ຍີ່ປຸ່ນ ເຕືອນພາສີລົດໃຫຍ່ໂດຍສ.ອາເມລິກາ ຈະສົ່ງຜົນກະທົບຕໍ່ຄວາມຮ່ວມມືທາງເສດຖະກິດ
ຂປລ.ສຳນັກຂ່າວ ຕ່າງປະເທດ ລາຍງານຈາກ ນະຄອນຫລວງ ໂຕກຽວ ປະເທດ ຍີ່ປຸ່ນ ເມື່ອບໍ່ດົນມານີ້ວ່າ:ທ່ານ ຊີເງຣຸ ອິຊິບະ ນາຍົກ ລັດຖະມົນຕີ ຍີ່ປຸ່ນ ກ່າວເຖິງ ການທີ່ ສ.ອາເມລິກາ ປະກາດມາດຕະການພາສີ 25% ຕໍ່ລົດ ແລະ ເຄື່ອງອາໄຫລ່ລົດ ຊຶ່ງຜະລິດນອກ ປະເທດ ສ.ອາເມລິກາ ໂດຍໃນສ່ວນ ຂອງພາສີລົດ ຈະມີຜົນບັງຄັບໃຊ້ ຕັ້ງແຕ່ວັນທີ 2 ເມສານີ້ ວ່າລັດຖະບານ ຍີ່ປຸ່ນ ພວມພິຈາລະນາ ມາດຕະການ ຕອບສະໜອງ ທີ່ເໝາະສົມ ແລະ ເນັ້ນໜັກວ່າ ຍີ່ປຸ່ນ ເປັນປະເທດ ທີ່ມີບົດບາດສຳຄັນ ຕໍ່ເສດຖະກິດ ຂອງສ.ອາເມລິກາ ໃນຖານະຜູ້ລົງທຶນ ລາຍໃຫຍ່ ອັນດັບໜຶ່ງ.
ທ່ານ ໂຊຢິມາສະ ຮາຍາຊີ ເລຂາທິການ ຄະນະລັດຖະມົນຕີ ຍີ່ປຸ່ນ ກ່າວວ່າ: ການປະກາດ ມາດຕະການພາສີລົດ ຂອງລັດຖະບານ ສ.ອາເມລິກາ ຈະສົ່ງຜົນກະທົບ ຢ່າງຮ້າຍແຮງ ຕໍ່ຄວາມສຳພັນ ທາງເສດຖະກິດລະດັບ ທະວີພາຄີ ແລະ ກົນໄກ ການຄ້າໂລກ ໃນພາບລວມ. ໃນຂະນະທີ່ ທາງບໍລິສັດໂຕໂຢຕ້າ ຍັງບໍ່ມີຄວາມເຫັນ ຢ່າງເປັນທາງການ , ສ່ວນຮອນດ້າ ເປີດເຜີຍວ່າ ພວມມີການ ປຶກສາຫາລືກັນ ເພື່ອກຳນົດແນວທາງ ຕອບສະໜອງ ໃຫ້ເກີດຜົນກະທົບຕໍ່ ອຸດສາຫະກຳ ທັງໝົດ ທີ່ກ່ຽວຂ້ອງ ໃນລະດັບໜ້ອຍທີ່ສຸດ. ອຸດສາຫະກຳ ຍານພາຫະນະ ຖືເປັນເປັນໜຶ່ງໃນເສົາຫລັກ ຂອງ ສດຖະກິດ ຍີ່ປຸ່ນ ໂດຍກວມເອົາ ອັດຕາສ່ວນ ເປັນໜຶ່ງໃນສາມ ຂອງ ສິນຄ້າ ດ້ວຍມູນຄ່າທັງໝົດ ປະມານ 21,3 ພັນຕື້ເຢນ ທີ່ຍີ່ປຸ່ນ ສົ່ງອອກໄປຍັງ ສ.ອາເມລິກາ ເມື່ອປີ 2024. /