ປັບປຸງເນື້ອໃນຂໍ້ຕົກລົງການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ
ຂປລ. ກອງປະຊຸມຄົ້ນຄວ້າ ແລະ ປັບປຸງເນື້ອໃນຂໍ້ຕົກລົງ ຂອງກໍາມາທິການຍຸຕິທໍາ (ກມຍທ) ວ່າດ້ວຍການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ຈັດຂຶ້ນໃນວັນທີ 6-8 ກໍລະກົດ 2025 ທີ່ແຂວງວຽງຈັນ ໂດຍການເປັນປະທານຂອງ ທ່ານ ນາງ ທຸມມາລີ ວົງພະຈັນ ຄະນະປະຈໍາສະພາແຫ່ງຊາດ (ຄປຈສພຊ), ປະທານກໍາມາທິການຍຸຕິທໍາ, ມີບັນດາຮອງປະທານກໍາມາທິການ, ຄະນະກົມ, ຄະນະພະແນກ ແລະ ພະນັກງານພາຍໃນ ກໍາມາທິການຍຸຕິທໍາ ເຂົ້າຮ່ວມ.
ກອງປະຊຸມໄດ້ຮັບຟັງການສະເໜີເນື້ອໃນ ຮ່າງຂໍ້ຕົກລົງຂອງກໍາມາທິການຍຸຕິທໍາ ວ່າດ້ວຍການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ, ຮ່າງມະຕິຈໍານວນໜຶ່ງທີ່ພົວພັນກັບ ການປັບປຸງເນື້ອໃນປຶ້ມຄູ່ມືການຮັບ ແລະ ພິຈາລະນາຄຳຮ້ອງຂໍຄວາມເປັນທໍາ ເປັນຕົ້ນ ຮ່າງມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການຕ້ອນຮັບ ແລະ ໃຫ້ຄໍາປຶກສາການຮ້ອງຂໍຄວາມເປັນທໍາ ແລະ ນິຕິກໍາອື່ນ. ຈາກນັ້ນ, ຜູ້ເຂົ້າຮ່ວມກໍໄດ້ປະກອບຄວາມຄິດເຫັນ ແລະ ຖອດຖອນບົດຮຽນກ່ຽວກັບ ການຈັດຕັ້ງປະຕິບັດວຽກງານການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ.
ຂໍ້ຕົກລົງສະບັບນີ້, ຈະກາຍເປັນນິຕິກໍາ ທີ່ເປັນບ່ອນອີງໃນການປະຕິບັດ ວຽກງານຂອງກໍາມາທິການຍຸຕິທໍາ ແລະ ການສ້າງເປັນຄູ່ມືການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ຂອງຄະນະປະຈໍາສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຢ່າງເປັນຮູບປະທຳ ແລະ ຖືກນຳໃຊ້ໃນວຽກງານຈິງ, ເປັນບ່ອນອີງໃຫ້ແກ່ການປັບປຸງນິຕິກໍາ ທີ່ກ່ຽວຂ້ອງກັບປຶ້ມຄູ່ມືຈໍານວນໜຶ່ງ ເພື່ອໃຫ້ມີຄວາມສອດ ຄ່ອງກັນ, ສ້າງຄວາມຮັບຮຸ້ ແລະ ເຂົ້າໃຈ ໃຫ້ແກ່ພະນັກງານ ທີ່ຮັບຜິດຊອບວຽກງານການຮັບ ແລະ ພິ ຈາລະນາຄໍາຮ້ອງຂໍຄວາມເປັນທໍາ ມີຄວາມເປັນເອກະພາບກັນ ໃນການຈັດຕັ້ງປະຕິບັດວຽກງານດັ່ງກ່າວ.
ຂ່າວ: ສອນສັກ ວັນວິໄຊ