ຂປລ. ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ຕ້ອນຮັບການເຂົ້າຢ້ຽມອຳລາ ຂອງທ່ານ ຟີໂລເມໂນ ອາລິໂຊ ດາ ຄຣູສ (Filomeno Aleixo da Cruz) ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ຕີມໍ-ແລັດສະເຕ ປະຈຳ ສປປ ລາວ ໃນວັນທີ 24 ມິຖຸນາ 2025 ທີ່ສຳນັກງານປະທານປະເທດ ໃນໂອກາດທີ່ສໍາເລັດໜ້າທີ່ການທູດຢູ່ ສປປ ລາວ.

ໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີ ແລະ ຊົມເຊີຍຕໍ່ ທ່ານ ຟີໂລເມໂນ ອາລິໂຊ ດາ ຄຣູສ ທີ່ໄດ້ສໍາເລັດການປະຕິບັດໜ້າທີ່ການທູດ ຢູ່ ສປປ ລາວ ແລະ ໄດ້ຮັບຜົນສໍາເລັດຫລາຍດ້ານ, ພ້ອມທັງຕີລາຄາສູງຕໍ່ສາຍພົວພັນ ມິດຕະພາບທີ່ເປັນມູນເຊື້ອ ແລະ ການຮ່ວມມືອັນດີ ລະ ຫວ່າງ ສປປ ລາວ ແລະ ຕີມໍ-ແລັດສະເຕ ຕະຫລອດໄລຍະ 23 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສາທາລະນະລັດ ປະຊາທິປະໄຕ ຕີມໍ-ແລັດສະເຕ (29 ກໍລະກົດ 2002 ຫາ 20 ກໍລະກົດ 2025) ເຫັນວ່າ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ແມ່ນຢູ່ໃນລະດັບປົກກະຕິດີ ໂດຍສະເພາະ ການແລກປ່ຽນການຢ້ຽມຢາມ ລະຫວ່າງການນໍາສູງສຸດ ຂອງສອງປະເທດ. ສຳລັບການຮ່ວມມື ແລະ ຊ່ວຍເຫລືອ ລະຫວ່າງ ສອງລັດຖະບານ ເຫັນວ່າຕະຫລອດໄລຍະການສ້າງຕັ້ງສາຍ ພົວພັນການທູດ ເປັນຕົ້ນມາ ໄດ້ມີການຊ່ວຍເຫລືອເຊິ່ງກັນ ແລະ ກັນ ເປັນຕົ້ນ ຕີມໍ-ແລັດສະເຕ ໃຫ້ການຊ່ວຍເຫລືອຜູ້ຖືກຜົນກະທົບ ຈາກໄພນໍ້າຖ້ວມຢູ່ເມືອງສະໜາມໄຊ ແຂວງອັດຕະປື ໃນປີ 2018 ຈໍານວນ 750.000 ໂດລາສະຫະລັດ. ສປ ຕີມໍ-ແລັດສະເຕ ຖືກຮັບຮອງຈາກສະມາຊິກ 10 ປະເທດອາຊຽນ ໃຫ້ເປັນຜູ້ສັງເກດການຂອງອາຊຽນ ໃນວັນທີ 11 ພະຈິກ 2022 ແລະ ຖືເປັນໂອກາດອັນດີ ທີ່ທັງສອງປະເທດ ຈະໄດ້ມີການຮ່ວມມືຫລາຍຂຶ້ນ ໃນກອບສອງຝ່າຍ ແລະ ຫລາຍຝ່າຍ ໃນເວທີພາກພື້ນ ແລະ ສາກົນ. ພ້ອມກັນນີ້, ທ່ານຮອງປະທານປະເທດ ໄດ້ສະແດງຄວາມເຊື່ອໝັ້ນວ່າ ພາຍຫລັງທີ່ທ່ານທູດ ຟີໂລເມໂນ ອາລີໂຊ ດາ ຄຣູສ ເດີນທາງກັບຄືນປະເທດແລ້ວ, ທ່ານຈະສືບຕໍ່ສົ່ງເສີມຂະແໜງການ ທີ່ກ່ຽວຂ້ອງທັງສອງຝ່າຍ ເພື່ອຈັດຕັ້ງປະຕິບັດບັນດາຂໍ້ຕົກລົງ ທີ່ສອງຝ່າຍໄດ້ລົງນາມຮ່ວມກັນ, ພ້ອມທັງຊອກຫາຊ່ອງທາງ ໃນການຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ, ກະສິກໍາ, ການນໍາເຂົ້າ ແລະ ສົ່ງອອກນໍ້າມັນ ແລະ ອາຍແກັສ ແລະ ດ້ານອື່ນໆໃນຊຸມປີຕໍ່ໜ້າ.

ໂອກາດດຽວກັນ, ທ່ານ ຟີໂລເມໂນ ອາລິໂຊ ດາ ຄຣູສ ກໍໄດ້ສະແດງຄວາມຂອບໃຈຢ່າງຈິງໃຈມາຍັງ ລັດຖະບານ ແລະ ປະຊາຊົນລາວ ທີ່ໄດ້ອໍານວຍຄວາມສະດວກ ແລະ ໃຫ້ຄວາມຮ່ວມມືເປັນຢ່າງດີ ໃນການເຄື່ອນໄຫວວຽກງານ ແລະ ປະຕິບັດໜ້າທີ່ການທູດຂອງຕົນຢູ່ ສປປ ລາວ ຈົນໄດ້ຮັບຜົນສໍາເລັດຢ່າງຈົບງາມ, ພ້ອມທັງ ຢ້ຳຄືນຄໍາໝາຍໝັ້ນ ຈະສືບຕໍ່ຊຸກຍູ້ບັນດາກະຊວງ ແລະ ຂະແໜງການທີ່ກ່ຽວຂ້ອງຂອງ ຕີມໍ-ແລັດສະເຕ ໃນການຜັນຂະຫຍາຍບັນດາຂໍ້ຕົກລົງ ທີ່ສອງຝ່າຍໄດ້ລົງນາມຮ່ວມກັນ, ເພື່ອປະກອບສ່ວນເຂົ້າໃນ ການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ຂອງສອງປະເທດລາວ ແລະ ຕີມໍ-ແລັດສະເຕ ໃຫ້ໄດ້ຮັບການພັດທະນາ ແລະ ແຕກດອກອອກຜົນຍິ່ງໆຂຶ້ນ.

KPL