ຂປລ
ຄົນເຮົາບໍ່ວ່າຈະເຮັດອາຊີບຫຍັງກໍ່ດີຂໍພຽງມີຄວາມມັກ, ຮັກໃນອາຊີບທີ່ຕົນເຮັດບວກກັບຄວາມດຸໝັ່ນພາກພຽນແນ່ນອນວ່າ ຈະປະສົບຜົນສຳເລັດໄດ້ເໝືອນດັ່ງ ນາງ ແພງສີ ສີສະເກດ ອາຍຸ 56 ປີ ອະດີດຮອງປະທານສະຫະພັນແມ່ຍິງ ເມືອງຕະໂອ້ຍ ແຂວງສາລະວັນ ເຊີ່ງເປັນໜຶ່ງໃນຄອບຄົວຕົວແບບການສ້າງເສດຖະກິດຄອບຄົວດ້ວຍການຕໍ່າຫູກ.
*ຄົນເຮົາບໍ່ວ່າຈະເຮັດອາຊີບຫຍັງກໍ່ດີຂໍພຽງມີຄວາມມັກ, ຮັກໃນອາຊີບທີ່ຕົນເຮັດບວກກັບຄວາມດຸໝັ່ນພາກພຽນແນ່ນອນວ່າ ຈະປະສົບຜົນສຳເລັດໄດ້ເໝືອນດັ່ງ ນາງ ແພງສີ ສີສະເກດ ອາຍຸ 56 ປີ ອະດີດຮອງປະທານສະຫະພັນແມ່ຍິງ ເມືອງຕະໂອ້ຍ ແຂວງສາລະວັນ ເຊີ່ງເປັນໜຶ່ງໃນຄອບຄົວຕົວແບບການສ້າງເສດຖະກິດຄອບຄົວດ້ວຍການຕໍ່າຫູກໂດຍສະເພາະຕໍ່າແຜນແພ ຜ້າກ່ານ ທີ່ເປັນເອກະລັກຂອງເມືອງ ຕະໂອ້ຍ ຂາຍສາມາດມີລາຍຮັບເຂົ້າຄອບຄົວປີໜື່ງຫລາຍສີບລ້ານກີບ.
ນາງ ແພງສີ ສີສະເກດ ໃຫ້ຮູ້ວ່າ: ຈຸດເລີ່ມຕົ້ນເຮັດອາຊີບເສີມນ້ີ ຍ້ອນມີໃຈມັກ-ຮັກ ແລະ ມີພອນສະຫວັນດ້ານການຕໍ່າຫູກ, ມີພອນສະຫວັນດ້ານການເກັບລາຍ ພ້ອມທັງຊອກຮູ້ສະແຫວງຫານໍາພໍ່ແມ່, ປູ່ຍ່າຕາຍາຍຂອງຕົນເອງທີ່ເພີ່ນນຳພາຕໍ່າຫູກໃນເມື່ອກ່ອນ ພໍໃຫຍ່ມາກໍໄດ້ເຮັດເປັນອາຊີບເສີມແຕ່ປີ 2000 ເປັນຕົ້ນມາດ້ວຍຕົ້ນທຶນພຽງ 1.500.000 ກີບ ເພື່ອຊື້ອຸປະກອນຕ່າງໆເພື່ອປະກອບເຂົ້າໃນການຕຳຫູກ ເຊິ່ງໄລຍະນັ້ນສາມາດຜະລິດໄດ້ 120 ຜືນຕໍ່ປີ ແລະ ຂາຍໃນລາຄາ 60.000 ກີບຕໍ່ຜືນ ແລະ ຄອບຄົວມີລາຍຮັບ 7.200.000 ກີບຕໍ່ປີ. ມາຮອດປີ 2018 ທາງອົງການຈັດຕັ້ງພັດ-ລັດ ກໍ່ຄືຫ້ອງການສະຫະພັນແມ່ຍິງ ເມືອງຕະໂອ້ຍ ກໍ່ໄດ້ສະໜອງທຶນຈໍານວນ 5.000.000 ກວ່າກີບ ບວກກັບທຶນຕົນເອງທີ່ໄດ້ສະສົມມາປີໜຶ່ງສາມາດຜະລິດສີ້ນ ກ່ານໂດ ແບບລາຍດອກທໍາມະດາ ໄດ້ 130 ຜືນຕໍ່ປີ ແລະ ຂາຍໃນລາຄາ 220.000 ກີບ ແລະ ສີ້ນກ່ານ ໂດແບບເກັບດອກລວດລາຍໄດ້ 15 ຜືນຂາຍໃນລາຄາ 350.000 ກີບ ຕໍ່ຜືນ, ລວມມູນຄ່າ 43.000.000 ກີບຕໍ່ປີ, ມາຮອດປັດຈຸບັນ ມີກີຕຳຫູກ ທັງໝົດ 3 ໜ່ວຍ ແລະ ມີແຮງງານທັງໝົດ 3 ຄົນ ສາມາດຜະລິດໄດ້ 160 ຜືນຕໍ່ປີ ແລະ ຂາຍໃນລາຄາ 350.000 ກີບຕໍ່ຜືນ ແລະ ມີລາຍຮັບເຂົ້າສູ່ຄອບຄົວ 56.000.000 ລ້ານກີບຕໍ່ປີ.
ນາງ ແພງສີ ຍັງໄດ້ໃຫ້ຮູ້ຕື່ມວ່າ: ທັງໝົດນີ້ຍ້ອນມີແນວທາງນະໂຍບາຍອັນຖືກຕ້ອງຂອງພັກ-ລັດຖະບານເຮົາ ໂດຍສະເພາະແມ່ນການນຳຂັ້ນແຂວງ-ຂັ້ນເມືອງທີ່ໄດ້ຊຸກຍູ້ສ່ົງເສີມ ຈ່ຶງປະສົບຜົນສຳເລັດດັ່ງທຸກວັນນີ້. ພ້ອມທັງເປັນການສົ່ງເສີມແມ່ຍິງບັນດາເຜົ່າໃຫ້ມີວຽກເຮັດງານທຳໃຫ້ຫັນມາເຮັດອາຊີບດັ່ງກ່າວ ເພື່ອສ້າງລາຍຮັບເຂົ້າຄອບຄົວ. ສຳລັບທິດທາງແຜນການຕໍ່ໜ້າ ຈະໃຊ້ຄວາມພະຍາມຊອກຮູ້ຮໍ່າຮຽນ ແລະ ພັດທະນາຕົນເອງເຮັດໃຫ້ມີຄວາມຊໍານິຊໍານານດີຂຶ້ນເລື້ອຍໆ, ຖືເອົາການຖອດຖອນບົດຮຽນຈາກປະສົບການຕົວຈິງ ຖືເອົາການຕໍ່ານິຕິຊົມຂອງລູກຄ້າມາເປັນແຮງພັກດັນໃນການພັດທະນາສີມືຂອງຕົນເອງ ເຮັດໃຫ້ສັງຄົມຍອມຮັບ ແລະ ໃຊ້ບໍລິການເພີ່ມຂຶ້ນ.
ໂດຍ: ມາລີດາ
KPL
