KPL
ຂປລ. ກອງປະຊຸມ ສາມັນປະຈຳປີ ຄັ້ງທີ XXIV ລະຫວ່າງຄະນະ ຜູ້ແທນຊາຍແດນ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຄະນະຜູ້ແທນຊາຍແດນ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ໄດ້ໄຂຂຶ້ນ ຢ່າງເປັນທາງການ ແຕ່ວັນທີ 10-12 ກຸມພາ 2015
ຂປລ. ກອງປະຊຸມສາມັນປະຈຳປີ ຄັ້ງທີ XXIV ລະຫວ່າງ ຄະນະຜູ້ແທນຊາຍແດນສາທາລະ ນະລັດ ປະຊາທິປະໄຕ ປະຊາຊົນລາວ ແລະ ຄະນະຜູ້ແທນຊາຍແດນ ແຫ່ງ ສາທາລະນະລັດ-ສັງຄົມນິຍົມຫວຽດນາມ ໄດ້ໄຂຂຶ້ນຢ່າງເປັນທາງການ ແຕ່ວັນທີ 10-12 ກຸມພາ 2015 ຢູ່ນະຄອນຫລວງວຽງຈັນ ສປປ ລາວ, ຄະນະຜູ້ແທນຝ່າຍລາວນຳໂດຍ ສະຫາຍ ສະເຫລີມໄຊ ກົມມະສິດ ລັດຖະມົນຕີຊ່ວຍວ່າການ ກະຊວງການຕ່າງປະເທດ, ຫົວໜ້າຄະນະກຳມະການຊາຍແດນ ລາວ-ຫວຽດນາມ ແລະ ຄະນະຜູ້ແທນຝ່າຍຫວຽດນາມ ນຳໂດຍ ສະຫາຍ ໂຮ່ ຊວນ ເຊີນ ລັດຖະມົນຕີຊ່ວຍວ່າການກະຊວງການຕ່າງປະເທດ, ຫົວໜ້າຄະນະກຳມະການຊາຍແດນຫວຽດນາມ-ລາວ, ມີຜູ້ຕາງໜ້າຈາກບັນດາກະຊວງ ແລະ ຂະແໜງການທີ່ກ່ຽວຂ້ອງຂອງສູນກາງ, ບັນດາຮອງເຈົ້າແຂວງ ແລະ ຜູ້ຕາງໜ້າແຂວງທີ່ກ່ຽວ ຂ້ອງຂອງລາວ ແລະ ຫວຽດນາມ ທີ່ມີຊາຍແດນຕິດຈອດກັນ ເຂົ້າຮ່ວມ.
ໃນກອງປະຊຸມຄັ້ງນີ້ ສອງຝ່າຍໄດ້ຕີລາຄາການຈັດຕັ້ງປະຕິບັດສັນຍາ ວ່າດ້ວຍລະບຽບການຊາຍແດນປະເທດ ລາວ-ຫວຽດນາມ ແລະ ທົບທວນຄືນບັນດາບົດບັນທຶກກອງປະຊຸມສາມັນປະຈຳປີຄັ້ງທີ XXIII ຂອງຄະນະຜູ້ແທນຊາຍແດນ ລາວ-ຫວຽດນາມ ໃນໜຶ່ງປີຜ່ານມາ, ສອງຝ່າຍໄດ້ເອກະພາບກັນວ່າ ສະພາບຕາມບໍລິເວນຊາຍແດນຂອງສອງປະເທດມີຄວາມສະຫງົບໂດຍພື້ນຖານ, ສອງຝ່າຍໄດ້ມີການສົມທົບກັນໃນການປົກປັກຮັກສາ ແລະ ຄຸ້ມຄອງຊາຍແດນຢ່າງເປັນປົກກະຕິ ຈຶ່ງເຮັດໃຫ້ສະພາບຕາມບໍລິເວນຊາຍແດນມີຄວາມສະຫງົບເປັນລະບຽບຮຽບຮ້ອຍດີ ແລະ ພ້ອມດຽວກັນນັ້ນ ກໍໄດ້ຊຸກຍູ້ສົ່ງເສີມການພັດທະນາພື້ນຖານໂຄງລ່າງ ຢູ່ຕາມບໍລິເວນຊາຍແດນຂອງສອງປະເທດ, ໄດ້ຍົກລະດັບດ່ານ ແລະ ເປີດດ່ານຊາຍແດນ ເພື່ອອຳນວຍຄວາມສະດວກໃຫ້ແກ່ການໄປມາຫາສູ່, ການຊື້ ຂາຍແລກປ່ຽນສິນຄ້າ ຕາມບໍລິເວນຊາຍແດນມີມູນຄ່າເພີ່ມຂຶ້ນ ເຊິ່ງໃນປີຜ່ານມາບັນລຸເຖິງ 15 ຕື້ໂດລາສະຫະລັດ, ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນຊາຍແດນດີຂຶ້ນເທື່ອລະກ້າວ.
ສອງຝ່າຍຍັງໄດ້ຕີລາຄາສູງ ເຖິງຜົນສຳເລັດຂອງການຈັດຕັ້ງປະຕິບັດໂຄງການປັກຫລັກໝາຍຖີ່ ແລະ ບູລະນະລະບົບຫລັກໝາຍຊາຍແດນປະເທດ ລາວ-ຫວຽດນາມ ໃນປີ 2014 ຜ່ານມາ ເຊິ່ງ ສາມາດດຳເນີນການກໍ່ສ້າງຫລັກໝາຍ ແລະ ຫລັກໝາຍທິດເນັ່ງເສັ້ນຊາຍແດນສຳເລັດຢ່າງສົມບູນ ພ້ອມທັງໄດ້ເປັນເອກະພາບກັນຕໍ່ຜົນການຄິດໄລ່ຄ່າພິກັດ ທີ່ໄດ້ວັດແທກດ້ວຍເຄື່ອງ GPS ລະບົບສອງຄື້ນ ເພື່ອບັນຈຸເຂົ້າໃນເອກະສານທາງດ້ານກົດໝາຍ ໃຫ້ແກ່ຫລັກໝາຍທີ່ສຳເລັດຈຳນວນ 905 ຈຸດ/ 1002 ຫລັກໝາຍ. ນອກຈາກນັ້ນ ສອງຝ່າຍຍັງໄດ້ຕົກລົງທີ່ຈະສືບຕໍ່ປະສານສົມທົບຈັດຕັ້ງປະຕິບັດບັນ ດາໜ້າວຽກທີ່ຍັງເຫລືອໃຫ້ສຳເລັດໃນເດືອນຕຸລາປີ 2015 ແລະ ສູ້ຊົນໃຫ້ໄດ້ລົງນາມເອກະສານທາງດ້ານກົດໝາຍ ລວມທັງສັນຍາວ່າດ້ວຍການຄຸ້ມຄອງຊາຍແດນ ແລະ ດ່ານຊາຍແດນ (ສະບັບໃໝ່) ໃນທ້າຍເດືອນທັນວາ 2015.
ກອງປະຊຸມຄັ້ງນີ້ ສອງຝ່າຍໄດ້ປຶກສາຫາລືກ່ຽວກັບການຈັດຕັ້ງປະຕິບັດຂໍ້ຕົກລົງ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ວ່າດ້ວຍການແກ້ໄຂບັນຫາຍົກຍ້າຍຕັ້ງພູມລຳເນົາຕາມລຳພັງໃຈ ແລະ ແຕ່ງງານບໍ່ຖືກລະບຽບຢູ່ຕາມບໍລິເວນຊາຍແດນ ລາວ- ຫວຽດນາມ ເຊິ່ງສອງຝ່າຍຈະເພີ່ມທະວີວຽກງານຊີ້ນຳ, ປະສານສົມທົບ ລະຫວ່າງ ບັນດາກະຊວງ, ຂະແໜງການສູນກາງຂອງສອງປະເທດ ເພື່ອຊີ້ນຳອຳນາດການປົກຄອງບັນດາແຂວງຊາຍແດນຂອງສອງປະເທດ ຈັດຕັ້ງປະຕິບັດວຽກດັ່ງກ່າວ ໃຫ້ມີປະສິດທິຜົນ ແລະ ຖືກຕ້ອງຕາມແຜນການຂັ້ນຕອນທີ່ທັງສອງຝ່າຍໄດ້ເປັນເອກະພາບກັນ ແລະ ສູ້ຊົນປະຕິບັດວຽກດັ່ງກ່າວໃຫ້ສຳເລັດໃນທ້າຍປີ 2015.
ສອງຝ່າຍຍັງໄດ້ປຶກສາຫາລື ກ່ຽວກັບການພັດທະນາດ່ານ, ຊຸກຍູ້ພາກສ່ວນກ່ຽວຂ້ອງໃນການສົ່ງເສີມການຄ້າຊາຍແດນ ເພື່ອປະກອບສ່ວນເຂົ້າໃນການພັດທະນາເສດ ຖະກິດ-ສັງຄົມ ຢູ່ບໍລິເວນຊາຍແດນ. ພ້ອມກັນນັ້ນ ສອງຝ່າຍຍັງໄດ້ຮ່ວມກັນວາງແຜນການຈັດຕັ້ງປະຕິບັດ ວຽກງານຊາຍແດນໃນສົກປີຕໍ່ໜ້າ.
ໃນໄລຍະເຂົ້າຮ່ວມກອງປະຊຸມໃນຄັ້ງນີ້ ຄະນະຜູ້ແທນຂອງ ສສ ຫວຽດນາມ ໄດ້ເຂົ້າຢ້ຽມຄຳນັບ ສະຫາຍ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ໃນການເຂົ້າພົບຄັ້ງນີ້ ໄດ້ດຳເນີນໄປດ້ວຍໄມຕີຈິດມິດຕະພາບຖານສະຫາຍອ້າຍນ້ອງ ແລະ ຄວາມສະໜິດສະໜົມ ນອກຈາກນີ້ ຄະນະຍັງໄດ້ທ່ຽວຊົມສະຖານທີ່ສຳຄັນທາງປະຫວັດສາດ, ພື້ນ ຖານການຜະລິດ ແລະ ທ່ອງທ່ຽວຕົວເມືອງນະຄອນຫລວງວຽງຈັນອີກດ້ວຍ./.
KPL
