ສ້າງລາຍຮັບ 400 ຕໍ່ປິ ຈາກການປູກຝັງ-ລ້ຽງສັດ ເປັນສິນຄ້າ
ຂປລ. ການຜະລິດກະສິກໍາ ປູກຝັງ-ລ້ຽງສັດ ເປັນອີກໜຶ່ງອາຊີບທີ່ສາມາດສ້າງລາຍຮັບໄດ້ເປັນກອບເປັນກໍາ ແຕ່ຕ້ອງເຮັດແບບມີຫລັກວິຊາການ ເຮັດໃຫ້ເປັນສິນຄ້າ ແລະ ສິນຄ້ານັ້ນ ກໍຕ້ອງເປັນທີ່ຕ້ອງການຂອງຕະຫລາດ ຈຶ່ງຈະສາມາດສ້າງລາຍໄດ້ເປັນກອບເປັນກໍາເໝືອນດັ່ງ ທ່ານ ພັນໂທ ບົວລຽນ ດວງສະຫວັດ ຫົວໜ້າກອງຮ້ອຍປ້ອງກັນຄຸ້ມຂັງ-ດັດສ້າງ ຄອບຄົວຕົວແບບທີ່ປະສົບຜົນສໍາເລັດສູງ ໃນການສ້າງເສດຖະກິດຄອບຄົວ ດ້ວຍອາຊີບເສີມ ປູກຝັງ-ລ້ຽງ ສັດ ສາມາດສ້າງລາຍຮັບໄດ້ 400 ລ້ານກວ່າກີບຕໍ່ປີ.
ທ່ານ ພັນໂທ ບົວລຽນ ດວງສະຫວັດ ຫົວໜ້າກອງຮ້ອຍປ້ອງກັນຄຸ້ມຂັງ-ດັດສ້າງ ໃຫ້ຮູ້ວ່າ: ອາຊີບການປູກຝັງ-ລ້ຽງ ສັດເປັນອີກອາຊີບໜຶ່ງ ທີ່ຕົນເອງຄິດວ່າ ສາມາດສ້າງລາຍຮັບໄດ້ຢ່າງໝັ້ນຄົງ ບອກກັບເປັນພະນັກງານລັດ ຈຶ່ງມີເວລາ ຫວ່າງຫລັງຈາກເລີກວຽກ ແລະ ວັນເສົາ, ອາທິດ ຈຶ່ງຄິດວ່າ ຖ້າເຮົາໃຊ້ເວລາໃຫ້ເກີດປະໂຫຍດຈະເປັນການດີ. ສະນັ້ນ, ຈຶ່ງປຶກສາກັບຄອບຄົວ ວ່າຈະເຮັດຫຍັງດີ ເມື່ອຕົກລົງກັນແລ້ວ ຈຶ່ງເອກະພາບກັນວ່າ ຈະປູກກາເຟ ແລະ ລ້ຽງສັດ ຢູ່ເຂດຕົວເມືອງພູພຽງປາກຊ່ອງ. ເນື່ອງຈາກວ່າ ຕົນເອງເຄີຍເຂົ້າຮ່ວມຖອດຖອນບົດຮຽນ ແລະ ເຕັກນິກການປູກ-ການບົວລະ ບັດຮັກສາຈາກວິຊາການຜູ້ມີຄວາມຊຳນິຊຳນານ ເຮັດໃຫ້ການຈັດຕັ້ງປະຕິບັດຕົວຈິງ ບໍ່ວ່າຈະເປັນການໃສ່ຝຸ່ນ, ການຕັດແຕ່ງກິ່ງ ແລະ ການບໍລິຫານຈັດການສວນ ເປັນໄປຕາມຫລັກວິຊາການຢ່າງມີປະສິດທິພາບ ຈຶ່ງຢາກນໍາເອົາຄວາມຮູ້ທີ່ໄດ້ຮຽນມາ ຈັດຕັ້ງປະຕິບັດໃຫ້ເກີດປະໂຫຍດ. ສະນັ້ນ, ໃນປີ 1999 -2000 ຈຶ່ງໄດ້ລະດົມທຶນຮອນສ່ວນຕົວບວກກັບການກູ້ຢືມຈາກຍາດຕິພີ່ນ້ອງ ເພື່ອຊື້ເບ້ຍກາເຟພັນກາຕີມໍ (Catimor) ແລະ ກາເຟກາງ ມາບຸກເບີກປູກໃນເນື້ອທີ່ 3 ເຮັກຕາ ຢູ່ບ້ານຫລັກ 15 ເມືອງປາກຊ່ອງ. ນອກຈາກພືດເສດຖະກິດຫລັກຢ່າງກາເຟ ທີ່ສາມາດສ້າງລາຍໄດ້ສູງເຖິງ 300 ລ້ານກວ່າກີບຕໍ່ປີແລ້ວ, ຍັງໄດ້ບໍລິຫານພື້ນທີ່ແບບປະສົມປະສານ ດ້ວຍການປູກໄມ້ໃຫ້ໝາກ, ພືດຜັກສວນຄົວ ແລະ ການລ້ຽງສັດ ເປັນຕົ້ນແມ່ນ ລ້ຽງງົວ, ແບ້, ປາ ແລະ ສັດປີກ ຊຶ່ງສາມາດສ້າງລາຍຮັບເສີມຕື່ມອີກກວ່າ 115 ລ້ານກີບຕໍ່ປີ.
ທ່ານ ພັນໂທ ບົວລຽນ ເວົ້າເສີມວ່າ: ພາຍຫລັງທີ່ຫັນມາເຮັດການຜະລິດກຳສິກຳແບບປະສົບປະສານ ເຮັດໃຫ້ຄອບຄົວດີຂຶ້ນກວ່າເມື່ອກ່ອນຫລາຍ ຄອບຄົວມີຢູ່ມີກິນ ທັງມີຄວາມຜາສຸກ-ຖືກຕ້ອງປອງດອງພ້ອມກັນສ້າງເສດຖະກິດຄອບຄົວໃຫ້ດີຂຶ້ນເທື່ອລະກ້າວ ທັງນີ້ກໍຍ້ອນຄວາມອົດທົນ, ດຸໝັ້ນ ແລະ ຫັນໃຊ້ເນື້ອທີ່ໃຫ້ເກີດປະໂຫຍດສູງສຸດ ບໍ່ເຮັດວຽກໜ້າດຽວ ຕ້ອງເຮັດຫລາຍຢ່າງຄຽງຄູ່ກັນໄປ ຈົນສາມາດສ້າງລາຍຮັບໄດ້ຫລາຍຮ້ອຍລ້ານກີບຕໍ່ປີ. ສໍາລັບທິດທາງໃນຕໍ່ໜ້າ ມີແຜນຈະສຸມໃສ່ການຂະຫຍາຍເນື້ອທີ່ປູກກາເຟເພີ່ມຕື່ມ ພ້ອມທັງຍົກລະດັບເຕັກນິກການຂະຫຍາຍພັນສັດລ້ຽງ ແລະ ບົວລະບັດຮັກສາພືດຜັກທີ່ມີຢູ່ແລ້ວ ໃຫ້ໄດ້ຮັບຜົນຜະລິດສູງຂຶ້ນກວ່າເກົ່າ ເພື່ອສ້າງຄວາມໝັ້ນຄົງທາງດ້ານເສດຖະກິດຂອງຄອບຄົວໃຫ້ຍືນຍົງ.