ເກັບກໍາຂໍ້ມູນ ຄວາມເປັນໄປໄດ້ໃນການ ສົ່ງເສີມລ້ຽງໄກ່ລາດ ຢູ່ 4 ເມືອງ ແຂວງສາລະວັນ
ຂປລ. ບໍລິສັດ ພັດທະນາແຫລ່ງທ່ອງທ່ຽວນໍ້າຕົກຕາດເຍືອງ ແລະ ກົງສຸນໃຫຍ່ແຫ່ງຣາຊະອານາຈັກໄທ ປະຈໍາແຂວງສະຫວັນນະເຂດ ນໍາໂດຍ ທ່ານ ນາງ ສອນທິດາ ອຸນາພົມ ປະທານບໍລິສັດ ພັດທະນາແຫລ່ງທ່ອງທ່ຽວນໍ້າຕົກຕາດເຍືອງ, ທ່ານ ນາງ ທິຕິຍາ ປານມະນີ ຮັກສາການ ຫົວໜ້າກົງສຸນໃຫຍ່ ແຫ່ງຣາຊະອານາຈັກໄທ ປະຈໍາແຂວງສະຫວັນນະເຂດ, ທ່ານ ຕໍ່ພົງ ປະເສີດສັງ ສັດຕະວະແພດ ແຂວງມຸກດາຫານ ຄະນະຮັບຜິດຊອບສູນເພາະພັນໄກ່ໜອງເຕົ່າ ແຂວງສະຫວັນນະເຂດ ພ້ອມຄະນະວິຊາການ ໄດ້ເຄື່ອນໄຫວເກັບກໍາຂໍ້ມູນ ແລະ ປຶກສາຫາລືຄວາມເປັນໄປໄດ້ ໃນການສົ່ງເສີມການລ້ຽງໄກ່ລາດພັນພື້ນເມືອງ ແລະ ການຂະຫຍາຍສູນເພາະພັນລູກໄກ່ ຮ່ວມກັບເມືອງລະຄອນເພັງ ແລະ 3 ເມືອງຂອງແຂວງສາລະວັນ ຄື: ເມືອງວາປີ, ເມືອງຕຸ້ມລານ ແລະ ເມືອງຄົງເຊໂດນ ໂດຍມີ ທ່ານ ທອງດີ ຈັນທະວົງ ເຈົ້າເມືອງລະຄອນເພັງ, ທ່ານ ບຸນຍູ້ ຈັນທະລັງສີ ເຈົ້າເມືອງວາປີ, ທ່ານ ທອງໃສ ເພັດລາສີ ເຈົ້າເມືອງຕຸ້ມລານ, ທ່ານ ສະໄໝ ໂພທິສານ ເຈົ້າເມືອງຄົງເຊໂດນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດເຄື່ອນໄຫວຄັ້ງນີ້, ໄດ້ມີການພົບປະ ແລະ ປຶກສາຫາລື ຮ່ວມກັນກ່ຽວກັບແນວຄວາມຄິດໃນການ ຂະຫຍາຍສູນເພາະພັນລູກໄກ່ລາດ ທີ່ໄດ້ມາດຕະຖານ ເພື່ອຕອບສະໜອງລູກໄກ່ ທີ່ມີຄຸນນະພາບ ໃຫ້ປະຊາຊົນ 4 ເມືອງນໍາໄປລ້ຽງ ເພື່ອສະໜອງຕາມຄວາມຕ້ອງການຂອງຕະຫລາດ ແລະ ເປັນວັດຖຸດິບປ້ອນການຜະລິດປີ້ງໄກ່ນາປົ່ງ ຄຸນນະພາບໃໝ່ ປະກອບສ່ວນສ້າງລາຍຮັບໃຫ້ຄອບຄົວ.
ຜ່ານການປຶກສາຫາລືເບື້ອງຕົ້ນໃນຄັ້ງນີ້, ກົງສຸນໃຫຍ່ແຫ່ງຣາຊະອານາຈັກໄທ ປະຈໍາແຂວງສະຫວັນນະເຂດ ຈະໄດ້ຮວບຮວມຂໍ້ມູນ ນໍາສະເໜີພາກສ່ວນກ່ຽວຂ້ອງຂອງຕົນ ເພື່ອຄົ້ນຄວ້າຄວາມເປັນໄປໄດ້ໃນການຮ່ວມມືຂະຫຍາຍສູນເພາະພັນລູກໄກ່ ແລະ ການຊ່ວຍເຫລືອດ້ານອື່ນໆ.