*ແຂວງຜົ້ງສາລີ ຕັ້ງຢູ່ “ເໜືອສຸດໃນປະເທດລາວ” ມີປະຊາກອນ ປະມານ 2 ແສນກວ່າ ເຊິ່ງມີຊາຍແດນຕິດກັບປະເທດຈີນ ແລະ ຫວຽດນາມ.ພູຟ້າແມ່ນມິ່ງຂວັນຂອງຊາວ ແຂວງຜົ້ງສາລີ ເປັນພູທີ່ສວຍສົດງົດງາມ, ຕັ້ງຢູ່ຕາເວັນອອກສ່ຽງເໜືອ ຂອງຕົວເມືອງຜົ້ງສາລີ; ພູຟ້າມີຄວາມສູງ 1,625 ແມັດ ທຽບຈາກໜ້ານ້ຳທະເລ, ມີຂັ້ນໄດຂຶ້ນ 863  ຂັ້ນ ແລະ ມີເນື້ອທີ່ທັງໜົດ 200 ເຮັກຕາ.

      ດັ່ງທີ່ຮູ້ນໍາກັນແຂວງຜົ້ງສາລີ ເປັນແຜ່ນດິນທີ່ຂຽວສົດງົດງາມເຊິ່ງເປັນຖິ່ນກຳເນີດຂອງຊາຂຽວ, ຊາ 400 ປີ ແລະ ເຫລົ້າຂຽວທີ່ລືຊື່. ຊາຂຽວ 400 ປີ ແມ່ນເກີດຂຶ້ນຢູ່ບ້ານກໍແມນ ເຊິ່ງບ້ານດັ່ງກ່າວນີ້ ເປັນບ້ານໜຶ່ງທີ່ຂຶ້ນກັບເທສະບານເມືອງຜ້ົງສາລີ, ເປັນບ້ານທ່ີມີປະຫວັດການປູກຊາລ້ຽງຊີບມາແຕດຶກດຳບັນ, ເມື່ອກ່ອນບ້ານມີຊື່ວ່າ “ບ້ານລຸງຈິງ” ຕາມການເລົ່າ ຂອງຄົນເຖົ້າອາວຸໂສຂອງບ້ານໃຫ້ຮູ້ວ່າ ບ້ານກໍແມນ ນັບແຕ່ມື້ສ້າງຕັ້ງມາຮອດປັດຈຸບັນໄດ້ 7 ຮຸ່ນຄົນແລ້ວ ພ້ອມທັງສະເລ່ຍໃສ່ກົກຊາທີ່ປູກ ພ້ອມກັບການສ້າງຕັ້ງບ້ານ ແມ່ນມີອາຍຸປະມານ 400 ກວ່າປີແລ້ວ. ນອກນ້ີຍັງມີສວນຊາບ້ານຫລັກ 4 ເປັນສວນຊາທີ່ມີຄວາມສວຍງາມ ແລະ ມີເນື້ອທີ່ທັງໝົດ 22 ເຮັກຕາ.ຫລ້າສຸດແຂວງຜົ້ງສາລີ ໄດ້ປະກາດວ່າຈະຈັດເທສະການອາຫານຊົນຜົ່າ ແລະ ດື່ມນ້ຳຊາເພື່ອສົ່ງເສີມ ປີທ່ອງທ່ຽວແຂວງຜົ້ງສາລີ ໃນເດືອນພະຈິກ 2024 ນີ້.ທ່ານ ສົມຕຸ້ຍ ພົມມະວົງໄຊ ຮອງຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງ ຜົ້ງສາລີ ໄດ້ລາຍງານສື່ມວນຊົນ ໃນກອງປະຊຸມສະຫລຸບວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວທົ່ວແຂວງຜົ້ງສາລີ ປະຈຳປີ 2023 ແລະ ວາງທິດທາງແຜນການປີ 2024 ທີ່ຈັດຂຶ້ນບໍ່ດົນມານີ້ວ່າ ການກະກຽມຈັດກິດຈະກຳ ປີທ່ອງທ່ຽວ 2024 ຂອງແຂວງ ຜົ້ງສາລີ ແມ່ນໄດ້ຈັດຕັ້ງປະຕິບັດມາແຕ່ທ້າຍປີ 2023 ເປັນຕົ້ນມາ, ເຊິ່ງໃນເບື້ອງຕົ້ນແມ່ນໄດ້ອອກຂ້ໍຕົກລົງຂອງທ່ານເຈົ້າແຂວງວ່າ ດ້ວຍການແຕ່ງຕັ້ງຄະນະຮັບຜິດຊອບຊີ້ນຳລະດັບແຂວງ ໃນການກະກຽມຈັດກິດຈະກຳ ປີທ່ອງທ່ຽວ 2024 ຂອງແຂວງ ໂດຍມີທ່ານຮອງເຈົ້າແຂວງຜູ້ຊີ້ນໍາວຽກງານ ວັດທະນະທຳ-ສັງຄົມຂັ້ນແຂວງ ເປັນຫົວໜ້າຄະນະຮັບຜິດຊອບ ແລະ ປະກອບດ້ວຍພາກສ່ວນກ່ຽວຂ້ອງຂັ້ນ ແຂວງ ແລະ ເມືອງ ຈາກນັ້ນ, ພາຍໃນຄະນະຮັບຜິດຊອບກໍໄດ້ຈັດກອງປະຊຸມປຶກສາຫາລືກັນ ແລະ ໄດ້ກຳນົດເອົາເທສະການອາຫານເຜົ່າ ແລະ ດື່ມນ້ຳຊາເປັນກິດຈະກໍາລະດັບແຂວງເພ່ືອສ່ົງເສີມປີທ່ອງທ່ຽວລາວ 2024 ຂອງແຂວງຜົ້ງສາລີ.

     ປັດຈຸບັນ ຄະນະຮັບຜິດຊອບກໍາລັງຫ້າງຫາກະກຽມ ແຜນການແມ່ນຈະຈັດຂຶ້ນໃນເດືອນພະຈິກ 2024 ເຊິ່ງຈະ ມີຫລາຍກິດຈະກໍາທີ່ຈະຈັດຂຶ້ນໃນ ເທສະການດັ່ງກ່າວເປັນຕົ້ນແມ່ນ: ກິດຈະກຳປະກວດອາຫານເຜົ່າ, ປະກວດການຊົງຊາ, ການປະກວດນາງງາມຊົນເຜົ່າ, ການວາງສະແດງອາຫານຂອງບັນດາເຜົ່າ, ວາງສະແດງສິນຄ້າຜະລິດຕະພັນຊາ ແລະ ສິນຄ້າໂອດ໋ອບຂອງແຂວງ, ການສະແດງສິລະປະວັນນະຄະດີ ແລະ ອື່ນໆ. ທ່ານຍັງໄດ້ໃຫ້ຮູ້ຕື່ມວ່າ ນອກຈາກກິດຈະກຳປີທ່ອງທ່ຽວ ລະດັບແຂວງແລ້ວ ແຂວງຜົ້ງສາລີ ຍັງມີຫລາຍກິດຈະກຳປີທ່ອງທ່ຽວລະດັບເມືອງ ຮອດປັດຈຸບັນໄດ້ຈັດຕັ້ງປະຕິບັດສຳເລັດໄປແລ້ວ 2 ກິດ ຈະກໍາຢູ່ເມືອງບຸນເໜືອ ແລະ ເມືອງ ບຸນໃຕ້ ແລະ ໃນເວລາອັນໃກ້ນີ້, ກໍຈະມີກິດຈະກຳປີທ່ອງທ່ຽວຂອງ ເມືອງຍອດອູ ເຊິ່ງແມ່ນພິທີເປີດປີທ່ອງທ່ຽວ 2024 ຂອງເມືອງຍອດອູ ຕິດພັນກັບບຸນທານພະທາດ ອົງໄຫ ຈະຈັດຂຶ້ນໃນລະຫວ່າງວັນ ທີ 23-24 ມີນາ 2024 ແລະ ຈະມີຫລາຍກິດຈະກຳເຊັ່ນ: ງານສະຫລອງທານພະທາດອົງໄຫ, ງານວາງສະແດງສິນຄ້າ, ການສະແດງສິລະປະວັນນະຄະດີ ແລະ ອື່ນໆ.

ໂດຍ: ເກີດຂວັນໃຈ ມາລີຈັນສີ

KPL