ຂປລ.ໂຮງຮຽນມັດທະຍົມສຶກສາສົມບູນ ວຽງຈັນ (ມສ)  ໄດ້ເປີດການຮຽນ-ການສອນບຳລຸງໄລຍະ ສັ້ນ (ພັກແລ້ງ), ​ ໂດຍ​ເລີ່​ມ ວັນທີ 4-22 ກໍລະກົດ 2018 ​ເພື່ອ​ເປີດ​ໂອກາດ ໃຫ້ນັກຮຽນທີ່ຈົບຊັ້ນ ມ7  ​ໄດ້​ຮັບການ​ຍົກ​ລະດັບສາຂາວິຊາຕ່າງໆ  ເພື່ອກຽມຄວາມ​ພ້ອມ​ໃນ​ການ​ສອບເສັງເຂົ້າມະຫາວິທະຍາ​ໄລ​ແຫ່ງ​ຊາດ (ມຊ)  ທີ່ຈະມີຂຶ້ນໃນໄວໆນີ້. ນອກ​ຈາກນີ້,  ຍັງ​ໄດ້​ເປີດ​ສອນ​ບຳລຸງ​​ທົ່ວ​ໄປ​ໃຫ້​ແກ່​ນັກຮຽນ ມ1-ມ7  ​ໃນ​ຫລາຍ​ສາຂາ​ວິຊາ​ນຳ​ອີກ,  ​ເຊິ່ງສອນ​ໂດຍ​ອາຈານ​ ທີ່​ມີ​ປະສົບ​ການ​ຂອງ  ມສ ວຽງຈັນ ​ແລະ ຄູ​ຮັບ​ເຊີນ​ຈາກ​ສະ​ຖາ​ບັນ​ຕ່າງໆ.

ສຳລັບ​ວິຊາ​ຮຽນບຳລຸງ ມສ ວຽງຈັນ​ ໄດ້​ກຳນົດ ຄື:  ສາຍ A ປະກອບ​ມີ ວິຊາຄະນິດສາດ, ຟີ​ຊິກ​ສາດ, ​ເຄມີ​ສາດ, ຊີວະ​ສາດ ​ແລະ ພາສາ​ລາວ-​ວັນນະຄະດີ, ຄ່າ​ຮຽນ 380.000 ກີບ;  ສາຍ B ປະກອບ​ມີ ຄະນິດສາດ, ພາສາ​ລາວ-​ວັນນະຄະດີ, ພູມ​ສາດ ​ແລະ ປະຫວັດສາດ,  ຄ່າ​ຮຽນ 300.000 ກີບ; ສາຍ C ປະກອບ​ມີ ຄະນິດສາດ, ​ເຄມີ​ສາດ, ຊີວະ​ສາດ, ພາສາ​ລາວ-​ວັນນະຄະດີ, ພູມ​ສາດ ​ແລະ ປະຫວັດ ສາດ,  ຄ່າ​ຮຽນ 380.000 ກີບ. ພ້ອມ​ນີ້, ຍັງ​ມີ​ສາຍ​ວິຊາ​ ​ແພດສາດ ປະກອບ​ມີ ຄະນິດສາດ, ​ເຄມີ​ສາດ ​ແລະ ຊີວະ​ສາດ, ຄ່າ​ຮຽນ 300.000 ກີບ.

ທ່ານ ນາງ ວຽງສຸວັນ ພະໄຊສົມບັດ  ອຳນວຍການໂຮງຮຽນ ມສ ວຽງຈັນ  ໄດ້ໃຫ້ຮູ້ວ່າ: ປັດຈຸບັນ  ມີນັກຮຽນເຂົ້າມາລົງທະບຽນຄົບທຸກສາຂາວິຊາຮຽນ  ເພື່ອກຽມເສັງເຂົ້າ ມຊ ​ເຊິ່ງມາ​ຈາກ​ຫລາຍ​ແຂວງ​ ໃນ​ທົ່ວ​ປະ​ເທດ ແລະ ຄາດ​ວ່າ​ ຈະມີນັກຮຽນມາລົງທະບຽນຮຽນເພີ່ມປະມານ 200 ກວ່າຄົນ.  ພາຍຫລັງ​ທີ່​ສຳ​ເລັດ​ການ​ບຳລຸງ ຄູ-ອາຈານ  ຈະ​ຕ້ອງ​ມີ​ການປະເມີນຜົນລະດັບຄວາມ​ຮັບ​ຮູ້  ​ເພື່ອ​ຈະ​ນຳ​ໄປ​ປັບປຸງ​ແກ້​ໄຂ​ໃນ​ປີໜ້າ,  ​ເນື່ອງ​ຈາກ​ຊຸມ​ປີຜ່ານມາ ຜົນການສອບເສັງ​ເຂົ້າ​ຮຽນມະຫາວິທະຍາ​ໄລຕ່າງໆ  ສ່ວນ​ຫລາຍ​ແມ່ນ​ນັກຮຽນທີ່​ໄດ້​ຮັບ​ການ​ບຳລຸງ​ຢູ່  ມສ ວຽງຈັນ​ ​ແລະ ​ເປັນ​ນັກຮຽນ​​ທີ່​ມີຄະ​ແນນ​ສູງ.  ສະ​ເພາະ​ນັກຮຽນທີ່​ເຂົ້າ​ບຳລຸງ​ ໃນ​ໄລຍະພັກແລ້ງນີ້, ຫາກຮຽນດີຮຽນເກັ່ງ ໃນສາຂາວິຊາ ຄະນິດສາດ, ພິຊິກສາດ, ເຄມີສາດ, ພາສາລາວ-ວັນນະຄະດີ ແລະ ພາສາອັງກິດ ຄະແນນຢູ່ໃນເກດ A ສາມາດເຂົ້າຮຽນຫ້ອງພອນສະຫວັນໄດ້,  ໂດຍບໍ່ໄດ້ຜ່ານການສອບເສັງອີກຄັ້ງ.

​ຂ່າວ: ວຽງພອນ-ພາບເກດ.

KPL