ຂປລ
ຂປລ. ໃນວັນທີ 22 ມັງກອນ 2025, ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ມາກ ແອນເດຣ ພລັອສ (Mr. Marc Andre Prost) ຜູ້ຕາງໜ້າອົງການອາຫານໂລກ (World Food Programme ຫລື WFP) ປະຈໍາ ສປປ ລາວ ພ້ອມ ດ້ວຍຄະນະ.
ຂປລ. ໃນວັນທີ 22 ມັງກອນ 2025, ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ມາກ ແອນເດຣ ພລັອສ (Mr. Marc Andre Prost) ຜູ້ຕາງໜ້າອົງການອາຫານໂລກ (World Food Programme ຫລື WFP) ປະຈໍາ ສປປ ລາວ ພ້ອມ ດ້ວຍຄະນະ.
ໂອກາດນີ້, ທ່ານ ລິນຄໍາ ດວງສະຫວັນ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ຜູ້ຕາງໜ້າອົງການອາຫານໂລກ ປະຈໍາ ສປປ ລາວ, ພ້ອມທັງຕີລາຄາສູງຕໍ່ສາຍພົວພັນທີ່ດີ ແລະ ການຮ່ວມມືຊ່ວຍເຫລືອ ຂອງອົງການອາຫານໂລກຢູ່ ສປປ ລາວ ກໍຄື ກະຊວງກະສິກໍາ ແລະ ປ່າໄມ້. ພ້ອມນີ້, ທັງສອງຝ່າຍໄດ້ມີ ການແລກປ່ຽນຄວາມຄິດເຫັນ ກ່ຽວກັບບັນດາໂຄງການຕ່າງໆ ທີ່ອົງການອາຫານໂລກ ໄດ້ໃຫ້ການສະໜັບສະໜູນກະຊວງກະສິກໍາ ແລະ ປ່າໄມ້ ເປັນຕົ້ນ ໂຄງການກະສິກໍາ ເພື່ອໂພຊະນາການ, ໂຄງການຄໍ້າປະກັນສະບຽງອາຫານ ສໍາລັບຊາວສວນກາເຟ ພາຍໃຕ້ທຶນການຮ່ວມມືກັບໜ່ວຍງານ ເສີມສ້າງຄວາມເຂັ້ມແຂງ ດ້ານເສດຖະກິດປະເທດຢີ່ປຸ່ນ ເຊິ່ງແຕ່ລະໂຄງການແມ່ນ ໄດ້ສະໜັບສະໜູນໃຫ້ແກ່ 4 ແຜນງານຫລັກ ຂອງກະຊວງກະສິກໍາ ແລະ ປ່າໄມ້, ພ້ອມທັງສະແດງຄວາມຫວັງວ່າ ອົງການອົງການອາຫານໂລກ ປະຈໍາລາວ ສືບຕໍ່ປະກອບສ່ວນ ແລະ ສະໜັບສະໜູນກະຊວງກະສິກໍາ ແລະ ປ່າ ໄມ້ ໃນການຈັດຕັ້ງປະຕິບັດ 4 ແຜນງານຫລັກ ໃຫ້ບັນລຸຕາມແຜນການ ໂດຍສະເພາະ ແຜນງານຄໍ້າປະກັນດ້ານສະບຽງອາຫານ.
ໂອກາດດຽວກັນ, ທ່ານ ມາກ ແອນເດຣ ພລັອສ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງ ທ່ານ ລິນຄໍາ ດວງສະຫວັນ ພ້ອມທັງໃຫ້ຄໍາໝັ້ນສັນຍາວ່າ ອົງການອາຫານໂລກ ປະຈໍາ ສປປ ລາວ ຈະສືບຕໍ່ເພີ່ມທະວີການຮ່ວມມື ແລະ ໃຫ້ການສະໜັບສະໜູນ ກະຊວງກະສິກໍາ ແລະ ປ່າໄມ້ ໃນການຈັດຕັ້ງປະຕິບັດ ແຜນງານຕ່າງໆ ທີ່ສະໜັບສະໜູນໃຫ້ແກ່ ການບັນລຸແຜນພັດທະນາ ຂອງກະຊວງກະສິກໍາ ແລະ ປ່າໄມ້ ຢ່າງຕັ້ງໜ້າ.
ຂ່າວ: ວິທະຍຸແຫ່ງຊາດ
KPL
