KPL
ປະເທດ ສະຫະພັນລັດ ມາເລເຊຍ (Federation of Malaysia) ຫລື ເອີ້ນວ່າ ມາເລເຊຍ(Malaysia) ມີນະຄອນຫລວງ ຊື່ວ່າ ກົວລາລຳເປີ(Kualalampur), ຕັ້ງຢູ່ໃນເຂດເສັ້ນສູນສູດ ປະກອບດ້ວຍ ດິນແດນ ສອງສ່ວນ ໂດຍມີ ທະເລຈີນໃຕ້ຂັ້ນ ລະຫວ່າງ ມາເລເຊຍຕາເວັນຕົກ ແລະ ມາເລເຊຍຕາເວັນອອກ, ມີເນື້ອທີ່ລວມ 329.847 ກິໂລຕາແມັດ ໃຫຍ່ເປັນອັນດັບ 5 ຂອງ ປະເທດສະມາຊິກ ອາຊຽນ, ກວມເອົາ ປະຊາກອນ ເກືອບ34 ລ້ານຄົນ
![](https://kpl.gov.la/Media/Upload/News/Thumb/2024/07/01/Untitled-2600.jpg)
ປະເທດ ສະຫະພັນລັດ ມາເລເຊຍ (Federation of Malaysia) ຫລື ເອີ້ນວ່າ ມາເລເຊຍ(Malaysia) ມີນະຄອນຫລວງ ຊື່ວ່າ ກົວລາລຳເປີ(Kualalampur), ຕັ້ງຢູ່ໃນເຂດເສັ້ນສູນສູດ ປະກອບດ້ວຍ ດິນແດນ ສອງສ່ວນ ໂດຍມີ ທະເລຈີນໃຕ້ຂັ້ນ ລະຫວ່າງ ມາເລເຊຍຕາເວັນຕົກ ແລະ ມາເລເຊຍຕາເວັນອອກ, ມີເນື້ອທີ່ລວມ 329.847 ກິໂລຕາແມັດ ໃຫຍ່ເປັນອັນດັບ 5 ຂອງ ປະເທດສະມາຊິກ ອາຊຽນ, ກວມເອົາ ປະຊາກອນ ເກືອບ34 ລ້ານຄົນ (ໃນປີ 2022) ມີຊາຍແດນທິດເໜືອ ຕິດກັບໄທ; ທິດໃຕ້ຕິດກັບ ສິງກະໂປ; ທິດຕາເວັນອອກ ສ່ຽງເໜືອຕິດກັບ ຟີລິບປິນ ແລະທິດຕາເວັນຕົກຕິດກັບ ຊ່ອງແຄບມະລາກາ ແລະ ເກາະສຸມາຕາ ຂອງ ປະເທດອິນໂດເນເຊຍ. ປະຊາຊົນສ່ວນໃຫຍ່ນັບຖືສາສະໜາ ອິສລາມ; ພາສາທາງການ ມາເລເຊຍ; ໃຊ້ສະກຸນເງິນ ຣິງກິດ(Ringgit). ສ່ວນວັນຊາດ ແມ່ນວັນທີ 31 ສິງຫາ.
ເສດຖະກິດມາເລເຊຍ ມີການເຕີບໂຕຢ່າງຕໍ່ເນື່ອງ ເປັນປະເທດອຸດສາຫະກຳໃໝ່ ທີ່ ກ້າວໜ້າແຫ່ງໜຶ່ງໃນອາຊີຕາເວັນອອກສ່ຽງໃຕ້ ຖັດຈາກ ສິງກະໂປ ໂດຍມີ ລວມຍອດ ຜະລິດຕະພັນພາຍໃນ(GDP) ບັນລຸ 407 ຕື້ໂດລາສະຫະລັດ(ໃນປີ 2022); ສະເລ່ຍຕໍ່ຫົວຄົນເກືອບ 12 ພັນໂດລາສະຫະລັດຕໍ່ປີ; ອັດຕາການຈະເລີນເຕີບໂຕ 8,7% ຕໍ່ປີ. ມູນຄ່າການສົ່ງອອກສິນຄ້າແມ່ນ 889.320 ລ້ານໂດລາສະຫະລັດ ຕໍ່ປີ; ສິນຄ້າສົ່ງອອກ ສຳຄັນລວມມີສິນຄ້າ ເອເລັກໂຕຣນິກ, ຜະລິດຕະພັນ ປິໂຕຣລ່ຽມ, ຜະລິດຕະພັນຢາງພາລາ, ນໍ້າມັນປາມ, ຜະລິດຕະພັນເຄມີ. ມູນຄ່າການນໍາເຂົ້າ 712.990 ລ້ານໂດລາສະຫະລັດ ຕໍ່ປີ; ສິນຄ້າທີ່ນຳເຂົ້າ ເຊັ່ນ: ອຸປະກອນໄຟຟ້າ, ນ້ຳມັນດີບ, ເຫລັກ, ຢາງ, ລົດ, ເຄື່ອງຈັກອຸດສາຫະກຳ ແລະ ອຸປະກອນໂລຫະ. ສ່ວນປະເທດຄູ່ການຄ້າ ທີ່ສຳຄັນມີ: ຈີນ, ສິງກະໂປ, ສ.ອາເມລິກາ,ຍີ່ປຸ່ນ, ໄທ , ສ.ເກົາຫລີ ແລະ ເຂດໄຕ້ຫວັນ(ຈີນ) ຕາມລະດັບ.
![](https://kpl.gov.la/Media/Upload/News/Thumb/2024/07/01/Untitled-3600.jpg)
ນອກຈາກນີ້ ຍັງມີແຫລ່ງທ່ອງທ່ຽວ ທີ່ ສຳຄັນຫລາຍແຫ່ງຄື: ອາຄານແຝດ ເປໂຕຣນັສ(Petronas Twin Tower) ປະກອບດ້ວຍ 88 ຊັ້ນ ແລະ ມີຄວາມສູງທ່ີສຸດໃນໂລກເຖິງ 452 ແມັດ; ສະໜາມເມີເດກາ (Merdeka Square), ເປັນທີ່ຕັ້ງຂອງເສົາທຸງ ປະຈຳຊາດສູງທີ່ສຸດ ໃນໂລກ ແລະ ວັດມຸດສະລິມ ທ່ີມີການປະດັບ ຕົບແຕ່ງຢ່າງສວຍງາມ, ສວນທະເລສາບ ແລະ ອື່ນໆ.
ປະເທດສປປລາວ ແລະ ປະເທດມາເລເຊຍ ມີສາຍພົວພັນທາງການທູດ ຮ່ວມກັນນັບແຕ່ວັນທີ 1.7.1966 ເປັນຕົ້ນມາ, ຊຶ່ງທັງສອງຝ່າຍ ໄດ້ຕີລາຄາຜົນສຳເລັດ ແຫ່ງການພົວພັນ ຮ່ວມມືລະຫວ່າງ ສອງລັດຖະບານ ກໍ່ຄືປະຊາຊົນ ສອງຊາດລາວ-ມາເລເຊຍ, ຊຶ່ງໃນໄລຍະຜ່ານມາ ສາຍພົວພັນ ມິດຕະພາບ ແລະ ການຮ່ວມມື ອັນດີງາມ ລະຫວ່າງ ສອງປະເທດ ແມ່ນໄດ້ຮັບການເສີມສ້າງ ແລະ ຂະຫຍາຍຕົວ ຢ່າງຕໍ່ເນື່ອງ ເທິງພື້ນຖານ ຄວາມໄວ້ເນື້ອເຊື່ອໃຈ, ເຄົາລົບເຊິ່ງກັນ ແລະ ກັນ, ຄວາມປາຖະໜາດີ ແລະ ຄວາມເຂົ້າອົກເຂົ້າໃຈ ສະແດງອອກ ໃນການພົວພັນ ຮ່ວມມື ດ້ານການເມືອງ, ການທະຫານ, ເສດຖະກິດ, ວັດທະນະທຳ, ການສຶກສາ ແລະ ກິລາ, ການພົວພັນ ຢ່າງໃກ້ຊິດ ລະຫວ່າງ ປະຊາຊົນສອງຊາດ ແລະ ການແລກປ່ຽນ ຢ້ຽມຢາມຂອງ ຜູ້ນຳຂັ້ນສູງ ແລະ ບັນດາກະຊວງ ຂະແໜງການຕ່າງໆຂອງສອງປະເທດ.ໂດຍສອງຝ່າຍ ຕ່າງກໍ່ສະແດງຄວາມມຸ້ງຫວັງ ທີ່ຈະສືບຕໍ່ເສີມສ້າງ ແລະ ຮັດແໜ້ນການພົວພັນ ມິດຕະພາບ ອັນດີງາມລະຫວ່າງ ສອງປະເທດ ໃຫ້ນັບມື້ແຕກດອກອອກຜົນ ແລະ ເຕີບໃຫຍ່ ຂະຫຍາຍຕົວ ຍິ່ງຂຶ້ນ ໃນຕໍ່ໜ້າ ເພື່ອຜົນປະໂຫຍດ ຮ່ວມກັນຂອງ ສອງປະເທດ, ເພື່ອສັນຕິພາບ, ສະຖຽນລະພາບ, ມິດຕະພາບ ການຮ່ວມມື ເພື່ອພັດທະນາ ໃນພາກພື້ນ ແລະ ໃນໂລກ.
ໂດຍ: ດາວັນ
KPL