ຂປລ
ເວທີປາໄສ ອະນາຄົດ ອາຊຽນ - ສປ ຈີນ ຈັດຂຶ້ນ ໃນວັນທີ 19 ມິຖຸນາ, ຢູ່ນະຄອນຫລວງ ຈາກາກຕາ ຂອງ ອິນໂດເນເຊຍ, ດ້ວຍຫົວຂໍ້ “ມຸ່ງໄປເຖິງ ການພົວພັນ ຄູ່ຮ່ວມມື ຍຸດທະສາດ ຮອບດ້ານ ຢ່າງແທດຈິງກວ່າ”
ຂປລ.ວິທະຍຸ ກະຈາຍສຽງ ແຫ່ງຊາດ ຫວຽດນາມ, ເວທີປາໄສ ອະນາຄົດ ອາຊຽນ-ສປ ຈີນ ຈັດຂຶ້ນ ໃນວັນທີ 19 ມິຖຸນາ, ຢູ່ນະຄອນຫລວງ ຈາກາກຕາ ຂອງ ອິນໂດເນເຊຍ, ດ້ວຍຫົວຂໍ້ “ມຸ່ງໄປເຖິງ ການພົວພັນ ຄູ່ຮ່ວມມື ຍຸດທະສາດ ຮອບດ້ານ ຢ່າງແທດຈິງກວ່າ”, ເວທີປາໄສມີ 3 ວາລະປະຊຸມ. ໂດຍບັນດາ ຜູ້ແທນ ໄດ້ແບ່ງປັນ ບາດກ້າວ ພັດທະນາໃຫຍ່ ໃນການ ພົວພັນ ລະຫວ່າງ ອາຊຽນ - ສປ ຈີນ ໃນໄລຍະຜ່ານມາ ເນັ້ນໜັກວ່າ: ນີ້ແມ່ນໜຶ່ງ ໃນບັນດາ ການພົວພັນ ຄູ່ຮ່ວມມື ສຳຄັນທີ່ສຸດ ຢູ່ພາກພື້ນ. ສິ່ງທີ່ໜ້າສົນໃຈ ໃນຂົງເຂດ ເສດຖະກິດ, ການຄ້າ, ປີ 2023, ສປ ຈີນ ຍັງແມ່ນຄູ່ຄ້າໃຫຍ່ ທີ່ສຸດຂອງ ອາຊຽນ, ດ້ວຍຍອດ ວົງເງິນ ການຄ້າ ສິນຄ້າ ລະຫວ່າງ ອາຊຽນ ແລະ ສປ ຈີນ ບັນລຸກວ່າ 702 ຕື້ໂດລາ ສະຫະລັດ. ກ່ຽວກັບ ບັນຫາ ທະເລຈີນໃຕ້, ທ່ານ ກາວຄິມ ຮອນ(Kao Kim Hourn), ເລຂາທິການໃຫຍ່ ອາຊຽນ ຖືວ່າ: ນີ້ແມ່ນບັນຫາ ຮີບດ່ວນ ຕ້ອງມີການ ສົມທົບກັນ ຢ່າງແໜ້ນແຟ້ນ. ບັນດາ ຝ່າຍ ຕ້ອງສືບຕໍ່ ເຂົ້າຮ່ວມ ການໂອ້ລົມ ສົນທະນາ ທີ່ມີລັກສະນະ ສ້າງສັນ ແລະ ເຄົາລົບ ກົດໝາຍ ສາກົນ, ພິເສດ ແມ່ນສົນທິ ສັນຍາ ສະຫະ ປະຊາຊາດ ກ່ຽວກັບ ກົດໝາຍ ວ່າດ້ວຍ ທະເລປີ 1982 (UNCLOS)./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
