ຂປລ
ຕາດນໍ້ານົ່ວ ແມ່ນນອນໃນ ໜຶ່ງຂອງຫລາຍແຫລ່ງທ່ອງທ່ຽວທໍາມະຊາດທີ່ໜ້າປະທັບໃຈໃນພາກເໜືອຂອງລາວ, ຕັ້ງຢູ່ແຂວງຫົວພັນ, ມີຄວາມເລິກ ວັດແທກໄດ້ຈາກຈຸດສູງນໍ້າຕົກລົງສູ່ພື້ນນໍ້າເຖິງ 80 ແມັດ.
*ຕາດນໍ້ານົ່ວ ແມ່ນນອນໃນ ໜຶ່ງຂອງຫລາຍແຫລ່ງທ່ອງທ່ຽວທໍາມະຊາດທີ່ໜ້າປະທັບໃຈໃນພາກເໜືອຂອງລາວ, ຕັ້ງຢູ່ແຂວງຫົວພັນ, ມີຄວາມເລິກ ວັດແທກໄດ້ຈາກຈຸດສູງນໍ້າຕົກລົງສູ່ພື້ນນໍ້າເຖິງ 80 ແມັດ. ຊຸມປີ 2017-218 ຜ່ານມາ, ແຂວງຫົວພັນ ອະນຸຍາດໃຫ້ບໍລິສັດ ບຸນທະວີຊັບ ກໍ່ສ້າງສ້ອມແປງຂົວທາງ ແລະ ຊົນລະປະທານຈຳກັດລົງທຶນສຳປະທານທີ່ດິນຂອງລັດ ເພື່ອພັດທະນາສ້າງເປັນແຫລ່ງທ່ອງທ່ຽວທຳມະຊາດຕາດນ້ຳນົ່ວຢູ່ບ້ານວັງໄຮ, ບ້ານນາແທ່ນ ແລະ ບ້ານຫາງລ້ອງເມືອງວຽງໄຊ ແຕ່ມາຮອດປັດຈຸບັນນີ້ ໄດ້ສໍາເລັດ ແລະ ເປີດໃຫ້ບໍລິການນັກທ່ອງທ່ຽວແລ້ວ.
ໂຄງການດັ່ງກ່າວ ມີເນື້ອທີ່ດິນທັງໝົດ 183 ກວ່າເຮັກຕາ, ໃນນີ້ເຂດເນື້ອທີ່ການກໍ່ສ້າງ ສຳປະທານຕົວຈິງມີ 8 ເຮັກຕາກວ່າ ແລະ ໄດ້ແບ່ງອອກເປັນ 2 ເຂດຄື: ເຂດກໍ່ສ້າງຖາວອນ ແລະ ເຂດຄຸ້ມຄອງໂຄງການ, ລວມມູນຄ່າການລົງທຶນເກືອບ 6 ລ້ານໂດລາສະຫະລັດໂດຍມີອາຍຸສຳປະທານ 70 ປີ ເມື່ອໝົດກຳນົດແມ່ນສາມາດຕໍ່ໄດ້. ຈຸດປະສົງຂອງການ ສ້າງໂຄງການແມ່ນສ້າງເປັນແຫລ່ງທ່ອງທ່ຽວ ທີ່ສາມາດຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ, ທັງເປັນການປົກປັກຮັກສາທຳມະຊາດ ໃຫ້ມີຄວາມຍືນຍົງຕະຫລອດໄປ ແລະ ເປັນການສ້າງລາຍຮັບທີ່ໝັ້ນຄົງໃຫ້ພໍ່ແມ່ປະຊາຊົນທີ່ຢູ່ເຂດດັ່ງກ່າວ ເຮັດໃຫ້ຊີວິດການເປັນຢູ່ນັບມື້ດີຂຶ້ນ ແລະ ຄ່ອຍໆຫລຸດພົ້ນອອກຈາກຄວາມທຸກຍາກເທື່ອລະກ້າວ.
ຕາດນ້ຳນົ່ວເປັນຕາດນໍ້າຕົກ ທໍາມະຊາດທີ່ອອ້ມລ້ອມເຕັມໄປດ້ວຍພູຜາປ່າດົງ ແລະ ຊີວະນາໆພັນທີ່ຍັງອຸດົມສົມບູນ ເຊິ່ງມັນມີຄວາມສວຍງາມຫລາຍໂດຍສະເພາະຖ້າໄປທ່ຽວໃນໄລຍະທ້າຍລະດູຝົນຈະເຫັນປະລິມານນໍ້າຫລາຍ ແລະ ມີສັດສາວາສິ່ງມາຫລິ້ນຢ່າງຫລວງຫລາຍຍ້ອນວ່າ ເຂດນໍ້າຕົກແຫ່ງນີ້ບໍ່ໄດ້ຢູ່ໃນເສັ້ນທາງຜ່ານໄປມາຫລາຍ ແລະ ບໍ່ແມ່ນເສັ້ນທາງການທ່ອງທ່ຽວທົ່ວໄປ ສະນັ້ນ ມັນຈຶ່ງຍັງຄົງຄວາມງົດງາມ ແລະ ສະຫງົບສຸກໄວ້ຢ່າງດີ.
ຖ້າທ່ານໃດມີຄວາມສົນໃຈຢາກໄປສໍາຜັດມາທາງນີ້ພວກເຮົາຈະແນະນໍາໃຫ້ຮູ້ດັ່ງນີ້: ຕາດນ້ຳນົ່ວ ຕັ້ງຢູ່ກິໂລແມັດທີ 22 ລະຫ່ວາງທາງຈາກຊຳເໜືອ-ວຽງໄຊເປັນທາງປູຢາງສາມາດນັ່ງ ຫລື ຂັບລົດໃຫຍ່ ແລະ ລົດຈັກໄປໄດ້ສະດວກ.
ໂດຍ: ເກີດຂວັນໃຈ
KPL
