການສ້າງສັນ ນະວັດຕະກຳລະດັບອົງກອນ ໃນພາກການຂົນສົ່ງ ໃນເຂດການຄ້າເສລີ ທົດລອງ ແລະ ທ່າດ່ານການຄ້າເສລີ ຕາມເງື່ອນໄຂທີ່ອຳນວຍ ເພື່ອເສີມສ້າງຄວາມຮ່ວມມື ດ້ານການເຊື່ອມຕໍ່ ການຂົນສົ່ງກັບກຸ່ມປະເທດ ທີ່ເຂົ້າຮ່ວມ ແຜນລິເລີ່ມໜຶ່ງແລວໜຶ່ງເສັ້ນທາງ(BRI)./.
KPL
