ຂປລ. ກອງປະຊຸມສຸດຍອດອາຊຽນ-ສະຫະລັດ ອາເມລິກາ ຄັ້ງທີ 12 ຈັດຂຶ້ນໃນວັນທີ 11 ກັນຍາ 2024, ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໂດຍມີບັນດາຜູ້ນໍາອາຊຽນ ແລະ ທ່ານ ແອນໂທນີ ບລິງເກັນ ລັດຖະມົນຕີການຕ່າງປະເທດ ສະຫະລັດ ອາເມລິກາ, ມີນາຍົກລັດຖະ ມົນຕີ ຕີມໍແລັດສະເຕ ເຂົ້າຮ່ວມ ໃນນາມຜູ້ສັງເກດການ ເພື່ອໄດ້ທົບທວນຄືນ ແລະ ກໍານົດທິດທາງ ໃນການຜັນຂະຫຍາຍ ການເປັນຄູ່ຮ່ວມຍຸດທະສາດຮອບດ້ານ ອາຊຽນ-ສະຫະລັດ ໂດຍສຸມໃສ່ການ ຈັດຕັ້ງປະຕິບັດ ບັນດາໂຄງ ການຮ່ວມມືທີ່ອາຊຽນ ແລະ ສະຫະລັດ ອາເມລິກາ ມີຮ່ວມກັນ ເພື່ອນໍາຜົນປະໂຫຍດຕົວຈິງ ມາຍັງປະຊາຊົນຂອງສອງພາກພື້ນ.

ໃນກອງປະຊຸມ, ສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມື ອາຊຽນ-ສະຫະລັດອາເມລິກາ ຕະຫລອດໄລຍະ 47 ປີຜ່ານມາ ທີ່ໄດ້ຮັບການເສີມຂະຫຍາຍ ກວມເອົາການຮ່ວມມື ດ້ານການເມືອງ-ຄວາມໝັ້ນຄົງ, ດ້ານເສດຖະກິດ ແລະ ວັດທະນະທໍາ-ສັງຄົມ ອັນໄດ້ສະທ້ອນໃຫ້ເຫັນ ໝາກຜົນຂອງການຮ່ວມມື ໃນໄລຍະຜ່ານມາ ແລະ ທ່າແຮງຂອງການຮ່ວມມືກັນ ໃນອະນາຄົດ ເພື່ອສືບຕໍ່ປະກອບສ່ວນ ເຂົ້າໃນຂະບວນການ ສ້າງປະຊາຄົມອາຊຽນ ກໍຄື ການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມື.

ສໍາລັບທິດທາງການຮ່ວມມືໃນຕໍ່ໜ້າ, ສປປ ລາວ ໄດ້ຊຸກຍູ້ໃຫ້ ສະຫະລັດອາເມລິກາ ສືບສະໜັບສະໜູນ ອາຊຽນໃນຂົງເຂດທີ່ສໍາຄັນ ເປັນຕົ້ນ ການຄ້າ-ການລົງທຶນ, ສາທະລະນະສຸກ, ພະລັງງານສະອາດ, ການພັດທະນາຊັບພະຍາກອນມະນຸດ ໂດຍຜ່ານການແລກປ່ຽນດ້ານການສຶກສາ ແລະ ວັດທະນາທໍາ, ການສະໜອງທຶນຝຶກອົບຮົມໃນໄລຍະສັ້ນ, ໄລຍະຍາວ ແລະ ການສົ່ງເສີມໂຄງການດ້ານ ການທະນາດ້ານສີມືແຮງງານ ໃນຂະແໜງການເຕັກໂນໂລຊີທີ່ທັນສະໄໝ, ດ້ານນະວັດຕະກໍາ ກໍຄື ປັນຍາປະດິດ ແລະ ດ້ານອື່ນໆ.

ໂອກາດນີ້, ກອງປະຊຸມສຸດຍອດ ອາຊຽນ-ສະຫະລັດອາເມລິກາ ໄດ້ຮັບຮອງເອົາຖະແຫລງການຜູ້ນໍາອາ ຊຽນ-ສະຫະລັດ ວ່າດ້ວຍ ປັນຍາປະດິດທີ່ປອດໄພ, ໝັ້ນຄົງ ແລະ ເຊື່ອຖືໄດ້.

ສະຫະລັດ ອາເມລິກາ ເປັນຄູ່ເຈລະຈາທີ່ສໍາຄັນຂອງອາຊຽນ ທີ່ມີການຮ່ວມມືອັນຍາວນານ, ອາຊຽນ ແລະ ສະຫະລັດ ອາເມລິກາ ໄດ້ສ້າງຕັ້ງສາຍພົວພັນ ໃນປີ 1977, ໄດ້ຍົກລະດັບເປັນຄູ່ ຮ່ວມຍຸດທະສາດ ໃນປີ 2015 ແລະ ເປັນຄູ່ຮ່ວມຍຸດທະສາດຮອບດ້ານ ໃນປີ 2022.

KPL