ອິນໂດເນເຊຍ-ມາເລເຊຍ ຈະພະຍາຍາມແກ້ໄຂຄວາມເຄັ່ງຕຶງລະຫວ່າງ ໄທ-ກຳປູເຈຍ
ຂປລ.ວິທະຍຸກະຈາຍສຽງຫວຽດນາມ, ເມື່ອບໍ່ດົນມານີ້, ທ່ານ ປຣາໂບໂວ ສຸບຽນໂຕ(Prabowo Subianto), ປະທານາທິບໍດີ ອິນໂດເນເຊຍ ແລະ ທ່ານ ອັນວາ ອິບຣາຮິມ(Anwar Ibrahim), ນາຍົກລັດຖະມົນຕີ ມາເລເຊຍ ລ້ວນແຕ່ສະແດງ ຄວາມວິຕົກກັງວົນຕໍ່ຄວາມເຄັ່ງຕຶງ ຢູ່ເຂດຊາຍແດນ ລະຫວ່າງ ໄທ ແລະ ກຳປູເຈຍ. ການນຳທັງ 2 ຝ່າຍ ປາດຖະໜາ ຢາກປະກອບສ່ວນ ເຂົ້າໃນ ຄວາມມານະ ພະຍາຍາມ ເພື່ອໄກເກ່ຍ ລະຫວ່າງ 2 ປະເທດ ສະມາຊິກ ອາຊຽນ. ຄວາມເຄັ່ງຕຶງ ຢູ່ເຂດຊາຍແດນ ລະຫວ່າງ ໄທ ແລະ ກຳປູເຈຍ ແມ່ນໜຶ່ງ ໃນບັນດາຫົວຂໍ້ ຈຸດສຸມໃນການພົບປະ ລະຫວ່າງ ການນຳ 2 ປະເທດ ຢູ່ວັງເມີເດກາ( Merdeka). ມາເລເຊຍ ແລະ ອິນໂດເນເຊຍ ຈະມານະ ພະຍາຍາມ ສຳຜັດກັບ 2 ປະເທດ ເພື່ອແນໃສ່ ຫລຸດຜ່ອນ ແລະ ເຮັດໃຫ້ ຄວາມເຄັ່ງຕຶງ ໃຫ້ຫລຸດລົງ. ພ້ອມທັງ ໄດ້ເຫັນດີ ເດີນຕາມ ການຮ່ວມມື ເສດຖະກິດລວມ ຢູ່ເຂດທະເລ ເກີດການຂັດແຍ້ງກັນ ແມ່ນເຂດທະເລອຳບາລັດ (Ambalat) (ຕາມການເອີນຂອງ ອິນໂດເນເຊຍ) ນອນຢູ່ລະຫວ່າງ ແຂວງ ກາລີມັນຕັນ(Kalimantan) ຕາເວັນອອກຂອງ ອິນໂດເນເຊຍ ແລະ ລັດ ຊາບັດ( Sabat) ຂອງ ມາເລເຊຍ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ