ຂປລ. ຫ້ອງວ່າການກະຊວງປ້ອງກັນປະເທດ ສະຫລຸບວຽກງານຮອບດ້ານ ປະຈຳປີ 2024 ແລະ ທິດທາງແຜນການ ປີ 2025 ໃນວັນທີ 8 ມັງກອນ 2025 ໂດຍການເປັນປະທານຂອງ ສະຫາຍ ພົນຈັດຕະວາ ເດືອນສະຫວັນ ສາຍພິມຄຳປະທຸມ ກຳມະການຄະນະພັກກະຊວງ, ຫົວໜ້າຫ້ອງວ່າການ ກະຊວງປ້ອງກັນປະເທດ, ມີຄະນະພັກ-ຄະນະບັນຊາກົມ, ຫ້ອງການ, ບັນດາຫົວໜ່ວຍລັດວິສາຫະກິດ ແລະ ພະນັກງານ-ນັກຮົບຫ້ອງວ່າການກະຊວງ ເຂົ້າຮ່ວມ.

ສະຫາຍ ພົນຈັດຕະວາ ຂາວມະນີ ສີພອນ ຫົວໜ້າກົມຄົ້ນຄວ້າສັງລວມ ຫ້ອງວ່າການກະຊວງປ້ອງກັນປະເທດ ໄດ້ຍົກໃຫ້ເຫັນວຽກງານທີ່ພົ້ນເດັ່ນໃນ 1 ປີຜ່ານມາ ໂດຍໄດ້ສຶກສາອົບຮົມການເມືອງ-ແນວຄິດ ໃຫ້ພະນັກງານ ແລະ ນັກຮົບ, ທົ່ວອົງການຫ້ອງວ່າການກະຊວງ ຮັບຮູ້ເຊື່ອມຊຶມຕໍ່ແນວທາງ ແຜນນະໂຍບາຍຂອງພັກ-ລັດ ໃຫ້ມີຄວາມໜັກແໜ້ນທາງ ດ້ານການເມືອງ, ຊຸກຍູ້ການຜັນຂະຫຍາຍເນື້ອໃນຈິດໃຈ ມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິຄັ້ງທີ V ຂອງຄະນະພັກກະຊວງປ້ອງກັນປະເທດ ກໍຄື ມະຕິຄັ້ງທີ V ຂອງຄະນະພັກອົງການ ຫ້ອງວ່າການກະຊວງ ປິ່ນອ້ອມ 4 ໜ້າທີ່ໃຫຍ່ 26 ແຜນງານ; ໄດ້ເອົາໃຈໃສ່ນໍາພາ-ຊີ້ນໍາ ບັນດາໜ່ວຍງານວິຊາສະເພາະ ໃນການຄົ້ນຄວ້າບັນດາມະຕິ ຂອງກົມການເມືອງສູນກາງພັກ, ຄະນະເລຂາທິການສູນກາງພັກ, ມະຕິ-ຄໍາສັ່ງ ຂອງຄະນະປ້ອງກັນຊາດ-ປ້ອງກັນຄວາມສະຫງົບ ສູນກາງ ເປັນມະຕິຂອງຄະນະພັກກະຊວງ, ເປັນທິດທາງວຽກງານປ້ອງກັນຊາດ; ສະຫລຸບລາຍງານ ແລະ ວາງທິດທາງວຽກງານ ປ້ອງກັນຊາດ ປະຈໍາອາທິດ, ປະຈຳເດືອນ ຂອງກະຊວງປ້ອງກັນປະເທດ, ຫ້ອງວ່າການກະຊວງ; ຄົ້ນຄວ້າ-ຮ່າງບັນດາຄໍາສັ່ງແນະນໍາ, ແຜນການ ເຄື່ອນໄຫວເຮັດວຽກຂອງຄະນະນໍາກະຊວງ, ແຈ້ງການ, ບົດລາຍງານ, ບັນດາບົດຄໍາເຫັນ, ບົດໂອ້ລົມ, ບົດປາໄສຂອງຄະນະນໍາກະຊວງ ແລະ ຂອງການນໍາພັກ-ລັດ, ເປັນເຈົ້າການປະສານສົມທົບ ກັບບັນດາອົງການກ່ຽວຂ້ອງຂອງ ພັກ-ລັດ, ກົມກອງ-ທ້ອງຖິ່ນ; ຕິດຕາມ ແລະ ຊ່ວຍການນໍາກະຊວງປ້ອງກັນປະເທດ ເຄື່ອນໄຫວວຽກງານຢູ່ພາຍໃນ ແລະ ຕ່າງປະເທດ; ກວດແກ້ເອກະສານ, ຊັບຊ້ອນສ້າງສຳເນົາ ແລະ ຈໍລະຈອນເອກະສານເປັນລະບົບ-ວ່ອງໄວ, ຮັກສາໄດ້ຄວາມລັບ ແລະ ມີຄວາມປອດໄພ;ເອົາ ໃຈໃສ່ປະຕິບັດລະບອບນະໂຍບາຍ ແລະ ປະກັນສັງຄົມເປັນປົກກະຕິ, ທົ່ວເຖິງ ແລະ ທັນເວລາ ຕໍ່ພະນັກ ງານ-ນັກຮົບ, ພະນັກງານບຳນານ ທົ່ວຫ້ອງວ່າການກະຊວງຄື: ໄດ້ມອບຫລຽນໄຊ ແລະ ໃບຍ້ອງຍໍສາຍກອງທັບ ໃຫ້ພະນັກງານຫ້ອງວ່າການ ກະຊວງ 251 ສະຫາຍ ແລະ ມອບຫລຽນໄຊ ພິລະອາດຫານຊັ້ນ II, ຊັ້ນ III ໃຫ້ ບຸກຄົນ ແລະ ບໍລິສັດຈໍານວນໜຶ່ງ, ບັນດາຫົວໜ່ວຍທຸລະກິດທີ່ຂຶ້ນ ກັບການຄຸ້ມຄອງຂອງຫ້ອງວ່າການກະຊວງ ກໍໄດ້ເຄື່ອນໄຫວ ເຮັດຕາມພາລະບົດບາດ, ໜ້າທີ່ຂອງຕົນໃນການດໍາເນີນ ທຸລະກິດໃຫ້ມີຄວາມຄ່ອງຕົວ, ມີລາຍຮັບ-ຜົນກຳໄລ, ຮັບປະກັນເງິນເດືອນ, ເງິນສະຫວັດດີການ-ສັງ ຄົມ, ມອບພາສີ-ອາກອນ, ມອບພັນທະໃຫ້ລັດຖະບານ ແລະກະຊວງ, ປະກອບສ່ວນຊ່ວຍເຫລືອສັງຄົມຕາມແຜນການທີ່ວາງໄວ້.

ໂອກາດນີ້, ສະຫາຍ ພົນຈັດຕະວາ ເດືອນສະຫວັນ ສາຍພິມຄຳປະທຸມ ໄດ້ຮຽກຮ້ອງໃຫ້ຄະນະພັກ-ຄະນະບັນຊາ ແຕ່ລະຂັ້ນສຸມໃສ່ຈັດຕັ້ງ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V, ມະຕິວ່າດ້ວຍ 4 ໜ້າທີ່ໃຫຍ່ 26 ແຜນງານຂອງຄະນະພັກ ກະຊວງປ້ອງກັນປະເທດວາງອອກ ໂດຍຕິດພັນກັບມະຕິ ຄັ້ງທີ V ຂອງຄະນະພັກອົງການ ຫ້ອງວ່າການກະຊວງ ໃຫ້ປະກົດຜົນເປັນຈິງ. ພ້ອມນັ້ນ, ຕ້ອງໄດ້ເພີ່ມທະວີການນຳພາຂອງພັກ ຕໍ່ພະນັກງານ-ນັກຮົບທົ່ວຫ້ອງວ່າການກະຊວງ ໃຫ້ມີຄຸນທາດການເມືອງ-ຄຸນສົມບັດສິນທຳປະຕິວັດ, ມີສະຕິຕໍ່ການຈັດຕັ້ງ, ລະບຽບວິໄນ, ສ້າງໃຫ້ມີຖັນແຖວພະນັກງານ ສືບທອດປ່ຽນແທນ; ເອົາໃຈໃສ່ວຽກງານອົບຮົມຫັດແອບ, ຕິດພັນກັບຂະບວນການຂອງພັກ ແລະ ອົງການຈັດຕັ້ງມະຫາຊົນ, ຕ້ານ ແລະ ສະກັດກັ້ນບັນດາ ປະກົດການຫຍໍ້ທໍ້ໃຫ້ຫລຸດໜ້ອຍ-ຖອຍລົງ, ເຊີດຊູນໍ້າໃຈເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ນໍ້າໃຈປະຢັດມັດທະຍັດ, ສຸມໃສ່ສ້າງພະລາທິ ການກັບທີ່, ຂຸດຄົ້ນທ່າແຮງບົ່ມຊ້ອນ ຂອງກົມກອງທ້ອງຖິ່ນເຂົ້າໃນ ການປັບປຸງກໍ່ສ້າງຄ້າຍຄູ, ປົກປັກຮັກສາພາຫະນະວັດຖຸເຕັກນິກ ໃຫ້ສາມາດນໍາໃຊໄດ້ຍາວນານ.

ຂ່າວ: ລີຕ່າ

KPL