ຂປລ. ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 13 ມິຖຸນາ 2024 ໂດຍການເປັນ ປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ ໄດ້ຊີ້ແຈ້ງຄຳຊັກຖາມ ຂອງສະພາແຫ່ງຊາດ ກ່ຽວກັບການແກ້ໄຂບັນຫາ ເຄັ່ງຮ້ອນທາງດ້ານເສດຖະກິດ ແລະ ບັນຫາເງິນເຟີ້, ການຄ້າ-ການລົງທຶນ ແລະ ບັນຫາອື່ນໆ. ເພື່ອເຮັດໃຫ້ເສດຖະກິດຂະຫຍາຍຕົວດຸນດ່ຽງ ກັບອັດຕາເງິນເຟີ້ ລັດຖະບານ ຈະສຸມໃສ່ແກ້ໄຂບັນ ຫາທັງສອງດ້ານໄປພ້ອມກັນຄື: ຊຸກຍູ້ພາກການລົງທຶນ ແລະ ການຜະລິດໃຫ້ຫລາຍຂຶ້ນ ເພື່ອສົ່ງເສີມການຜະລິດ ພາຍໃນໃຫ້ແຂງແຮງຂຶ້ນຕື່ມ ແລະ ການແກ້ໄຂບັນຫາເງິນເຟີ້ ແລະ ການອ່ອນຄ່າຂອງເງິນກີບ.

ຕໍ່ກັບຄຳຊັກຖາມດັ່ງກ່າວ, ທ່ານ ເພັດ ພົມພິພັກ ໄດ້ກ່າວວ່າ: ປັດຈຸບັນ, ເສດຖະກິດຍັງສືບຕໍ່ມີການຂະຫຍາຍຕົວຢ່າງຕໍ່ເນື່ອງ ເນື່ອງຈາກບັນດາຂະແໜງການ ຍັງສືບຕໍ່ດໍາເນີນການຜະລິດ ໄດ້ຢ່າງເປັນປົກກະຕິ ແຕ່ການພັດທະນາໂດຍລວມ ແມ່ນຍັງຜະເຊີນໜ້າກັບ ສິ່ງທ້າທາຍຫລາຍດ້ານ ໂດຍສະເພາະ ການເໜັງຕີງຂອງອັດຕາເງິນເຟີ້ ກໍຄື ຄ່າຄອງຊີບທີ່ສູງຂຶ້ນ ທີ່ໄດ້ສົ່ງຜົນກະທົບທັງທາງກົງ ແລະ ທາງອ້ອມຕໍ່ການ ດຳລົງຊີວິດຂອງປະຊາຊົນ. ສະນັ້ນ, ເພື່ອເຮັດໃຫ້ເສດຖະກິດຂະຫຍາຍຕົວດຸນດ່ຽງ ກັບອັດຕາເງິນເຟີ້ ລັດຖະບານ ຈະສຸມໃສ່ແກ້ໄຂບັນຫາ ທັງສອງດ້ານໄປພ້ອມກັນຄື: ຊຸກຍູ້ພາກການລົງທຶນ ແລະ ການຜະລິດໃຫ້ຫລາຍຂຶ້ນ ເພື່ອສົ່ງເສີມການຜະລິດພາຍໃນ ໃຫ້ແຂງແຮງຂຶ້ນຕື່ມ ແລະ ການແກ້ໄຂບັນຫາເງິນເຟີ້ ແລະ ການອ່ອນຄ່າຂອງເງິນກີບ. ເພື່ອຮັບປະກັນໃຫ້ເສດຖະກິດ ມີການຂະຫຍາຍຕົວ ບັນລຸຄາດໝາຍຕາມແຜນການທີ່ວາງໄວ້ ໃນ 6 ເດືອນທ້າຍປີ 2024 ຈະເລັ່ງໃສ່ຈັດຕັ້ງຜັນຂະຫຍາຍ ມະຕິ 04/ກມສພ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ໃຫ້ເປັນອັນ ລະອຽດ ເພື່ອຈັດຕັ້ງປະຕິບັດ ໃຫ້ເຫັນຜົນໂດຍໄວ; ຄຸ້ມຄອງອັດຕາເງິນເຟີ້ ແລະ ອັດຕາແລກປ່ຽນ ບໍ່ໃຫ້ມີການເໜັງຕີງແຮງ ໂດຍສະເພາະ ມີມາດຕະການຄວບຄຸມ ລາຄາສິນຄ້າທີ່ຊັດເຈນ ແລະ ສາມາດຈັດຕັ້ງ ປະຕິບັດໄດ້ ເພື່ອຮັບປະກັນກຳລັງແຮງຊື້ ແລະ ຕົ້ນທຶນການຜະລິດ ບໍ່ໃຫ້ຖືກກະທົບແຮງ; ຈັດຕັ້ງປະຕິ ບັດດຳລັດວ່າດ້ວຍການປະຢັດ ແລະ ຕ້ານການຟຸມເຟືອຍ ເລກທີ 205/ລບ ຢ່າງເຂັ້ມງວດ ເພື່ອສ້າງທ່າແຮງໃຫ້ ການສະສົມແຫ່ງລັດເພີ່ມຂຶ້ນ; ສຸມທຶນໃສ່ໂຄງການທີ່ມີທ່າແຮງ ແລະ ໃຫ້ຜົນຕອບແທນໄວ ເປັນຕົ້ນ ໂຄງການຜະລິດສິນຄ້າ ແລະ ບໍລິການ, ສ້າງວຽກເຮັດງານທຳ ໂດຍສະເພາະ ຂະແໜງການທ່ອງທ່ຽວ, ຂົນສົ່ງ, ອຸດສາຫະກໍາປຸງແຕ່ງ; ອອກມາດຕະການແຊກແຊງຮີບດ່ວນ ເພື່ອແກ້ໄຂບັນຫາແຮງງານຂາດແຄນ  ​ໂດຍປະສານສົມທົບກັບ ພາກສ່ວນທີ່ກ່ຽວຂ້ອງເຜີຍເເຜ່ ແລະ ສະໜອງຂໍ້ມູນ ການຈັດຫາງານທັງພາຍໃນ ແລະ ຕ່າງປະເທດ, ຄຽງຄູ່ກັບການອຳນວຍຄວາມສະດວກ ແລະ ກຳນົດຄ່າທຳນຽມທີ່ເໝາະສົມ ໃນການໂອນເງິນກັບປະເທດ; ຍູ້ແຮງການເກັບລາຍຮັບງົບປະມານ ໃຫ້ໄດ້ຕາມແຜນ ຫລື ເກີນແຜນ ເພື່ອມີທຶນຮອນ ມາຈັດຕັ້ງປະຕິບັດໂຄງການ ລົງທຶນຂອງລັດທີ່ນອນໃນແຜນແລ້ວ ແລະ ວຽກງານອື່ນໆ ທີ່ຈຳເປັນຂອງລັດຖະບານ; ຊຸກຍູ້ໂຄງການຊ່ວຍເຫລືອ ທາງການ ເພື່ອການພັດທະນາ ແລະ ໂຄງການລົງທຶນຂອງພາກເອກະຊົນ ໃຫ້ຈັດຕັ້ງປະຕິບັດ ໄດ້ຕາມແຜນການ. ຜ່ານການຈັດຕັ້ງປະຕິບັດວຽກງານຈຸດສຸມຂ້າງເທິງນັ້ນ, ຄາດວ່າ ໃນປີ 2024 ຈະສາມາດບັນລຸຄາດໝາຍ ການຂະຫຍາຍຕົວຂອງ GDP ໄດ້ 4,5%.

ທ່ານ ເພັດ ພົມພິພັກ ຍັງໃຫ້ຮູ້ອີກວ່າ: ເພື່ອຕອບສະໜອງຄວາມຮຽກຮ້ອງຕ້ອງການ ໃນການພັດທະນາເສດຖະກິດ-ສັງຄົມ ໃນໄລຍະໃໝ່, ກະຊວງແຜນການ ແລະ ການລົງທຶນ ໄດ້ມີຄວາມພະ ຍາຍາມໃນການປັບປຸງສະພາບແວດລ້ອມທີ່ເອື້ອອຳນວຍ ໃຫ້ແກ່ການສົ່ງເສີມການລົງທຶນພາຍໃນ ແລະ ຕ່າງປະເທດ ໃນດ້ານຕ່າງໆ ​ເປັຍ​ຕົ້ນ ໄດ້ປັບປຸງ ແລະ ສ້າງນິຕິກຳຕ່າງໆ ທີ່ຈຳເປັນຈຳນວນໜຶ່ງ ເຊັ່ນ: ກຳລັງດຳເນີນການປັບປຸງກົດໝາຍ ວ່າດ້ວຍ ການສົ່ງເສີມການລົງທຶນ ທີ່ໄດ້ເນັ້ນໃສ່ສ້າງກົນໄກ ການພິຈາລະນາ ການອະນຸມັດການລົງທຶນ ໃຫ້ມີຄວາມກະທັດຮັດ, ວ່ອງໄວ ແລະ ໂປ່ງໃສ, ແບ່ງຄວາມຮັບຜິດຊອບ ໃຫ້ທ້ອງຖິ່ນ ໃນການພິຈາລະນາອະນຸມັດການລົງທຶນ ແລະ ຕິດຕາມກວດກາ ໂຄງການໃຫ້ຫລາຍຂຶ້ນ ຕາມທິດ 3 ສ້າງ, ການໂຮມເອົາວຽກງານການສົ່ງເສີມ ແລະ ຄຸ້ມຄອງການລົງທຶນ ໃນເຂດເສດ ຖະກິດພິເສດ ເຂົ້າໃນກົດໝາຍວ່າດ້ວຍ ສົ່ງເສີມການລງທຶນ; ການຄຸ້ມຄອງ ແລະ ຕິດຕາມກວດກາ  ແລະ ປະເມີນຜົນບັນດາໂຄງການ ທີ່ໄດ້ຮັບອະນຸຍາດແລ້ວ ໂດຍສະເພາະແມ່ນ ໂຄງການແຮ່ທາດ ແລະ ໂຄງການພະລັງງານ ເພື່ອກະຕຸກຊຸກຍູ້ ໃຫ້ບັນດາໂຄງການເຫລົ່ານັ້ນ ດໍາເນີນໄປຕາມແຜນບົດວິພາກເສດ ຖະກິດ-ເຕັກນິກ, ແຜນຄຸ້ມຄອງສິ່ງແວດລ້ອມ-ສັງຄົມ, ປະຕິບັດພັນທະ ຄົບຖ້ວນ ຕາມສັນຍາ ແລະ ສອດຄ່ອງກັບລະບຽບກົດໝາຍ; ການບໍລິການລົງທຶນປະຕູດຽວ ແລະ ນະໂຍບາຍສົ່ງເສີມການລົງທຶນ ຈະສະໜອງການບໍລິການ ດ້ານການລົງທຶນໃຫ້ມີຄວາມວ່ອງໄວ ແລະ ໂປ່ງໃສ ໂດຍການຫັນເປັນ ລະບົບທັນສະໄໝ ໃນການຮັບຮ້ອງຂໍລົງທຶນ ແລະ ຕິດຕາມເອກະສານ ທາງອອນລາຍ ໂດຍມີການເຊື່ອມຕໍ່ ກັບຂະແໜງການກ່ຽວຂ້ອງ.

ຂ່າວ: ກິດຕາ

ພາບ: ເກດສະໜາ

KPL