ຂປລ
ການສອບເສັງຈົບຊັ້ນ ມັດທະຍົມຕົ້ນ (ມ4) ເລ່ີມຂຶ້ນ ແລະ ສຳເລັດລົງ ພ້ອມກັນ ຢ່າງຄຶກຄື້ນ ໃນທົ່ວປະເທດ ໃນວັນທີ 14-16 ມິ ຖຸນາ 2016 ເຊິ່ງຢູ່ແຕ່ລະ ສູນສອບເສັງ ໂດຍສະເພາະແມ່ນ ສູນສອບເສັງ ມສ ວຽງຈັນ ແມ່ນຮັກສາໄດ້ຄວາມເປັນ ລະບຽບຮຽບຮ້ອຍ, ຮັບປະກັນຄວາມໂປ່ງໃສ.
*ການສອບເສັງຈົບຊັ້ນ ມັດທະຍົມຕົ້ນ (ມ4) ເລ່ີມຂຶ້ນ ແລະ ສຳເລັດລົງພ້ອມກັນ ຢ່າງຄຶກຄື້ນ ໃນທົ່ວປະເທດ ໃນວັນທີ 14-16 ມິ ຖຸນາ 2016 ເຊິ່ງຢູ່ແຕ່ລະ ສູນສອບເສັງ ໂດຍສະເພາະແມ່ນ ສູນສອບເສັງ ມສ ວຽງຈັນ ແມ່ນຮັກສາໄດ້ຄວາມເປັນ ລະບຽບຮຽບຮ້ອຍ, ຮັບປະກັນຄວາມໂປ່ງໃສ.
ທ່ານນາງ ວຽງສຸວັນ ພະໄຊສົມບັດ ອຳນວຍການ ມສ ວຽງຈັນໄດ້ ເປີດເຜີຍໃຫ້ຮູ້ວ່າ: ສູນສອບເສັງ ມສ ວຽງຈັນ ເປັນສູນໃຫຍ່ຂອງ ນະຄອນຫລວງວຽງຈັນ ເຊິ່ງມີນັກຮຽນ ເຂົ້າຮ່ວມການສອບເສັງ ຄັ້ງນີ້ເຖິງ 1.600 ກວ່າຄົນ, ຍິງ 850 ກວ່າຄົນ, ມີ 17 ໂຮງຮຽນເຂົ້າຮ່ວມ, ໃນນັ້ນໂຮງຮຽນເອກະຊົນ 8 ໂຮງຮຽນ, ມີຫ້ອງສອບເສັງ 81 ຫ້ອງ ແຕ່ລະຫ້ອງມີ 20 ຄົນ ແລະ ນັ່ງໂຕະລະຄົນ. ນອກຈາກນີ້ ຍັງມີຄະນະ ກຳມະການ ຍາມຫ້ອງເສັງ 167 ຄົນ ເພື່ອຄວາມເປັນລະບຽບຮຽບຮ້ອຍ ແລະ ເຮັດໃຫ້ການສອບເສັງ ຄັ້ງນີ້ ບັນລຸຕາມ ຈຸດປະສົງທີ່ໄດ້ວາງໄວ້.
ທ່ານນາງ ວຽງສຸວັນ ອະທິບາຍ ຕື່ມວ່າ: ກ່ອນການສອບເສັງທາງ ໂຮງຮຽນໄດ້ມີການ ຝຶກອົບຮົມຄູອາຈານ ກ່ຽວກັບກົດລະບຽບ ການສອບເສັງ ແລະ ຂ້ໍຫ້າມຕ່າງໆ ທີ່ຂັ້ນເທິງໄດ້ວາງອອກ. ນອກ ຈາກນີ້ຍັງມີການ ຈັດການສອນບຳລຸງໃຫ້ກັບ ນັກຮຽນທີ່ຍັງມີ ຂ້ໍຄົງຄ້າງຂາດຄວາມເຂົ້າໃຈ ກ່ຽວກັບບົດຮຽນຕ່າງໆ ຈຶ່ງເຮັດໃຫ້ການສອບ ເສັງຄັ້ງນີ້ ເປັນໄປຕາມຄາດໝາຍ ເຊິ່ງນັກຮຽນ ແຕ່ລະຄົນເຂົ້າ ຫ້ອງສອບເສັງທັນເວລາ, ຄູອາຈານກໍ ປະຕິບັດກົດລະບຽບ ຢ່າງເຄັ່ງຄັດ, ມີການກວດກາ ກ່ອນເຂົ້າຫ້ອງ ສອບເສັງ ແລະ ພາຍໃນຫ້ອງເສັງ ເພື່ອເຮັດໃຫ້ການສອບເສັງ ມີຄວາມໂປ່ງໃສ ແລະ ມີຄຸນນະພາບ.
ເວົ້າລວມແລ້ວ ການສອບເສັງ ຈົບຊັ້ນ ມ4 ຢູ່ໃນ ນະຄອນຫລວງວຽງຈັນ ລວມເຖິງທົ່ວປະເທດ ມີຄວາມເອກະພາບ ແລະ ບັນລຸ ຕາມຈຸດປະສົງ ຄາດໝາຍພື້ນຖານ.
KPL
