*ເປັນຂ່າວດີສໍາລັບ ສປປ ລາວ ແລະ ອາຊຽນ ເພື່ອສົ່ງເສີມການທ່ອງທ່ຽວ ແລະ ຕ້ອນຮັບການເປັນປະທານອາຊຽນ ປີ  2024 ນີ້ໃຫ້ມີບັນຍາກາດຟົດຟື້ນ. ດັ່ງທີ່ຮູ້ນໍາກັນ, ໃນລະຫວ່າງ ເດືອນພະຈິກ 2024 ທີ່ຈະມາເຖິງ ນີ້, ສປປ ລາວ ໄດ້ຮັບກຽດເປັນພາບຈັດເທສະການດົນຕີສາກົນ ອາຊຽນ-ສ ເກົາຫລີ ປະຈຳປີ 2024 (2024 ROUND) ພາຍໃຕ້ແນວຄວາມຄິດ “Step Out, Sing As One” ເນັ້ນໜັກສົ່ງເສີມການທ່ອງທ່ຽວ ແລະ ສ້າງຄວາມສຳພັນ ທາງວັດທະນະທຳ ແລະ ເປັນຂົວເຊື່ອມຄວາມເຂົ້າໃຈອັນດີ ລະຫວ່າງ ບັນດາປະເທດສະມາຊິກອາຊຽນ ແລະ ສ ເກົາຫລີ ຜ່ານດົນຕີ ແລະ ສຽງເພງ.

    ເທສະການດົນຕີສາກົນໃນຄັ້ງນ້ີ, ຈັດຂ້ຶນໂດຍສະຖານີໂທລະພາບ ເຄບີເອສ (KBS) ຂອງປະເທດ ສ ເກົາຫລີ ພາຍໃຕ້ການຮ່ວມມືກັບກອງທຶນຮ່ວມມື ອາຊຽນ-ສ ເກົາຫລີ (AKCF). ໃນຄັ້ງນີ້, ຖືເປັນຄັ້ງທີ IV ນັບຕັ້ງແຕ່ມີການຈັດເທສະການດົນຕີສາກົນຄັ້ງທຳອິດ ໃນປີ 2020.ສະຖານທີ່ໃນການຈັດເທສະການດົນຕີສາກົນ ອາຊຽນ-ເກົາຫລີ ຈະໝູນວຽນໄປຕາມແຕ່ລະປະເທດສະມາຊິກອາຊຽນ ເຊ່ິງໃນປີນ້ີ, ສປປ ລາວ ຂອງພວກເຮົາຈະໄດ້ຮັບກຽດເປັນເຈົ້າພາບໃນຖານະເປັນປະທານອາຊຽນ. ຫລັງຈາກທີ່ຕ້ອງພັກເຊົາຊົ່ວຄາວສາມປີ, ເນື່ອງຈາກສະຖານະການແພ່ລະບາດຂອງພະຍາດ COVID-19 ເທສະການດົນຕີສາກົນ ອາຊຽນ-ສ ເກົາຫລີ ກໍກັບມາຄຶກຄື້ນອີກຄັ້ງ ດ້ວຍການຈັດໃນຮູບແບບອອຟລາຍ ຄັ້ງທຳອິດ ໃນປີ 2023 ທີ່ນະຄອນຫລວງຈາກາຕາປະເທດອິນໂດເນເຊຍ, ດຶງດູດມວນຊົນກວ່າ 2.000 ຄົນ ເຂົ້າຮ່ວມສ້າງຄວາມປະທັບໃຈ ແລະ ສຽງຕອບ ຮັບຢ່າງລົ້ນເຫລືອ.

   ເທສະການດົນຕີສາກົນ 2024 ROUND ມີຄວາມສຳຄັນຢ່າງຍິ່ງສຳລັບບັນດາປະເທດສະມາຊິກ ອາຊຽນ ແລະ ປະເທດ ສ ເກົາຫລີ ເນື່ອງໃນໂອກາດ ຄົບຮອບ 35 ປີ ຂອງຄວາມສຳພັນອາຊຽນ-ສ ເກົາຫລີ ທີ່ສະຖາປະນາຮ່ວມກັນ ໃນປີ 1989 ເລີ່ມຕົ້ນພັດທະນາຄວາມຮ່ວມມືແບບສະເພາະດ້ານສູ່ຄວາມຮ່ວມມືແບບກວ້າງຂວາງ ແລະ ກ້າວເຂ້ົາສູ່ຄວາມຮ່ວມມືດ້ານຍຸດທະສາດຈົນເຖິງທຸກມື້ນີ້ ບໍ່ວ່າຈະເປັນດ້ານການທູດ, ຄວາມໝັ້ນຄົງ, ວັດທະນະທຳ, ເສດຖະກິດ  ແລະ ໃນດ້ານອື່ນໆ. ເທສະການດົນຕີສາກົນອາຊຽນ- ສ ເກົາຫລີ ປະຈຳປີ 2024 (2024 ROUND) ຈຶ່ງເປັນອີກເວທີໜຶ່ງທີ່ມີສຳຄັນໃນການສົ່ງເສີມຄວາມສຳພັນອັນດີ, ຄວາມເຂົ້າໃຈ ແລະ ຮັດແໜ້ນມິດຕະພາບລະຫວ່າງບັນດາປະເທດສະມາຊິກອາຊຽນ ແລະ ປະເທດເກົາຫລີໃຕ້ຜ່ານທຳນອງສຽງເພງທີ່ບໍ່ມີພົມແດນກີດຂວາງ.

ໂດຍ: ເກີດຂວັນໃຈ ມາລີຈັນສີ

KPL