ສັນຍາການຄ້າເສລີຕະຫລາດຮ່ວມກຸ່ມ ການຄ້າຂອງອາເມລິກາໃຕ້-ສະຫະພາບ ເອີຣົບ ຈະປະຕິບັດໃນຕົ້ນເດືອນໜ້າ
ຂປລ.ວິທະຍຸ-ໂທລະພາບ ສູນກາງຈີນ,ວັນທີ 28 ເມສານີ້, ທ່ານ ລູອິສ ອີນາຊີໂອ ລູລາ ດາ ຊິນວາ ປະທານາທິບໍດີ ບຣາຊິນ ໄດ້ລົງນາມ ໃນລັດຖະດຳລັດ ທີ່ທຳນຽບ ປະທານາທິບໍດີ ໂດຍອະນຸມັດ ໃຫ້ປະຕິບັດສັນຍາການຄ້າເສລີຕະຫລາດຮ່ວມກຸ່ມການຄ້າຂອງອາເມລິກາໃຕ້-ສະຫະພາບເອີຣົບ ຢູ່ບຣາຊິນ ນັບແຕ່ວັນທີ 1 ພຶດສະພາ 2026 ເປັນຕົ້ນໄປ.ໃນພິທີລົງນາມດັ່ງກ່າວ, ທ່ານ ລູລາ ຢືນຢັນວ່າ: ສັນຍາສະບັບນີ້ ໄດ້ເພີ່ມທະວີແນວຄວາມຄິດ ລັດທິຫລາຍຝ່າຍ, ເປັນການຕອບໂຕ້ ຕໍ່ມາດຕະການແບບລັດທິ ຝ່າຍດຽວຂອງ ອາເມລິກາເຊັ່ນ: ເພີ່ມພາສີ ຕໍ່ຫລາຍປະເທດ ເປັນຕົ້ນ.ຜ່ານການເຈລະຈາມາ ເປັນເວລາຫລາຍກວ່າ 25 ປີ, ສັນຍາການຄ້າເສລີຕະຫລາດຮ່ວມກຸ່ມ ການຄ້າຂອງອາເມລິກາໃຕ້-ສະຫະພາບເອີຣົບ ໄດ້ຮັບການລົງນາມ ຢ່າງເປັນທາງການ ໃນວັນທີ 17 ມັງກອນ 2026 ຢູ່ນະຄອນຫລວງ ອາຊູງຊັນປະເທດ ປາຣາກວາຍ. ພາຍຫລັງ ສັນຍາດັ່ງກ່າວ ມີຜົນບັງຄັບໃຊ້ແລ້ວ ຈະປົກຄຸມຕະຫລາດ ທີ່ມີປະຊາກອນຫລາຍກວ່າ 700 ລ້ານຄົນ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ