ຂປລ
ອັງກາລາ(Ankara) ແລະ ປະເທດ ສປປ ລາວ ໄດ້ສ້າງຕັ້ງສາຍພົວພັນ ທາງການທູດຮ່ວມກັນໃນວັນທີ 20.06.1958 ເປັນຕົ້ນມາ, ຫລັງຈາກນັ້ນ ທັງສອງປະເທດ ໄດ້ພ້ອມກັນເສີມສ້າງ ສາຍພົວພັນ ແລະ ຮ່ວມມືກັນ ພັດທະນາໃຫ້ນັບມື້ແໜ້ນແຟ້ນ ແລະ ແຕກດອກອອກຜົນຍິ່ງໆຂື້ນ.
ປະເທດ ຕວັກກີ(Turkey) ຫລື ຊື່ທາງການວ່າ ສາທາລະນະລັດ ຕວັກກີ(Republic of Turkey) ມີນະຄອນຫລວງຊື່ວ່າ: ອັງກາລາ(Ankara) ແລະ ປະເທດ ສປປ ລາວ ໄດ້ສ້າງຕັ້ງສາຍພົວພັນ ທາງການທູດຮ່ວມກັນໃນວັນທີ 20.06.1958 ເປັນຕົ້ນມາ, ຫລັງຈາກນັ້ນ ທັງສອງປະເທດ ໄດ້ພ້ອມກັນເສີມສ້າງ ສາຍພົວພັນ ແລະ ຮ່ວມມືກັນ ພັດທະນາໃຫ້ນັບມື້ແໜ້ນແຟ້ນ ແລະ ແຕກດອກອອກຜົນຍິ່ງໆຂື້ນ. ຕວັກກີ ເປັນປະເທດ ສອງທະວີບ ຢູ່ໃນອາຊີ ແລະ ເອີຣົບ, ມີຊາຍແດນ ທິດຕາເວັນອອກ ຕິດກັບ ຊອກຊີ, ອາກເມນີ, ອາແຊກໄບຊານ ແລະ ອີຣານ; ທິດໃຕ້ຕິດກັບ ອີຣັກ, ຊີຣີ ແລະ ທະເລເມດີເຕເຣເນຍ; ທິດຕາເວັນຕົກ ຕິດກັບ ເກຣັກ, ບູນກາລີ ແລະ ທະເລແອຈຽນ; ທິດເໜືອຕິດກັບທະເລດຳ. ມີເນື້ອທີ່ທັງໝົດ 780.580 ກິໂລຕາແມັດ, ປະຊາກອນຫລາຍກວ່າ 85 ລ້ານຄົນ(ໃນປີ 2023), ໃຊ້ພາສາ ຕວັກກີ ເປັນພາສາທາງການ, ປະຊາຊົນສ່ວນໃຫຍ່ ຖືສາສະໜາ ມຸສລິມ 99,8% ແລະ ສາສະໜາອື່ນໆ 0,2%; ໃຊ້ສະກຸນເງິນ ຕວັກກີໄລຣາ (Turkish Lira). ສ່ວນວັນຊາດແມ່ນ ວັນທີ 29.10. 1923.
ເສດຖະກິດຕວັກກີ ໄດ້ມີການປະຕິຮູບຫລາຍດ້ານ ສົ່ງຜົນໃຫ້ ຈະເລີນເຕີບໃຫຍ່ຂຶ້ນ ຢາງວ່ອງໄວ ເປັນຕົ້ນແມ່ນ ລາຍໄດ້ ຈາກການຜະລິດ ເພື່ອສົ່ງອອກ ແລະ ການທ່ອງທ່ຽວ ເປັນຫລັກ, ໂດຍໃຫ້ຄວາມສຳຄັນ ກັບຕະຫລາດຕ່າງ ປະເທດ , ການພັດທະນາ ພື້ນຖານໂຄງລ່າງ ດ້ານສຸຂະພາບ, ການພັດທະນາຕະຫລາດ ແລະ ຜະລິດຕະພັນ ໃຫ້ເປັນທີ່ຍອມຮັບ ຂອງຕະຫລາດ ຕ່າງປະເທດ ແລະ ສ້າງຄວາມເຊື່ອໝັ້ນ ເພື່ອດຶງດູດນັກລົງທຶນ ຈາກຕ່າງປະເທດອື່ນໆ. ເຮັດໃຫ້ລວມຍອດ ຜະລິດຕະພັນ ພາຍໃນປະເທດ(GDP) ບັນລຸ 905.987 ລ້ານໂດລາສະຫະລັດ(ໃນປີ2022); ສະເລ່ຍຕໍ່ຫົວຄົນ 10 ກວ່າໂດລາ ສະຫະລັດຕໍ່ປີ; ອັດຕາການເຕີບໂຕ ດ້ານເສດຖະກິດ 5,6% ຕໍ່ປີ. ມູນຄ່າການສົ່ງອອກ ສິນຄ້າ 254.172 ລ້ານໂດລາສະຫະລັດ ເປັນຕົ້ນປະເພດ ຊິ້ນສ່ວນຍານພາຫະນະ, ເສື້ອຜ້າ ແລະ ແຜ່ນແພ, ຜະລິດຕະພັນເຫລັກທີ່ໃຊ້ ໃນອຸດສາຫະກຳ ແລະ ອຸປະກອນ ການຂົນສົ່ງ. ສ່ວນມູນຄ່າ ການນຳເຂົ້າ ບັນລຸ 363.711 ລ້ານໂດລາສະຫະລັດ ເຊັ່ນ: ເຄື່ອງກົນຈັກ, ຜະລິດຕະພັນເຄມີ, ນ້ຳມັນເຊື້ອໄຟ ແລະ ແກັສທຳມະຊາດ ອື່ນໆ. ສ່ວນປະເທດ ຄູ່ການຄ້າສຳຄັນ: ເຢຍລະມັນ, ອີຣັກ, ອັງກິດ, ອິຕາລີ,. ຝຣັ່ງ, ແອັດສະປາຍ, ໂຮນລັງ, ອິດສະຣາແອນ ແລະ ຣັດເຊຍ ຕາມລຳດັບ.
ນອກນີ້ ຍັງມີສະຖານທີ່ ທ່ອງທ່ຽວສວຍງາມ ຫລາຍແຫ່ງ ເປັນຕົ້ນ: ພະຣາຊະວັງ ທອບກາປິ; ພິພິດຕະພັນ ກາງແຈ້ງ ເກີເຣເມ (Goreme Museum) ເປັນພິພິທະພັນ ກາງແຈ້ງ ທີ່ມີໂບສ, ຖໍ້າຕັ້ງລຽນກັນຊ້າຍລ້າຍ ຢູ່ຫລາຍແຫ່ງ, ຊຶ່ງໂບສທີ່ເປັນຖໍ້າ ທາງໃນລວມມີເຖິງ 365 ແຫ່ງ ເຕັມໄປດ້ວຍພາບ ຂຽນສີ ເຕັມຝາ ແລະ ເພດານ ແລະ ແຫ່ງອຶ່ນໆ./.
ໂດຍ: ດາວັນ
KPL
