ຂປລ. ໃນລະຫວ່າງ ວັນທີ 5-6 ກຸມພາ 2023, ທ່ານ  ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ສະພາແຫ່ງຊາດ ພ້ອມຄະນະ ເຄື່ອນໄຫວເຮັດວຽກຢູ່ແຂວງໄຊຍະບູລີ ເພື່ອຮັບຟັງຄວາມຄິດຄວາມເຫັນ ຂອງປະຊາຊົນ, ອໍານາດການປົກ ຄອງທ້ອງຖິ່ນ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ກ່ຽວກັບການພັດທະນາໂຄງການຂຸດຄົ້ນ ແລະ ປຸງແຕ່ງແຮ່ຄຳ ຂອງບໍລິສັດ ມໍລະກົດ ເປນຊຽນ ບໍ່ແຮ່ ຈຳກັດ, ພ້ອມທັງເກັບກຳຂໍ້ມູນ ແລະ ລົງເບິ່ງພື້ນທີ່ຕົວຈິງ ກ່ຽວກັບທີ່ດິນປ່າໄມ້ທຳມະຊາດທີ່ລັດຖະ ບານ ສະເໜີຂໍຫັນປ່ຽນໄປເປັນທີ່ດິນອຸດສາຫະກຳ ລັກສະນະຊົ່ວຄາວ ແລະ ລັກສະນະຖາວອນ ທີ່ໄດ້ສັງລວມລາຍງານຕໍ່ກອງປະຊຸມ ຄະນະປະຈຳສະພາແຫ່ງຊາດ ພິຈາລະນາ ໃນເດືອນມັງກອນຜ່ານມາ.
  ​ໂອກາດ​ນີ້, ທ່ານ  ລິນຄຳ ດວງສະຫວັນ ກໍໄດ້ເຂົ້າຮ່ວມກອງປະຊຸມຕິດຕາມກວດກາ ແລະ ຊຸກ ຍູ້ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດການເງິນ ແລະ ໂຄງການລົງທຶນດ້ານພະລັງງານ ແລະ ບໍ່ແຮ່, ໄດ້ຮັບຟັງການລາຍງານກ່ຽວກັບສະພາບ ການລົງທຶນດ້ານພະລັງງານ ແລະ ບໍ່ແຮ່ແຂວງ; ການຈັດຕັ້ງປະຕິບັດວາລະແຫ່ງຊາດ ທີ່ຕິດພັນກັບວຽກງານຂົງເຂດພະລັງງານ ແລະ ບໍ່ແຮ່; ການຟື້ນຟູປ່າ ແລະ ປູກປ່າທົດແທນຄືນພື້ນທີ່ປ່າໄມ້ທຳມະຊາດ ທີ່ຖືກໂຄງການພັດທະນາໄຟຟ້າ ແລະ ຂຸດຄົ້ນບໍ່ແຮ່; ການຊົດເຊີຍຜົນກະທົບໃຫ້ປະຊາຊົນທີ່ຖືກຜົນກະທົບ ຈາກໂຄງການພັດທະນາພະລັງງານໄຟຟ້າ ແລະ ບໍ່ແຮ່, ຕິດພັນກັບບັນຫາຜົນກະທົບຈາກການພັດທະນາໂຄງການດັ່ງກ່າວ. ພ້ອມນັ້ນ, ຜູ້ເຂົ້າຮ່ວມກໍໄດ້ປະກອບຄຳຄິດຄຳເຫັນຕໍ່ກອງປະຊຸມ ເພື່ອຊອກຫາທິດທາງ ແກ້ໄຂຄວາມຫຍຸ້ງຍາກທາງດ້ານເສດຖະກິດ-ສັງຄົມຂອງແຂວງ ກໍຄື ຂອງຊາດ ໃຫ້ສຳເລັດຕາມຄາດໝາຍທີ່ວາງໄວ້.
  ຈາກ​ນັ້ນ, ທ່ານ ລິນຄຳ ດວງສະຫວັນ ພ້ອມຄະນະ ຍັງໄດ້ລົງພື້ນທີ່ຕົວຈິງໂຄງການຂຸດຄົ້ນ ແລະ ປຸງແຕ່ງແຮ່ຄຳ ຢູ່ເຂດບ້ານໂພນສະຫວັນ ເມືອງປາກລາຍ, ພ້ອມທັງຮັບຟັງການລາຍງານໂດຍຫຍໍ້ກ່ຽວກັບການລິເລີ່ມຈັດຕັ້ງປະຕິບັດພັດທະນາໂຄງການ ​ໂດຍ​ທ່ານ​ໄດ້ສະແດງຄວາມເປັນຫ່ວງເປັນໄຍ ຕໍ່ລະ ບົບນິເວດທຳມະຊາດ ແລະ ສະເໜີໃຫ້ໂຄງການເອົາໃຈໃສ່ ຕໍ່ບັນຫາດັ່ງກ່າວ, ໃຫ້ສ້າງວຽກເຮັດງານທຳໃຫ້ປະຊາຊົນໃນຊຸມຊົນ, ສ້າງຖະໜົນຫົນທາງ ເພື່ອໃຫ້ປະຊາຊົນໄປມາສະດວກສະບາຍ ສ້າງເງື່ອນໄຂອຳນວຍຄວາມສະດວກການຂົນສົ່ງການຜະລິດເປັນສິນຄ້າ.

KPL