KPL
ກົມສິ່ງແວດລ້ອມ, ກະຊວງກະສິກຳ ແລະ ສິ່ງແວດລ້ອມ ຮ່ວມກັບສະຖາບັນການເຕີບໂຕສີຂຽວໂລກ (GGGI) ແລະ ອົງການພັດທະນາແຫ່ງສະຫະປະຊາຊາດ (ສປຊ) ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ຈັດສຳມະນາກະກຽມຄະນະຜູ້ແທນ ສປປ ລາວ ກ່ອນເຂົ້າຮ່ວມກອງປະຊຸມລັດພາຄີສົນທິສັນຍາຂອບວຽກສະຫະປະຊາຊາດ ວ່າດ້ວຍການປ່ຽນແປງດິນຟ້າອາກາດ ຄັ້ງທີ 31 (COP31) ເພື່ອປະສານບຸລິມະສິດ ແລະ ກຳນົດຈຸດຢືນຂອງຊາດໃຫ້ມີຄວາມຊັດເຈນ ແລະ ເປັນເອກະພາບ ໂດຍມີ ທ່ານ ນາງ ຈັນທະຄອນ ບົວລະພັນ ຮອງລັດຖະມົນຕີກະຊວງກະສິກຳ ແລະ ສິ່ງແວດລ້ອມ, ທ່ານ ນາງ ອາຍຊານີ ເມດາກັງໂກດາ ລາເບ ຜູ້ຕາງໜ້າ ສປຊ ປະຈຳ ສປປ ລາວ, ທ່ານ ນາງ ໂອຢ່າ ຢ່າຊາຣ ເອກອັກຄະລັດຖະທູດຕວັກກີ ປະຈຳ ສປປ ລາວ, ມີຜູ້ຕາງໜ້າຈາກເອກອັກຄະລັດຖະທູດອົດສະຕຣາລີ ປະຈຳ ສປປ ລາວ, ຜູ້ຕາງໜ້າສະຖາບັນເຕີບໂຕສີຂຽວສາກົນ (GGGI) ປະຈຳ ສປປ ລາວ, ພ້ອມດ້ວຍຜູ້ຕາງໜ້າຈາກບັນດາກະຊວງ, ຂະແໜງການ, ສະຖານທູດ, ອົງການສາກົນ ແລະ ຄູ່ຮ່ວມພັດທະນາ ເຂົ້າຮ່ວມ.
ຈຸດປະສົງຫຼັກຂອງກອງປະຊຸມສຳມະນາ ແມ່ນເພື່ອກະກຽມຄວາມພ້ອມດ້ານເນື້ອໃນ, ທັດສະນະ, ຈຸດຢືນ ແລະ ບຸລິມະສິດແຫ່ງຊາດຂອງ ສປປ ລາວ ສຳລັບການເຈລະຈາໃນ COP31, ພ້ອມທັງປຶກສາຫາລືບັນຫາພົ້ນເດັ່ນທີ່ຄາດວ່າຈະຍົກຂຶ້ນໃນກອງປະຊຸມ COP31 ແລະ ທັງເປັນການໂຄສະນາເຜີຍແຜ່ວຽກງານການປ່ຽນແປງດິນຟ້າອາກາດໃຫ້ແກ່ພາກສ່ວນຕ່າງໆ ໂດຍສະເພາະແມ່ນວຽກງານການຮ່ວມມືພາຍໃຕ້ຂອບສົນທິສັນຍາ.
ທ່ານ ນາງ ຈັນທະຄອນ ບົວລະພັນ ໄດ້ກ່າວວ່າ: ລັດຖະບານ ສປປ ລາວ ໃຫ້ຄວາມສຳຄັນຕໍ່ການແກ້ໄຂບັນຫາການປ່ຽນແປງດິນຟ້າອາກາດ ແລະ ມີຄວາມພະຍາຍາມຢ່າງຈິງຈັງໃນການດຳເນີນມາດຕະການທັງພາຍໃນປະເທດ ແລະ ຮ່ວມມືກັບປະຊາຄົມໂລກ ເພື່ອຮັບມືກັບສິ່ງທ້າທາຍດັ່ງກ່າວ. ສປປ ລາວ ໄດ້ມີສ່ວນຮ່ວມໃນຂອບການຮ່ວມມືສາກົນດ້ານສິ່ງແວດລ້ອມ ແລະ ສະພາບອາກາດ ໂດຍໄດ້ເຂົ້າເປັນພາຄີຂອງສົນທິສັນຍາສະຫະປະຊາຊາດ ວ່າດ້ວຍການປ່ຽນແປງດິນຟ້າອາກາດ (UNFCCC) ໃນປີ 1995, ອະນຸສັນຍາກຽວໂຕ (Kyoto Protocol) ໃນປີ 2003 ແລະ ສັນຍາປາຣີ (Paris Agreement) ໃນປີ 2016. ນອກນີ້, ລາວຍັງສືບຕໍ່ປະກອບສ່ວນໃນການຈັດຕັ້ງພັນທະພາຍໃຕ້ຂອບສົນທິສັນຍາ ໂດຍຄຳນຶງເຖິງຫຼັກການຄວາມຮັບຜິດຊອບຮ່ວມກັນ ແຕ່ແຕກຕ່າງກັນຕາມຄວາມສາມາດຂອງແຕ່ລະປະເທດ. ການເຂົ້າຮ່ວມ COP31 ບໍ່ພຽງແຕ່ເປັນການປະຕິບັດພັນທະຂອງປະເທດຕໍ່ປະຊາຄົມສາກົນເທົ່ານັ້ນ ແຕ່ຍັງເປັນໂອກາດສຳຄັນໃຫ້ ສປປ ລາວ ສາມາດສະແຫວງຫາການສະໜັບສະໜູນດ້ານເຕັກນິກ, ວິຊາການ ແລະ ງົບປະມານ ເພື່ອເພີ່ມທະວີປະສິດທິຜົນໃນການດຳເນີນວຽກງານດ້ານການປ່ຽນແປງດິນຟ້າອາກາດພາຍໃນປະເທດ.
ໃນກອງປະຊຸມ, ຜູ້ເຂົ້າຮ່ວມຍັງໄດ້ແລກປ່ຽນຄວາມຄິດເຫັນກ່ຽວກັບການລະດົມຊັບພະຍາກອນ, ການເສີມສ້າງຂີດຄວາມສາມາດຂອງສະຖາບັນ, ການປັບປຸງການເຂົ້າເຖິງເຕັກໂນໂລຊີ ແລະ ການເສີມສ້າງຄວາມຢືດຢຸ່ນຕໍ່ຜົນກະທົບຈາກສະພາບອາກາດ ໂດຍເນັ້ນໃຫ້ເຫັນເຖິງຄວາມຈຳເປັນໃນການປະສານງານລະຫວ່າງພາກລັດ ແລະ ຄູ່ຮ່ວມພັດທະນາ, ການຂະຫຍາຍໂອກາດເຂົ້າເຖິງແຫຼ່ງທຶນດ້ານສະພາບອາກາດ ແລະ ການເພີ່ມພູນການຮ່ວມມືສາກົນ.
ການກະກຽມດັ່ງກ່າວ, ຄາດວ່າຈະຊ່ວຍໃຫ້ ສປປ ລາວ ມີຈຸດຢືນທີ່ຊັດເຈນໃນເວທີເຈລະຈາສາກົນ, ສາມາດປະສານບຸລິມະສິດດ້ານສະພາບອາກາດໃຫ້ສອດຄ່ອງກັບເປົ້າໝາຍການພັດທະນາແຫ່ງຊາດ ແລະ ນຳເອົາຄຳໝັ້ນສັນຍາດ້ານສະພາບອາກາດໄປສູ່ການປະຕິບັດຢ່າງເປັນຮູບປະທຳ ເພື່ອສ້າງຄວາມຢືດຢຸ່ນ ແລະ ການພັດທະນາທີ່ຍືນຍົງໃຫ້ແກ່ປະເທດ.
ກອງປະຊຸມລັດພາຄີສົນທິສັນຍາຂອບວຽກສະຫະປະຊາຊາດ ວ່າດ້ວຍການປ່ຽນແປງດິນຟ້າອາກາດ ຄັ້ງທີ 31 ຈະຈັດຂຶ້ນທີ່ເມືອງອັນຕາລະຢາ ປະເທດຕວັກກີ ໃນວັນທີ 9-20 ພະຈິກ 2026, ຄາດວ່າຈະເນັ້ນໜັກໃສ່ການປ່ຽນຄຳໝັ້ນສັນຍາດ້ານສະພາບອາກາດໃຫ້ເປັນການປະຕິບັດຢ່າງເປັນຮູບປະທຳ, ການເລັ່ງຫັນປ່ຽນໄປສູ່ພະລັງງານສະອາດ, ການລະດົມທຶນ ແລະ ການລົງທຶນດ້ານສະພາບອາກາດ, ການເສີມສ້າງການປັບຕົວ ແລະ ຄວາມຢືດຢຸ່ນຕໍ່ຜົນກະທົບຈາກສະພາບອາກາດ ຕະຫຼອດຮອດການຊຸກຍູ້ການຈັດຕັ້ງປະຕິບັດການປະກອບສ່ວນທີ່ປະເທດກຳນົດເອງ (NDCs) ແລະ ຮັກສາເປົ້າໝາຍຈຳກັດການເພີ່ມຂຶ້ນຂອງອຸນຫະພູມໂລກບໍ່ໃຫ້ເກີນ 1,5 ອົງສາ.
KPL
