10 ສະຖານທີ່ທ່ອງທ່ຽວຂອງນະຄອນຫລວງທີ່ບໍ່ຄວນພາດ
ຂປລ. ນະຄອນຫລວງວຽງຈັນ ເປັນເມືອງທີ່ມີສະເໜ່ເປັນເອກະລັກອຸດົມໄປດ້ວຍວັດທະນະທຳ, ປະຫວັດສາດ, ສິລະປະ ແລະ ຄວາມງົດງາມຂອງທຳມະຊາດແຄມຝັ່ງແມ່ນ້ຳຂອງ ເຊິ່ງເປັນອີກໜຶ່ງຈຸດໝາຍປາຍທາງການທ່ອງທ່ຽວ ຂອງນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ຫລັ່ງໄຫລເຂົ້າມາສໍາຜັດຄວາມສວຍງາມນີ້ຢ່າງບໍ່ຂາດສານໃນແຕ່ລະມື້ ເນື່ອງຈາກວ່າ ນະຄອນຫລວງວຽງຈັນ ເປັນເມືອງຫລວງຂອງປະເທດລາວ ແລະ ມີສະຖານທີ່ທ່ອງທ່ຽວທີ່ມີຊື່ສຽງ ທີ່ດຶງດູດເອົານັກທ່ອງທ່ຽວ ຈາກທົ່ວທຸກມຸມໂລກໃຫ້ມາທ່ອງສປປລາວ. ສະນັ້ນ, ເພື່ອເຮັດໃຫ້ສະຖານທີ່ທ່ອງທ່ຽວ ເປັນທີ່ຮູ້ຈັກຫລາຍຂຶ້ນ. ຄໍລໍາ “ທ່ອງທ່ຽວເມືອງລາວ” ຂໍສະເໜີ 10 ສະຖານທີ່ທ່ອງທ່ຽວໂດດເດັ່ນ ທີ່ທ່ານບໍ່ຄວນພາດເມື່ອມາຢ້ຽມຢາມນະຄອນຫລວງວຽງຈັນ.
- ພະທາດຫລວງວຽງຈັນ:ປູຊະນີຍະສະຖານອັນສັກສິດ ແລະ ເປັນໜຶ່ງໃນສັນຍະລັກອັນສຳຄັນຂອງຊາດລາວ. ພະທາດຫລວງວຽງຈັນ ໄດ້ປະກາຍເປັນສີທອງຄໍາອັນຮຸ່ງເຮືອງ ເຫລືອງເຫລື້ອມ ເຊິ່ງຕັ້ງຢູ່ຢ່າງໂດດເດັ່ນ ແລະ ສະຫງ່າຜ່າເຜີຍ ເຂດເມືອງໄຊເຊດຖາ, ນະຄອນຫລວງວຽງຈັນ, ເປັນພະທາດ ທີ່ບັນຈຸພະສາລິຣິກະທາດ ຂອງພະພຸດທະເຈົ້າ ທັງເປັນສູນ ລວມແຫ່ງ ຈິດວິນຍານ ແລະ ມິ່ງຂວັນອັນລໍ້າຄ່າ ຂອງປວງຊົນລາວທັງຊາດ. ພະທດຫລວງມີຄວາມໂດດເດັ່ນທັງດ້ານສະຖາປັດຕະຍະກຳ, ປະຫວັດສາດ ແລະ ສະສະໜາທີ່ສືບທອດກັນມາຍາວນານ.
- ປະຕູໄຊ: ອະນຸສາວະລີ ສຳຄັນຂອງນະຄອນຫລວງວຽງຈັນ ທີ່ມີສະຖາປັດຕະຍະກຳອັນໂດດເດັ່ນ ປະດັບປະດາດ້ວຍລວດຫລາຍສິລະປະລາວ. ເປັນອີກໜຶ່ງຈຸດທີ່ນັກທ່ອງທ່ຽວນິຍົມໄປຢ້ຽມຊົມ ແລະ ຖ່າຍຮູບ.
- ວັດສີສະເກດ: ເປັນວັດທີ່ເກົ່າແກ່ ມີຄຸນຄ່າສູງທາງດ້ານສິລະປະ ແລະ ປະຫວັດສາດ ທີ່ຍັງຄົງຮັກສາສະພາບເດີມໄວ້ໄດ້. ພາຍໃນວັດມີພະພຸດທະຮູບຈຳນວນຫລາຍ ແລະ ຮູບແບບສິລະປະອັນເປັນເອກະລັກ ໃຫ້ຜູ້ມາຢ້ຽມຊົມໄດ້ສຶກສາຮຽນຮູ້.
- ຫໍພະແກ້ວ: ອະດີດວັດຫລວງທີ່ປັດຈຸບັນກາຍເປັນພິພິທະພັນເກັບຮັກສາວັດຖຸບູຮານ ແລະ ສິລະປະອັນລ້ຳຄ່າ. ເປັນອີກແຫ່ງທີ່ຊ່ວຍໃຫ້ຜູ້ມາຢ້ຽມຊົມເຂົ້າໃຈມໍລະດົກທາງສາສະໜາ ແລະ ສິລະປະຂອງລາວຫລາຍຂຶ້ນ.
- ວັດສີເມືອງ: ວັດທີ່ມີຊື່ສຽງທາງດ້ານຄວາມສັກສິດ ແລະ ເປັນສູນລວມຈິດໃຈຂອງຊາວນະຄອນຫລວງວຽງຈັນໃຫ້ຄວາມເຄົາລົບ ແລະ ສັດທາ, ມີປະຊາຊົນເຂົ້າໄປກາບໄຫວ້ ແລະ ຂໍພອນຢູ່ເປັນປະຈຳ ເຮັດໃຫ້ວັດແຫ່ງນີ້ມີບັນຍາກາດຄຶກຄື້ນ ແລະ ສະທ້ອນໃຫ້ເຫັນເຖິງວິຖີຊີວິດທາງສາສະໜາຂອງຊາວລາວ.
- ສວນວັດຊຽງຄວນ (Buddha Park): ສວນທີ່ມີຮູບປັ້ນພະພຸດທະຮູບ ແລະ ຮູບປັ້ນຕາມຕຳນານພື້ນເມືອງຫລາຍກວ່າ 200 ອົງ, ຕັ້ງຢູ່ແຄມຝັ່ງແມ່ນ້ຳຂອງ. ດ້ວຍຮູບປັ້ນທີ່ມີຮູບຊົງແປກຕາ ແລະ ບັນຍາກາດຫົ່ມເຢັນ ຈຶ່ງເປັນຈຸດທ່ອງທ່ຽວຍອດນິຍົມ ຂອງນັກທ່ອງທ່ຽວພາຍໃນ ແລະ ຕ່າງປະເທດ.
- ຕະຫລາດເຊົ້າ (Talat Sao): ແຫລ່ງຊື້ເຄື່ອງຝາກຂອງຕ້ອນ ແລະ ສິນຄ້າຫັດຖະກຳລາວເຊັ່ນ: ຜ້າໄໝລາວ , ແຜ່ນແພ, ເຄື່ອງເງິນ ແລະ ຂອງທີ່ລະນຶກ. ນັກທ່ອງທ່ຽວສາມາດສຳຜັດບັນຍາກາດການຄ້າຂາຍ ແລະ ສິນຄ້າທ້ອງຖິ່ນ.
- ສວນເຈົ້າອະນຸວົງ ເປັນສວນສາທາລະນະແຄມແມ່ນ້ຳຂອງ ທີ່ເໝາະແກ່ການຍ່າງຫລິ້ນ, ພັກຜ່ອນ ແລະ ອອກກຳລັງກາຍ. ໃນຕອນແລງບໍລິເວນແຫ່ງນີ້ມີບັນຍາກາດສວຍງາມ ເໝາະສຳລັບຊົມທິວທັດ ແລະ ສຳຜັດບັນຍາກາດແຄມຂອງ.
- ທາດດຳ: ເປັນເຈດີບູຮານທີ່ຕັ້ງຢູ່ໃຈກາງນະຄອນຫລວງ. ນອກຈາກຄຸນຄ່າດ້ານປະຫວັດສາດແລ້ວ ຍັງມີຕຳນານເລື່ອງເລົ່າກ່ຽວກັບພະຍານາກທີ່ປົກປັກຮັກສາເມືອງ ເຮັດໃຫ້ເປັນຈຸດໝາຍອີກແຫ່ງທີ່ໜ້າສົນໃຈ.
- ຫໍພິພິຕະພັນສິລະປະລາວ: ແມ່ນຫໍພິພິຕະພັນທີຮວບຮວມຜົນງານສິລະປະ ໂດຍມີຜົນງານແກະສະຫລັກໄມ້ທີ່ໃຫຍ່ ຍິ່ງໃຫຍ່ອັງລັງການທີ່ສຸດແຫ່ງໜຶ່ງໃນປະເທດລາວ ພາຍໃນຫໍພິພິຕະພັນເຕັມໄປດ້ວຍໄມ້ເເກະສະລັກ ພະພຸດທະຮູບ ເເລະ ຮູບແຕ້ມອັນສວຍງາມທີ່ບົ່ງບອກເຖິງຄວາມເປັນເອກກະລັກຂອງລາວ ໂດຍສະຖານທີ່ຕັ້ງຢູ່ເຂດໜອງເຊື່ອມ ບ້ານ ໂນນສະອາດ,ເມືອງ ໄຊທານີ,ນະຄອນຫລວງວຽງຈັນ.
ແນວໃດກໍຕາມ, ສະຖານທີ່ທັງ 10 ແຫ່ງນີ້ ເປັນພຽງສ່ວນໜຶ່ງຂອງແຫລ່ງທ່ອງທ່ຽວໃນນະຄອນຫລວງວຽງຈັນ ຊຶ່ງແຕ່ລະແຫ່ງລ້ວນມີເອກະລັກ, ຄຸນຄ່າດ້ານປະຫວັດສາດ, ວັດທະນະທຳ ແລະ ສິລະປະທີ່ແຕກຕ່າງກັນ. ສຳລັບຜູ້ທີ່ມາຢ້ຽມຢາມນະຄອນຫລວງ ບໍ່ຄວນພາດໂອກາດສຳຜັດຄວາມງາມ ແລະ ສະເໜ່ຂອງເມືອງລາວດ້ວຍຕົນເອງ.