ຂປລ
ລະດັບ ການພັດທະນາ ພະລັງງານ ສະອາດ ຂອງ ສປ ຈີນ ແມ່ນຢູ່ ໃນອັນດັບ ນຳໜ້າ ຂອງໂລກ ແລະ ມີທ່າແຮງ ໃນດ້ານເຕັກນິກ, ອຸປະກອນ ແລະ ຕົ້ນທຶນ ໃນການພັດທະນາ ພະລັງງານ ສີຂຽວ.
ຂປລ.ວິທະຍຸ ສາກົນ ແຫ່ງ ສປ ຈີນ, ລະດັບ ການພັດທະນາ ພະລັງງານ ສະອາດ ຂອງ ສປ ຈີນ ແມ່ນຢູ່ ໃນອັນດັບ ນຳໜ້າ ຂອງໂລກ ແລະ ມີທ່າແຮງ ໃນດ້ານເຕັກນິກ, ອຸປະກອນ ແລະ ຕົ້ນທຶນ ໃນການພັດທະນາ ພະລັງງານ ສີຂຽວ. ຄຽງຄູ່ກັບ ຂອບເຂດ ແລະ ຄວາມເລິກ ຂອງການຮ່ວມມື ດ້ານພະລັງງານ ສະອາດ ໄດ້ຂະຫຍາຍກວ້າງອອກ ຢ່າງບໍ່ຢຸດຢັ້ງ,ວິສາຫະກິດຈີນ ໄດ້ເຂົ້າຮ່ວມ ຂະບວນການ ພັດທະນາ ພະລັງງານ ສະອາດ ຂອງປະເທດ ສະມາຊິກ ອາຊຽນ ນັບມື້ນັບຫລາຍຂຶ້ນ. ໂດຍສະເພາະ ນັບແຕ່ຕົ້ນປີນີ້ ເປັນຕົ້ນມາ, ໂຄງການຮ່ວມມື ດ້ານພະລັງງານ ສະອາດ ລະຫວ່າງ ສປ ຈີນກັບປະເທດ ສະມາຊິກ ອາຊຽນ ໄດ້ປາກົດມີ ຈຸດເດັ່ນ ຢ່າງຫລວງຫລາຍ. ກ່ອນໜ້ານີ້, ໂຄງການເຊື່ອມຕໍ່ ພະລັງງານ ສະອາດ ພາກເໜືອ ສປປ ລາວ ໄລຍະ 1 ຂອງໂຄງການໄຟຟ້າ ພະລັງງານ ແສງຕາເວັນ ກຳລັງຕິດຕັ້ງ 1000 MW ຢູ່ແຂວງອຸດົມໄຊ ຂອງບໍລິສັດ CGN ຂອງ ສປ ຈີນ ໄດ້ລົງມື ກໍ່ສ້າງ ຢ່າງເປັນທາງການ. ໂຄງການດັ່ງກ່າວ ເປັນໂຄງການໄຟຟ້າ ພະລັງງານ ແສງຕາເວັນ ຂະໜາດໃຫຍ່ ໂຄງການທຳອິດ ຂອງ ສປປ ລາວ ໂດຍມີບໍລິສັດ CGN ຂອງ ສປ ຈີນ ຮ່ວມມືກັບ ວິສາຫະກິດລາວ ແລະ ຈີນ ຫລາຍກວ່າ 70 ແຫ່ງ ຮ່ວມມືກັນ ກໍ່ສ້າງ. ໂຄງການດັ່ງກ່າວ ຕັ້ງຢູ່ແຂວງອຸດົມໄຊ, ແຂວງຫລວງນ້ຳທາ ແລະ ແຂວງຜົ້ງສາລີ ຂອງ ສປປ ລາວ ໂດຍມີແຜນ ຈະສ້າງເປັນໂຄງການ ພະລັງງານສະອາດ ທີ່ມີພະລັງງານລົມ, ພະລັງງານ ແສງຕາເວັນ, ພະລັງງານ ຊີວະພາບ ແລະອື່ນໆ ປະສົມປະສານກັນ. ພາຍຫລັງ ສ້າງສຳເລັດ ແລະ ເປີດນຳໃຊ້ແລ້ວ ຄາດວ່າ ປະລິມານ ການຜະລິດໄຟຟ້າ ສະເລ່ຍຕໍ່ປີ ຈະມີເຖິງປະມານ 1,7 ຕື້ກິໂລວັດໂມງ, ສາມາດ ຕອບສະໜອງ ຄວາມຕ້ອງການ ໃຊ້ໄຟຟ້າຂອງ 10 ລ້ານຄອບຄົວ. ການນຳໃຊ້ ພະລັງງານ ສະອາດ ດັ່ງກ່າວ ເທົ່າກັບ ການປະຢັດ ຖ່ານຫີນ ມາດຕະຖານ ປະມານ 5 ແສນ 1 ໝື່ນໂຕນ ແລະ ຫລຸດການປ່ອຍກາກບອນ 1,4 ລ້ານໂຕນ. ໂຄງການດັ່ງກ່າວ ມີຜົນດີຕໍ່ ການຫັນປ່ຽນຮູບ ແບບພະລັງງານ ແລະ ການຍົກລະດັບຕ່ອງໂສ້ ອຸດສາຫະກຳ ຂອງ ສປປ ລາວ ແລະ ຊ່ວຍປະເທດລາວ ບັນລຸຄວາມຫວັງ ທີ່ຢາກສ້າງເປັນ “ໝໍ້ໄຟ ອາຊີ ຕາເວັນອອກ ສຽງໃຕ້”.
ໃນປະເທດໄທ, ໂຮງງານ ຜະລິດ ໄຟຟ້າ ດ້ວຍພະລັງງານ ແສງຕາເວັນໜ້ານ້ຳ ແຂວງຂອນແກ່ນ ທີ່ຮັບເໝົາກໍ່ສ້າງ ໂດຍ ສປ ຈີນ ໄດ້ເລີ່ມຜະລິດໄຟຟ້າ ໃນເດືອນມີນາປີນີ້, ກຳລັງຕິດຕັ້ງມີເຖິງ 31,2 MW, ເປັນໂຄງການ ຜະລິດໄຟຟ້າ ແບບຢ່າງໂຄງການທຳອິດ ຂອງອົງການ ພະລັງງານໄຟຟ້າໄທ ທີ່ມີໄຟຟ້າ ພະລັງງານ ແສງຕາເວັນໜ້ານ້ຳ, ໄຟຟ້າ ນ້ຳຕົກສະອາດ, ລະບົບ ສະສົມ ພະລັງງານ ທີ່ມີປະສິດທິພາບສູງ ແລະ ລະບົບຄຸ້ມຄອງ ພະລັງງານ ແບບອັດຕະໂນມັດ ລວມເຂົ້າກັນ. ໂຄງການດັ່ງກ່າວ ໄດ້ຊຸກຍູ້ ການພັດທະນາ ຂອງຕ່ອງໂສ້ ອຸດສາຫະກຳ ທີ່ກ່ຽວຂ້ອງ ຂອງທ້ອງຖິ່ນ ພ້ອມທັງ ໄດ້ສ້າງວຽກເຮັດ ງານທຳ ໃຫ້ແກ່ ປະຊາຊົນ ທ້ອງຖິ່ນ.
ສຳລັບ ອິນໂດເນເຊຍ, ໂຄງການໄຟຟ້າ ພະລັງງານ ແສງຕາເວັນ 100MW ທີ່ກາຣາວັງ ທີ່ເປັນໂຄງການ ໄຟຟ້າ ແສງຕາເວັນ ທາງບົກ ທີ່ມີຂະໜາດໃຫຍ່ ທີ່ສຸດ ຂອງອິນໂດເນເຊຍ ທີ່ຮັບເໝົາກໍ່ສ້າງ ໂດຍວິສາຫະກິດຂອງ ສປ ຈີນ ນັ້ນ ໄດ້ມອບໃຫ້ ນຳໃຊ້ ຢ່າງເປັນທາງການ ໃນເດືອນສິງຫາປີນີ້. ໂຄງການນີ້ ຕັ້ງຢູ່ແຂວງຈາວາຕາເວັນຕົກ ຂອງອິນໂດເນເຊຍ, ແຕ່ລະປີ ສາມາດ ສະໜອງພະລັງງານໄຟຟ້າ ສະອາດເຖິງ 150 ລ້ານກິໂລວັດໂມງ, ສາມາດ ຕອບສະໜອງ ຄວາມຕ້ອງການໃຊ້ໄຟຟ້າຂອງ 112.000 ຄອບຄົວ, ຫລຸດການປ່ອຍກາກບອນ ປະມານ 114.700 ໂຕນ ເຊິ່ງໄດ້ຫລຸດຕົ້ນທຶນ ພະລັງງານໄຟຟ້າ ຂອງທ້ອງຖິ່ນ. ນອກນີ້, ໂຄງການດັ່ງກ່າວ ຍັງໄດ້ສ້າງວຽກເຮັດ ງານທຳ ລາຍກວ່າ ພັນຕຳແໜ່ງ ໃຫ້ແກ່ ປະຊາຊົນທ້ອງຖິ່ນ ແລະ ໄດ້ບຳລຸງສ້າງ ກຳມະກອນ ມືອາຊີບ ຢ່າງຫລວງຫລາຍ. ການລົງເລິກ ການຮ່ວມມື ດ້ານພະລັງງານສະອາດ ໄດ້ກາຍເປັນ ຄວາມເຫັນ ທີ່ເປັນເອກະພາບກັນ ລະຫວ່າງ ສປ ຈີນ ກັບປະເທດ ສະມາຊິກ ອາຊຽນ. ອີງຕາມ ຂໍ້ມູນ ສະແດງ ໃຫ້ເຫັນວ່າ: ໃນລະຫວ່າງປີ 2000 ຫາ ປີ 2020, ການລົງທຶນ ສາທາລະນະຂອງ ສປ ຈີນ ຕໍ່ໂຄງການ ພະລັງງານ ໝູນວຽນ ຂອງອາຊຽນ ໄດ້ກວມເອົາ 60% ຂອງຍອດການລົງທຶນ ສາທາລະນະ ຈາກຕ່າງປະເທດ ທີ່ອາຊຽນໄດ້ຮັບ. ສ່ວນໂຄງການຮ່ວມມືຕ່າງໆ ລະຫວ່າງ ສປ ຈີນ ກັບປະເທດສະມາຊິກ ອາຊຽນ ໃນດ້ານພະລັງງານສະອາດ ກໍໄດ້ປະສົບ ຜົນສຳເລັດແລ້ວ, ໂຄງການ ສະສົມພະລັງງານເກາະ ຈູຣອງ (Jurong Island) ສິງກະໂປ, ໂຄງການໄຟຟ້າ ພະລັງງານ ແສງຕາເວັນ ໜ້ານ້ຳ ເຂື່ອນສິຣິນທອນ ຂອງໄທ ແລະ ໂຄງການອື່ນໆ ໄດ້ກາຍເປັນສັນຍາລັກ ແຫ່ງການຮ່ວມມື ລະຫວ່າງ ສປ ຈີນ ກັບອາຊຽນ ໃນດ້ານພະລັງງານ ສະອາດ. ໃນອະນາຄົດ, ສປ ຈີນ ແລະ ບັນດາປະເທດ ສະມາຊິກ ອາຊຽນ ຍັງຈະສືບຕໍ່ ລົງເລິກ ການຮ່ວມມື ດ້ານພະລັງງານ ສະອາດ, ຊຸກຍູ້ ການຫັນປ່ຽນ ຮູບແບບ ພະລັງງານ ແລະ ການພັດທະນາ ແບບຍືນຍົງ, ຮ່ວມມືກັນ ເດີນຕາມທິດທາງ ສີຂຽວ, ກາກບອນຕ່ຳ ແລະ ມີຄຸນນະພາບ ສູງກວ່າເກົ່າ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
