ຂປລ. ຕອນບ່າຍວັນທີ 28 ພຶດສະພາ 2022, ພາຍຫລັງສໍາເລັດການຊີ້ນໍາ ແລະ ຊຸກຍູ້ວຽກງານ ແຂວງອັດຕະປື, ທ່ານ ພັນຄຳ ວິພາວັນ ນາຍົກລັດຖະມົນຕີ ໄດ້ສືບຕໍ່ເຄື່ອນໄຫວຢ້ຽມຢາມ ແລະ ພົບປະໂອ້ລົມ ການນຳຫລັກແຫລ່ງ ແຂວງຈຳປາສັກ ໂດຍການນຳພາຄະນະໃຫ້ຕ້ອນຮັບ ແລະ ເຂົ້າຮ່ວມຮັບຟັງການພົບປະໂອ້ລົມຂອງທ່ານ ວິໄລວົງ ບຸດດາຄຳ ເຈົ້າແຂວງໆຈຳປາສັກ.

ກ່ອນອື່ນ, ທ່ານ ເຈົ້າແຂວງຈຳປາສັກ ໄດ້ກ່າວສະແດງຄວາມຍິນດີຕ້ອນຮັບ ແລະ ລາຍງານໃຫ້ຊາບ ກ່ຽວກັບສະພາບ ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມຂອງແຂວງ ປະຈຳປີ 2022 ໃນໄລຍະ 5 ເດືອນຜ່ານມາ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ເຫັນວ່າ ຜົນສຳເລັດອັນພົ້ນເດັ່ນ ແມ່ນການປັບປຸງການຈັດຕັ້ງ ແລະ ກຳນົດແຜນພະນັກງານ ນຳພາຄຸ້ມຄອງຂອງແຂວງ; ການປັບປຸງວຽກງານ ກໍ່ສ້າງ ຮາກຖານການເມືອງ ຕາມ 4 ເນື້ອໃນ ແລະ 4 ຄາດໝາຍ ທີ່ກຳນົດໄວ້; ການແກ້ໄຂບັນຫາ ການແພ່ລະບາດ ຂອງພະຍາດໂຄວິດ-19; ການປະຕິບັດ 2 ວາລະແຫ່ງຊາດ ມີຄວາມຄືບໜ້າ ແລະ ໄດ້ຮັບຜົນສຳເລັດດີເປັນກ້າວໆ ເຊິ່ງໄດ້ປະກອບສ່ວນ ເຮັດໃຫ້ເສດຖະກິດ ຂອງແຂວງຂະຫຍາຍ ຕົວຢ່າງ ຕໍ່ເນື່ອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ໂດຍພື້ນຖານ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງ ດີຂຶ້ນເປັນກ້າວໆ.

ໃນໂອກາດນີ້, ທ່ານນາຍົກລັດຖະມົນຕີ ໄດ້ມີທິດຊີ້ນຳ ຕໍ່ອົງການປົກຄອງ ແຂວງຈຳປາສັກ ໂດຍໄດ້ສະແດງ ຄວາມຍ້ອງຍໍຊົມເຊີຍ ຕໍ່ບັນດາ ຜົນສຳເລັດອັນພົ້ນເດັ່ນ ທີ່ແຂວງຈຳປາສັກ ສາມາດປະຕິບັດ ໄດ້ ໃນໄລຍະທີ່ຜ່ນມາ, ​ພ້ອມທັງ ຍົກໃຫ້ເຫັນສະພາບການນຳພາ ແລະ ບໍລິຫານວຽກງານ ຂອງລັດຖະບານ ຊຸດທີ IX, ແຈ້ງໃຫ້ຊາບ ກ່ຽວກັບຈຸດປະສົງ ແລະ ຜົນສຳເລັດ ໃນການເຄື່ອນໄຫວ ເຮັດວຽກ ຢູ່ ແຂວງຈຳປາສັກ ແລະ ອັດຕະປື ໃນຄັ້ງນີ້, ລວມທັງ ສະພາບການພົ້ນເດັ່ນ ທັງພາຍໃນ ແລະ ຕ່າງປະເທດ ໃຫ້ຜູ້ເຂົ້າຮ່ວມ ໄດ້ຮັບຮູ້ ແລະ ເຂົ້າໃຈ ຢ່າງຖືກຕ້ອງ ແລະ ເປັນເອກະພາບ. ອັນສຳຄັນ, ທ່ານນາຍົກລັດຖະມົນຕີ ໄດ້ມີຄຳເຫັນຊີ້ນຳ ໃຫ້ອົງການປົກຄອງ ແຂວງຈຳປາສັກ ເອົາໃຈໃສ່ຕື່ມ ບາງດ້ານ ເປັນຕົ້ນ ໃຫ້ສືບຕໍ່ ຈັດຕັ້ງປະຕິບັດ 2 ວາລະແຫງຊາດ ຢ່າງແຂງແຮງ ແລະ ມີຜົນສຳເລັດ ຕາມແຜນທີ່ກຳນົດໄວ້; ເພີ່ມທະວີການປະຕິບັດ ແນວທາງການຕ່າງປະເທດ ອັນສະເໝີ ຕົ້ນສະເໜີປາຍ ຂອງພັກເຮົາ ເພື່ອປົກປ້ອງ ແລະ ຍາດແຍ່ງເອົາຜົນປະໂຫຍດ ມາໃຫ້ປະເທດຊາດ ແລະ ປະຊາຊົນ ບົນພື້ນຖານຕ່າງ ຝ່າຍຕ່າງມີຜົນປະໂຫຍດ ຕາມທິດການທູດປ້ອງກັນເຫດ ແລະ ບຸກທະລຸ ເພື່ອນຳເອົາຜົນປະໂຫຍສູງສຸດ ມາໃຫ້ປະເທດຊາດ ແລະ ປະຊາຊົນ.

ທັງໝົດ ແມ່ນການຕິດຕາມ ແລະ ຊຸກຍູ້ ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມແຫ່ງຊາດ ຢູ່ທ້ອງຖິ່ນ ໃຫ້ມີຜົນສຳເລັດ ຕາມຄາດໝາຍ ທີ່ກຳນົດໄວ້, ທັງແມ່ນຄວາມເປັນຫ່ວງເປັນໄຍ ຂອງສູນກາງພັກ ແລະ ລັດຖະບານ ຕໍ່ການປະຕິບັດພາລະກິດ ປົກປັກຮັກສາ ແລະ ສ້າງສາພັດທະນາ ປະເທດຊາດ ໃຫ້ມີຄວາມກ້າວໜ້າ, ທັນສະໄໝ, ສັງຄົມມີຄວາມສາມັກຄີປອງດອງ, ສີວິໄລ ແລະ ຍຸຕິທຳຢ່າງແທ້ຈິງ.

ຂ່າວ-ພາບ: ກົມປະຊາສຳພັນ ຫສນຍ

KPL