ພິກກີບີ ເປີດຮ້ານຮູບແບບໃໝ່ ອຳນວຍຄວາມສະດວກແກ່ລູກຄ້າ
ຂປລ. ພິກກີບີ ໄດ້ຫັນປ່ຽນການບໍລິການ ຈາກຮ້ານຕູ້ນ້ອຍແຄມທາງ ມາເປັນຮ້ານນັ່ງກິນ ແລະ ຊື້ກັບບ້ານໄດ້ ເພື່ອອຳນວຍຄວາມສະດວກໃຫ້ລູກຄ້າ ໄດ້ມານັ່ງພັກຜ່ອນ, ຮັບປະທານ ຜະລິດຕະພັນ ຫລາກຫລາຍຂອງພິກກີບີ. ໃນວັນທີ 28 ມີນາ 2025 ນີ້, ໄດ້ມີພິທີເປີດຮ້ານພິກກີບີ (Food Store) ເຊິ່ງເປັນສາຂາທໍາອິດ ທີ່ເປີດເປັນຮູບແບບຮ້ານອາຫານ ຢູ່ຕໍ່ໜ້າຕະຫລາດເຂດດົງໂດກ ເມືອງໄຊທານີ ນະຄອນຫລວງວຽງຈັນ.
ທ່ານ ນາງ ມະນິລິນ ສິດທິໄຊ ຮອງປະທານບໍລິສັດສາຍຂອງການຄ້າ, ທັງເປັນເຂົ້າຂອງພິກກີບີ ໄດ້ໃຫ້ຮູ້ວ່າ: ການເປີດຮ້ານພິກກີບີ ໃນຮູບແບບໃໝ່ນີ້, ກໍເພື່ອຍົກລະດັບການບໍລິການ ແນໃສ່ອໍານວຍຄວາມສະດວກ ໃຫ້ແກ່ລູກຄ້າ ໄດ້ມານັ່ງກິນອາຫານຂອງພິກກີບີ ໃນຫ້ອງແອ, ພ້ອມກັບການບໍລິການທີ່ວ່ອງໄວ, ຍິ້ມແຍ້ມແຈ່ມໃສ ແລະ ອື່ນໆ ເຊິ່ງພິກກີບີ ໄດ້ພັດທະນາ, ຍົກສູງ, ປັບປຸງ ຜະລິດຕະພັນຂອງຕົນເອງ ໃຫ້ຄຸ້ມຄ່າກັບລາຄາ, ພ້ອມທັງເພີ່ມລາຍການອາຫານ ໃຫ້ມີຄວາມຫລາກຫລາຍຂຶ້ນກວ່າເກົ່າ ເປັນຕົ້ນ ດັບໂບຊິສໂຖດ (Double cheese toast), ທອດມັນຝຣັ່ງ (French Fries), ຊິສໂຖດຄອມໂບ້ (cheese Toast Combo+pepsi), ພິກກີບີມິສເຊັດ (PiggyB mix set) ແລະ ພິກກີບີສະລັດ (PiggyB Salad) ເພື່ອເພີ່ມທາງເລືອກ ໃຫ້ແກ່ລູກຄ້າ ທີ່ກຳລັງເພີ່ມຂຶ້ນຢ່າງຕໍ່ເນື່ອງໃນປັດຈຸບັນ.
ປັດຈຸບັນ ພິກກີບີ ມີທັງໝົດ 120 ສາຂາ ໃນທົ່ວປະເທດ, ນອກນັ້ນ ຍັງໄດ້ຂະຫຍາຍສາຂາ ໄປ ປະເທດເພື່ອນບ້ານ (ໄທ) 6 ສາຂາ (ຢູ່ໜອງຄາຍ, ອຸດອນ ແລະ ຂອນແກ່ນ). ສຳລັບ ແຜນການໃນຕໍ່ໜ້າ ພິກກີບີ ຍັງຈະເປີດຮ້ານໃນຮູບແບບໃໝ່ (Food store) ສາຂາທີ 2 ຢູ່ວຽງຈັນເຊັນເຕີນະຄອນຫລວງວຽງຈັນ. ຢ່າງໃດກໍຕາມ ສຳລັບ ຜູ້ປະກອບການ, ນັກທຸລະກິດ ທ່ານໃດຫາກມີຄວາມສົນໃຈ ຢາກດໍາເນີນກິດຈະການ ຫລື ເປັນຕົວແທນຈຳໜ່າຍຜະລິດຕະພັນ ຂອງພິກກີບີ ສາມາດເຂົ້າມາຕິດຕໍ່ພົວພັນ ກັບພິກກີບີ ກໍຄື ເຈົ້າຂອງຍີ່ຫໍ້ພິກກີບີ ໄດ້ໂດຍກົງ.
ຂ່າວ: ທະນູທອງ
ພາບ: ເກດສະໜາ