ລັດຖະມົນຕີທ່ອງທ່ຽວອາຊຽນ ພ້ອມກັນສ້າງແຜນພັດທະນາການທ່ອງທ່ຽວຢ່າງມີຜົນສໍາເລັດ
*ໃນກອງປະຊຸມລະດັບລັດຖະມົນຕີທ່ອງທ່ຽວອາຊຽນ ຄັ້ງທີ 27 ໄດ້ໄຂຂຶ້ນຢ່າງເປັນທາງການ ໃນວັນທີ 25 ມັງກອນ 2024 ນີ້, ໂດຍການເປັນປະທານຮ່ວມຂອງທ່ານນາງ ສວນສະຫວັນ ວິຍະເກດ ລັດ ຖະມົນຕີ ກະ ຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ທ່ານ ດາໂຕະ ຊິຣີ ທິອອງ ຄິງຊິງ, ລັດຖະມົນຕີທ່ອງທ່ຽວ ສິລະປະ ແລະ ວັດທະນະທຳ ຂອງ ມາເລເຊຍ, ມີບັນດາລັດຖະມົນຕີທ່ອງທ່ຽວອາຊຽນ, ລັດຖະມົນຕີທ່ອງທ່ຽວ ຈາກຕີມໍແລັດສະເຕ ໃນຖານະປະເທດຜູ້ສັງເກດການ, ມີເລຂາທິການໃຫຍ່ອາຊຽນ ພ້ອມດ້ວຍບັນດາທ່ານຫົວໜ້າ ຄະນະຜູ້ແທນອາຊຽນເຂົ້າຮ່ວມນັ້ນ ໄດ້ມີການປຶກສາຫາລືຫລາຍບັນຫາ ເພື່ອ ພ້ອມກັນສ້າງແຜນພັດທະນາ ການ ທ່ອງທ່ຽວໃນຂົງເຂດອາຊຽນໃຫ້ມີຄວາມຍືນຍົງ.
ໃນກອງປະຊຸມຍັງໄດ້ຮັບຟັງ ກ່ຽວກັບການຈັດຕັ້ງປະຕິບັດແຜນຍຸດທະສາດ ການທ່ອງທ່ຽວອາຊຽນ 2016-2025, ຮັບຟັງລາຍງານຈາກບັນດາອົງການຈັດຕັ້ງສາກົນ, ອົງການທີ່ກ່ຽວຂ້ອງກັບອາຊຽນ ແລະ ພາກສ່ວນ ພາຍນອກອື່ນໆ ໃນການປະຕິບັດກິດຈະກຳທີ່ສະໜັບສະໜູນ ໃຫ້ແກ່ການທ່ອງທ່ຽວອາຊຽນ ໃນໄລຍະຜ່ານມາ, ພ້ອມທັງ ໄດ້ປຶກສາຫາລືການປະຕິບັດ ບັນດາກິດຈະກໍາບູລິມະສິດ ການທ່ອງທ່ຽວອາຊຽນ ສໍາລັບປີ 2016-2025, ກິດຈະກໍາບູລິມະສິດໃນປີ 2023-2024 , ນອກນີ້ ລັດຖະມົນຕີທ່ອງທ່ຽວອາຊຽນ ໄດ້ປຶກສາຫາລືກ່ຽວກັບ ການສ້າງຮ່າງແຜນຍຸດທະສາດ ທ່ອງທ່ຽວອາຊຽນ ຫລັງປີ 2025 ແລະ ທິດທາງການຮ່ວມມື ກັບບັນດາປະເທດຄູ່ຮ່ວມ ເຈລະຈາ, ອົງການທ່ອງທ່ຽວໂລກ ແລະ ຄູ່ ຮ່ວມພັດທະນາຕ່າງໆ. ເຖິງຢ່າງໃດກໍຕາມ, ຕະຫລອດໄລຍະຂອງເປັນເຈົ້າພາບ ກອງປະຊຸມທ່ອງທ່ຽວອາຊຽນ 2024 ທີ່ເລີ່ມຕົ້ນ ມາແຕ່ວັນທີ 22 ຈົນຮອດວັນທີ 27 ມັງກອນນີ້, ສປປ ລາວເຮົາ ໄດ້ເຮັດໜ້າທີ່ຂອງຕົນ ໃນຖານະເປັນເຈົ້າພາບທີ່ດີ, ນັບແຕ່ຂັ້ນຕອນພິທີການ ຕ້ອນຮັບແຂກມາຮ່ວມປະຊຸມ, ສະຖານທີ່ຈັດປະຊຸມ, ບ່ອນຈັດງານວາງສະ ແດງຜະລິດຕະພັນການທ່ອງທ່ຽວ, ບຸກຄະລາກອນຮັບໃຊ້ໃນແຕ່ລະ ໜ້າວຽກ ແລະ ເນື້ອໃນສໍາຄັນຕ່າງໆ ຂອງກອງປະຊຸມຈົນເຮັດໃຫ້ກອງປະຊຸມ ໄດ້ດໍາເນີນໄປດ້ວຍບັນຍາກາດ ທີ່ອົບອຸ່ນໃນທຸກລະດັບ ແລະ ໄດ້ຮັບຜົນ ສໍາເລັດໃນລະດັບຄາດໝາຍວາງໄວ້.
ດັ່ງທີ່, ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ໃຫ້ສໍາພາດຕໍ່ນັກ ຂ່າວສໍານັກຂ່າວສານປະເທດລາວ ໂດຍຕີລາຄາວ່າ: ການເປັນ ເຈົ້າພາບ ຈັດກອງປະຊຸມທ່ອງທ່ຽວອາຊຽນ 2024 ຂອງ ສປປ ລາວ ຄັ້ງນີ້ ແມ່ນມີຜົນສໍາເລັດຕາມລະດັບຄາດຫມາຍວາງໄວ້, ໂດຍສະເພາະແມ່ນພວກເຮົາໄດ້ດໍາເນີນການເປັນເຈົ້າພາບທີ່ດີ, ຜູ້ແທນເຂົ້າຮ່ວມກອງປະຊຸມ ລ້ວນແຕ່ແມ່ນຜູ້ ແທນທາງການ ໃນຫລາຍລະດັບ, ນອກນີ້ຍັງມີຕົວແທນພາກທຸລະກິດທ່ອງທ່ຽວ, ຜູ້ບໍລິການທ່ອງທ່ຽວ ຈາກພາກພື້ນອາຊຽນ ໄດ້ມາພົບແລກປ່ຽນບົດຮຽນ ແລະ ຮ່ວມມືກັນເພື່ອສົ່ງເສີມ ການທ່ອງທ່ຽວ ໃຫ້ຂະຫຍາຍຕົວ ແລະ ອັນ ສໍາຄັນ ແມ່ນກອງປະຊຸມຄັ້ງນີ້ ໄດ້ມີສື່ມວນຊົນທັງພາຍໃນ ແລະ ຕ່າງປະເທດ ເປັນຈໍານວນຫລາຍ ເຂົ້າຮ່ວມເພື່ອຕິດຕາມເກັບກໍາຂ່າວ, ເຊິ່ງມັນສະແດງໃຫ້ເຫັນຄວາມສົນໃຈ ສູງຕໍ່ກອງປະຊຸມ ຄັ້ງນີ້ ແລະ ຈະເປັນຊ່ອງທາງສໍາຄັນ ໃນ ການໂຄສະນາ ເຜີຍແຜ່ປະເທດເຮົາໃຫ້ຊາວໂລກໄດ້ຮັບຮູ້ ແລະ ເຂົ້າມາທ່ອງທ່ຽວ ສປປ ລາວ ນັບມື້ເພີ່ມຂຶ້ນ.
ຂະນະທີ່, ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກ່າວເຖິງຄວາມໝາຍສໍາຄັນ ຂອງວຽກງານທ່ອງທ່ຽວວ່າ: ການທ່ອງທ່ຽວເປັນພາຫະນະຫລັກທີ່ສຳຄັນ ໃນ ການຂັບເຄື່ອນການຂະຫຍາຍຕົວຂອງເສດຖະກິດ, ການພັດທະນາແບບຍືນຍົງ ແລະ ຊຸກຍູ້ສົ່ງເສີມການເຊື່ອມຈອດ ແລະ ການໄປມາຫາສູ່ຂອງປະຊາຊົນໃນທົ່ວໂລກ.
ໂດຍ: ສຸພາສະຫວັນ