ຂປລ
ຂປລ. ແມ່ຍິງ ແລະ ໄວໜຸ່ມ ທີ່ບໍ່ສາມາດເຂົ້າເຖິງຂໍ້ມູນຂ່າວສານ ແລະ ການບໍລິການທາງດ້ານສຸະພາບຈະເລີນ, ການວາງແຜນຄອບຄົວ ເຮັດໃຫ້ມີບັນຫາ ແລະ ອັດຕາການຖືພາ ທີ່ບໍ່ຕັ້ງໃຈ ທີ່ສູງຂຶ້ນ ເຊິ່ງຈະນຳໄປສູ່ການ ເອົາລູກອອກທີ່ບໍ່ປອດໄພ ແລະ ບັນຫາສຸຂະພາບຂອງແມ່ ແລະ ເດັກນ້ອຍທີ່ຕາມມາ.
ຂປລ. ແມ່ຍິງ ແລະ ໄວໜຸ່ມ ທີ່ບໍ່ສາມາດເຂົ້າເຖິງຂໍ້ມູນຂ່າວສານ ແລະ ການບໍລິການທາງດ້ານສຸະພາບຈະເລີນ, ການວາງແຜນຄອບຄົວ ເຮັດໃຫ້ມີບັນຫາ ແລະ ອັດຕາການຖືພາ ທີ່ບໍ່ຕັ້ງໃຈ ທີ່ສູງຂຶ້ນ ເຊິ່ງຈະນຳໄປສູ່ການ ເອົາລູກອອກທີ່ບໍ່ປອດໄພ ແລະ ບັນຫາສຸຂະພາບຂອງແມ່ ແລະ ເດັກນ້ອຍທີ່ຕາມມາ. ສະນັ້ນ, ການວາງແຜນຄອບຄົວ ທີ່ຖືກຕ້ອງ ຈະຊ່ວຍຫລຸດຜ່ອນ ອັດຕາການຕາຍຂອງ ແມ່ ແລະ ເດັກໄດ້.
ທ່ານ ນາງ ດວງຕາ ເລືອງວິໄລ ຮອງຫົວໜ້າພະແນກ ສາທາລະນະສຸກ ແຂວງບໍລິຄຳໄຊ, ຜູ້ຊີ້ນຳວຽກງານອະນາໄມ ແລະ ສົ່ງເສີມສຸຂະພາບ ໄດ້ໃຫ້ສຳພາດເມື່ອບໍ່ດົນນີ້ວ່າ: ພະແນກ ສາທາລະນະສຸກ ແຂວງບໍລິຄຳໄຊ ໄດ້ຈັດຕັ້ງປະຕິບັດວຽກງານອະນາໄມ ແລະ ສົ່ງເສີມສຸຂະພາບ ໂດຍສະເພາະ ແມ່ນວຽກງານສຸຂະພາບຈະເລີນພັນ, ມາຮອດປັດຈຸບັນ ໄດ້ເຄື່ອນໄຫວ ເຊື່ອມສານ ວຽກງານດັ່ງກ່າວເຂົ້າກັບວຽກແມ່ ແລະ ເດັກ ໂດຍການໃຫ້ບໍລິການກັບທີ່ ຢູ່ໂຮງໝໍແຂວງ, ໂຮງໝໍເມືອງ, ໂຮງໝໍນ້ອຍ. ນອກນັ້ນ, ກໍໄດ້ເຄື່ອນທີ່ລົງບ້ານເຊື່ອມສານ 6 ຄັ້ງຕໍ່ປີ ໂດຍເນັ້ນໃສ່ ໂຄສະນາເຜີຍແຜ່ຂໍ້ມູນ, ຄວາມຮູ້ກ່ຽວກັບວຽກງານ ສຸຂະພາບຈະເລີນພັນ ໄປພ້ອມໆກັນ ໃຫ້ແກ່ປະຊາຊົນ ແລະ ກຸ່ມເປົ້າໝາຍຢ່າງທົ່ວເຖິງ ເຊິ່ງສາມາດເຮັດໃຫ້ອັດຕາ ການຕາຍຂອງແມ່ ແລະ ເດັກຫລຸດລົງໃນທຸກໆປີໄດ້. ເຖິງຢ່າງໃດກໍຕາມ, ການວາງແຜນຄອບຄົວພາຍໃນແຂວງ ຍັງມີອັດຕາທີ່ຕໍ່າ, ແມ່ຍິງຖືພາ ແລະ ເກີດລູກອາຍຸຍັງນ້ອຍ, ການເຂົ້າເຖິງ ກຸ່ມເປົ້າໝາຍໄວໜຸ່ມ ໃນການໃຫ້ຄວາມຮູ້ກ່ຽວກັບ ສຸຂະພາບຈະເລີນພັນ ແລະ ການປ້ອງກັນການຖືພາ ແລະ ກ່ຽວກັບເພດສຶກສາ ຍັງຈັດຕັ້ງປະຕິບັດບໍ່ໄດ້ດີເທົ່າທີ່ຄວນ.
ຕາມບົດລາຍງາຍ ສະຖານະພາບປະຊາກອນໂລກ ປີ 2022 ສະແດງໃຫ້ເຫັນເຖິງຜົນກະທົບ ດ້ານສຸຂະພາບຈະເລີນພັນ ໃນທົ່ວໂລກ ກໍຄື ໃນ ສປປ ລາວ ເຊິ່ງການຖືພາທີ່ບໍ່ຕັ້ງໃຈ ມີເຖິງ 61% ໂດຍຈະຢຸດຕິການຖືພາດ້ວຍການເອົາລູກອອກ, ນັ້ນແມ່ນບັນຫາທີ່ສຳຄັນໜຶ່ງ ທີ່ຕ້ອງໄດ້ເອົາໃຈໃສ່ແກ້ໄຂຢ່າງຮີບດ່ວນ ເຊິ່ງເປັນສິ່ງທ້າທາຍ ທີ່ຈະຕ້ອງຮ່ວມແຮງຮ່ວມໃຈຂ້າມຜ່ານ ເພື່ອໃຫ້ບັນລຸການຈັດຕັ້ງ ປະຕິບັດແຜນດໍາເນີນງານ ວ່າດ້ວຍປະຊາກອນ ແລະ ການພັດທະນາ(ICPD) ແລະ ວາລະການພັດທະນາແບບຍືນຍົງ ຮອດປີ 2030 ໂດຍສະເພາະ 3 ເປົ້າໝາຍຂອງການປ່ຽນແປງທີ່ສໍາຄັນ ຄື: ຢຸດ ຕິການຕາຍຂອງແມ່, ຢຸດຕິຄວາມຕ້ອງການ ໃນການວາງແຜນຄອບຄົວ ທີ່ບໍ່ໄດ້ຕອບສະໜອງ ແລະ ລຶບ ລ້າງຄວາມຮຸນແຮງໂດຍອີງໃສ່ເພດ.
ຂ່າວ-ພາບ: ກິດຕາ.
KPL
