ວັນຊາດທີ 2 ທັນວາ ເປັນວັນທີ່ມີ ຄວາມໝາຍສຳຄັນ ຂອງພັກ-ຂອງຊາດ
ຂປລ. ວັນຊາດທີ 2 ທັນວາ ແມ່ນວັນທີ່ມີຄວາມໝາຍສໍາຄັນ ສໍາລັບ ທົ່ວພັກ, ທົ່ວລັດ ແລະ ທົ່ວປວງຊົນລາວ ທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດແຫ່ງ ການຕໍ່ສູ້ຂອງຊາດລາວເຮົາ, ແມ່ນວັນທີ່ປະຊາຊົນລາວບັນດາເຜົ່າ ໄດ້ມີອິດສະຫລະພາບ, ໄດ້ເປັນເຈົ້າຂອງປະເທດຊາດຢ່າງແທ້ຈິງ, ແມ່ນວັນທີ່ ປະເທດລາວ ໄດ້ມີເອກະລາດຢ່າງສົມບູນ ແລະ ມີອະທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ, ທັງແມ່ນວັນແຫ່ງສັນຕິພາບ, ວັນແຫ່ງການກ້າວສູ່ຍຸກສະໄໝໃໝ່ ແຫ່ງການສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນະຖາວອນ.
ເນື່ອງໃນໂອກາດ ວັນຊາດ ທີ 2 ທັນວາ ຄົບຮອບ 49 ປີ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ໄດ້ຍົກໃຫ້ເຫັນບາງທັດສະນະວ່າ: ວັນຊາດ ທີ 2 ທັນວາ ແມ່ນວັນທີ່ມີຄວາມໝາຍຄວາມສໍາຄັນຂອງຊາດລາວເຮົາ ເປັນໝາກຜົນຂອງການຕໍ່ສູ້ ຕ້ານການຮຸກຮານຂອງພວກລ່າເມືອງຂຶ້ນ ຂອງກຳລັງ ປະກອບອາວຸດ ກອງທັບປະຊາຊົນລາວ ເພື່ອຍາດເອົາໄຊຊະນະ ພາຍໃຕ້ການນຳພາຂອງພັກ ແລະ ຄວາມສາມັກຄີ ເປັນປຶກແຜ່ນຂອງປະຊາຊົນລາວ ບັນດາເຜົ່າ ໃນຫລາຍທົດສະວັດຜ່ານມາ ຈົນສາມາດຍາດໄດ້ໄຊຊະນະ ແລະ ປະກາດເອກະລາດ ໃນວັນທີ 2 ທັນວາ 1975 ເປັນຕົ້ນມາ ເຊິ່ງທົ່ວພັກ-ທົ່ວລັດ, ທົ່ວກໍາລັງປະກອບ ອາວຸດ ແລະ ທົ່ວປວງຊົນລາວທັງຊາດ ໃນຂອບເຂດທົ່ວປະເທດ ໄດ້ພ້ອມກັນເອກອ້າງທະນົງໃຈ ສ້າງຂະບວນການຕ່າງໆ ເພື່ອສະເຫລີມ ສະຫລອງ ວັນສໍາຄັນດັ່ງກ່າວ ຢ່າງເປັນຂະບວນຟົດຟື້ນ ແລະ ກວ້າງຂວາງ ໃນແຕ່ລະປີ.
ພ້ອມນີ້, ທ່ານ ທອງສະຫວັນ ພົມວິຫານ ຍັງໄດ້ຍົກໃຫ້ເຫັນການເຕີບໃຫຍ່ຂະຫຍາຍຕົວ ຂອງ ສປປ ລາວ ຕະຫລອດໄລຍະຜ່ານມາ ຈົນຮອດປັດຈຸບັນ ພາຍໃຕ້ການນຳພາຂອງພັກປະຊາຊົນ ປະຕິວັດລາວ ກໍຄື ການນຳ ພັກ, ລັດ ແຕ່ລະຮຸ່ນ ເຊິ່ງເຫັນໄດ້ວ່າ ປະເທດຊາດ ໄດ້ຮັບການພັດທະນາຢ່າງກ້າວກະໂດດ, ເຮັດໃຫ້ເສດຖະກິດ ຂອງປະເທດ ມີການຂະຫຍາຍຕົວ ແລະ ພັດທະນາຢ່າງຕໍ່ເນື່ອງລຽນຕິດ, ສະເໝີຕົ້ນສະເໝີປາຍ, ທັງເຮັດໃຫ້ສັງຄົມມີຄວາມສະຫງົບ, ປອດໄພ ແລະ ອື່ນໆ. ຄຽງຄູ່ ກັນນີ້, ສປປ ລາວ ກໍຄື ປວງຊົນລາວ ທັງຊາດ ຕ້ອງໄດ້ສືບຕໍ່ຮັກສາຄວາມສາມັກຄີເປັນປຶກແຜນ, ຮ່ວມແຮງ, ຮ່ວມໃຈ, ໃຫ້ການຮ່ວມມື ເພື່ອພ້ອມກັນພັດທະນາ ປະເທດຊາດ ກໍຄື ພັດທະນາເສດຖະກິດ-ສັງຄົມ ຂອງປະເທດ ໃຫ້ຈະເລີນກ້າວໜ້າ, ຮຸ່ງເຮືອງສີວິໄລ ຂຶ້ນໄປເລື້ອຍໆ ໃນອະນາຄົດ ແລະ ຍາວນານ. ອັນຕົ້ນຕໍ ຕາມແຜນພັດທະນາ ໄດ້ສືບຕໍ່ສ້າງເສດຖະກິດເອກະລາດ ເປັນເຈົົ້າຕົນເອງ ໃຫ້ເປັນຮູບປະທຳ ເທື່ອລະກ້າວ ເພື່ອເຮັດໃຫ້ປະເທດຊາດ ມີຄວາມເຂັ້ມແຂງ ແລະ ເປີດກວ້າງການພົວພັນຮ່ວມມື ກັບເພື່ອນມິດຕ່າງປະເທດ ເພື່ອດຶງດູດການຄ້າ, ການລົງທຶນ, ການທ່ອງທ່ຽວ ແລະ ອື່ນໆ ແນໃສ່ເຮັດໃຫ້ ສປປ ລາວ ມີການພັດທະນາ ຢ່າງຕໍ່ເນື່ອງລຽນຕິດ.
ໃນໂອກາດນີ້, ທ່ານ ທອງສະຫວັນ ພົມວິຫານ ຍັງໄດ້ອວຍພອນ ໃຫ້ການນຳ ພັກ, ລັດ ຕະຫລອດຮອດ ປວງຊົນລາວ ທັງຊາດ ຈົ່ງມີສຸຂະພາບເຂັ້ມແຂງ, ມີພາລະນາໄມສົມບູນ, ປະສົົບຜົນສຳເລັດ ໃນການປະຕິບັດໜ້າທີ່ວຽກງານ, ສືບຕໍ່ນຳພາ-ຊີ້ນຳປະເທດຊາດ ໃຫ້ຈະເລີນກ້າວໜ້າ ແລະ ຮຸ່ງເຮືອງສີວິໄລ ຂຶ້ນໄປເລື້ອຍໆ.
ຂ່າວ: ທະນູທອງ
ພາບ: ອ່າຍຄຳ