ຂປລ. ເມື່ອບໍ່ດົນມານີ້, ສະຫະພາບເອີຣົບ ແລະ ອົງການອຸຍນີເຊັບ ໄດ້ມອບອຸປະກອນ ໄອຊີທີ (ICT) ມູນຄ່າທັງໝົດ 670.000 ໂດລາສະຫະລັດ ໃຫ້ກະຊວງສຶກສາທິການ ແລະ ກິລາ ເພື່ອເປັນການສະໜັບສະໜູນ ຍຸດທະສາດ ດີຈິຕອນ ສຳລັບການສຶກສາ ຂອງກະຊວງ ແລະ ປະກອບສ່ວນເຂົ້າຕໍ່ການສົ່ງເສີມການຫັນປ່ຽນ ທາງ ດ້ານດີຈິຕອນ ໃນລະ​ບົບ​ການ​ສຶກ​ສາ ​ແລະ ການຮຽນການສອນໃນປະເທດ.​ ໃນນັ້ນ, ປະກອບມີ: ຄອມພິວເຕີຕັ້ງ ໂຕະ, ແລັບທັອບ, ເຄື່ອງສະແກນ, ອຸປະກອນສຳລັບການຈັດປະຊຸມທາງໄກ ແລະ ແທັບເລັດ ເຊິ່ງທັງໝົດນັ້ນ ເປັນການສະແດງໃຫ້ເຫັນເຖິງ ຄວາມມຸ່ງໝັ້ນຮ່ວມກັນ ລະຫວ່າງ ກະຊວງສຶກສາທິການ ແລະ ກິລາ, ສະຫະພາບເອີ ຣົບ ແລະ ອົງການອຸຍນີເຊັບ ຕໍ່ການປັບປຸງການສຶກສາ ພາຍໃຕ້ແຜນງານການຮ່ວມມື ເພື່ອສ້າງຄວາມເຂັ້ມແຂງໃຫ້ ລະບົບການສຶກສາ ໃນ ສປປ ລາວ (PSES).

ໂອກາດນີ້, ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ເນັ້ນໜັກເຖິງຜົນ ສຳເລັດ ຂອງການຮ່ວມມືພາຍໃຕ້ແຜນງານດັ່ງກ່າວ ວ່າ: ກະຊວງສຶກສາທິການ ແລະ ກິລາ ຕີລາຄາສູງຕໍ່ການຮ່ວມມື ດັ່ງກ່າວ ເຊິ່ງມີຄວາມສຳຄັນຫລາຍຕໍ່ການປັບປຸງ ລະບົບການສຶກສາຂອງປະເທດພວກເຮົາ ໂດຍນຳໃຊ້ນະວັດຕະກໍາ ດ້ານເຕັກໂນໂລຊີ ແລະ ສ້າງຄວາມເຂັ້ມແຂງໃຫ້ແກ່ຍຸດທະສາດ ດີຈິຕອນ ສຳລັບການສຶກສາ. ຍຸດທະສາດດັ່ງກ່າວ, ຢູ່ໃນຂັ້ນຕອນສຸດທ້າຍຂອງການພັດທະນາ, ໄດ້ຖືກສ້າງຂຶ້ນ ໂດຍໄດ້ຮັບການສະໜັບສະໜູນຈາກ ແຜນງານການ ຮ່ວມມື PSES ເຊິ່ງໄດ້ສະໜອງວິໄສທັດ ໃນການເສີມສ້າງຄວາມເຂັ້ມແຂງ ທາງດ້ານການສຶກສາ, ທັກສະດ້ານ ດີຈິຕອນ ແລະ ລະບົບຂໍ້ມູນຂ່າວສານ ແລະ ການຮຽນຮູ້ ໃນທົ່ວ ສປປ ລາວ.

ທ່ານ ນາງ ອີນາ ມາຈູລໍນີແຕ ເອກອັກຄະລັດຖະທູດ ສະຫະພາບເອີຣົບ ປະຈຳ ສປປ ລາວ, ກໍໄດ້ເນັ້ນໜັກ ເຖິງຄຳໝັ້ນສັນຍາຂອງ ສະຫະພາບເອີຣົບ ຕໍ່ກັບການຊຸກຍູ້ວຽກງານສຶກສາ ໂດຍຜ່ານການຮ່ວມມືກັນຢ່າງໃກ້ຊິດ ວ່າ: "ສະຫະພາບເອີຣົບ ເຫັນເຖິງຄວາມສຳຄັນ ໃນການເສີມສ້າງຄວາມເຂັ້ມແຂງ ຂອງຂະແໜງການສຶກສາ ໃນ ສປປ ລາວ ເປັນບູລິມະສິດ ແລະ ພວກເຮົາຍິນດີ ທີ່ຈະລົງທຶນໃນວຽກງານນີ້ ແລະ ສະໜັບສະໜູນ ກະຊວງສຶກ ສາທິການ ແລະ ກິລາ ຕໍ່ກັບຄວາມພະຍາຍາມ ໃນການປັບປຸງການສຶກສາ ໃນ ສປປ ລາວ. ອຸປະກອນ ICT ທີ່ໄດ້ມອບນັ້ນ ຈະຊຸກຍູ້ຄວາມສາມາດ ໃນການຈັດຕັ້ງປະຕິບັດຍຸດທະສາດ ດີຈິຕອນ ສຳລັບການສຶກສາ ຂອງກະ ຊວງ ເພື່ອຮັບປະກັນ ​ການສະໜອງ​ສຶກສາທີ່ດີ ​ໃຫ້​ແກ່​ເດັກນ້ອຍ​ລາວ​ທຸກ​ຄົນ.

ພ້ອມນີ້, ທ່ານ ນາງ ເພຍ ເຣເບລໂລ ບຣິດໂຕ ຜູ້ຕາງໜ້າ ອົງການອຸຍເຊັບ ປະຈຳ ສປປ ລາວ ກໍໄດ້ຍົກ ໃຫ້ເຫັນເຖິງບົດບາດຂອງເຕັກໂນໂລຊີ ໃນການບັນລຸຄວາມສະເໝີພາບ ໃນການເຂົ້າເຖິງການສຶກສາ. “ຜົນສຳເລັດ ຂອງ ຄັງປັນຍາລາວ ໄດ້ສະແດງໃຫ້ເຫັນຢ່າງຈະແຈ້ງ ເຖິງພະລັງແຫ່ງການຮ່ວມມື ແລະ ເຕັກໂນໂລຊີ ໃນການນຳໃຊ້ຄຸນປະໂຫຍດ ຂອງວິທະຍາສາດໃນການຮຽນຮູ້, ນັບແຕ່ຊັ້ນປະຖົມ ຈົນຮອດມັດທະຍົມສຶກສາ. ອົງການອຸຍນີເຊັບ ມີຄວາມພູມໃຈທີ່ໄດ້ເປັນສ່ວນໜຶ່ງ ຂອງການຫັນປ່ຽນດ້ານການສຶກສາ ໃນ ສປປ ລາວ ເຊິ່ງມີທ່າແຮງເພື່ອຮັບ ປະກັນວ່າ ເດັກນ້ອຍທຸກຄົນຈະສາມາດຮຽນຮູ້ ແລະ ຈະເລີນເຕີບໂຕໄດ້ຢ່າງເຕັມທີ່.

KPL