ຂປລ. ພິທີປະກາດມອບ-ຮັບ ໜ້າທີ່ ເລຂາຄະນະບໍລິຫານງານພັກ ແຂວງບໍ່ແກ້ວ ລະຫວ່າງ ສະຫາຍ ທອງຈັນ ມະນີໄຊ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ແຂວງບໍ່ແກ້ວ(ຜູ້ເກົ່າ) ແລະ ສະຫາຍ ພົນຈັດຕະວາ ແປ້ນຄໍາ ບຸດຈັດແພງ ຮັກສາການແທນ ເລຂາຄະນະບໍລິຫານງານພັກແຂວງ, ຮັກສາການແທນເຈົ້າແຂວງບໍ່ແກ້ວ(ຜູ້ໃໝ່) ຈັດຂຶ້ນໃນວັນທີ 1 ສິງຫາ 2025 ຢູ່ຫ້ອງວ່າການປົກຄອງແຂວງບໍ່ແກ້ວ ໂດຍການເປັນປະທານຂອງ ສະຫາຍ ພົນເອກ ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນ ຕີ, ລັດຖະມົນຕີ ກະຊວງປ້ອງກັນຄວາມສະຫງົບ, ມີຮອງເລຂາພັກແຂວງ, ຄະນະປະຈໍາພັກແຂວງ, ກຳມະການພັກແຂວງ, ພ້ອມດ້ວຍພາກສ່ວນທີ່ກ່ຽວຂ້ອງຂັ້ນສູນກາງ ແລະ ທ້ອງຖິ່ນ ເຂົ້າຮ່ວມ.

ສະຫາຍ ນາງ ວິໄລ ພິລາວົງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຜ່ານມະຕິຕົກລົງ ຂອງກົມການເມືອງສູນກາງພັກ ວ່າດ້ວຍການອະນຸມັດ ໃຫ້ພະນັກງານການນໍາຂັ້ນສູງ ພັກການຮັບບໍານານ ​ໂດຍ​ໄດ້ຕົກລົງອະນຸມັດໃຫ້ ສະຫາຍ ທອງຈັນ ມະນີໄຊ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງບໍ່ແກ້ວ ພັກການຮັບອຸດ​ໜູນບໍານານ ແລະ ຜ່ານມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງຮັກສາການແທນ ເລຂາຄະນະບໍລິ ຫານງານພັກແຂວງບໍ່ແກ້ວ ​ໂດຍໄດ້ຕົກລົງແຕ່ງຕັ້ງ ສະຫາຍ ພົນຈັດຕະວາ ແປ້ນຄໍາ ບຸດຈັດແພງ ເປັນຮັກສາການແທນ ເລຂາຄະນະບໍລິຫານງານພັກແຂວງ, ຮັກສາການແທນເຈົ້າແຂວງບໍ່ແກ້ວ (ຜູ້ໃໝ່) ແລະ ແຕ່ງຕັ້ງ ສະຫາຍ ພົນຈັດຕະວາ ສຸກພະຈັນ ສີລາເພັດ ເປັນກຳມະ ການຄະນະພັກ, ກຳມະການຄະນະປະຈໍາພັກແຂວງ, ທັງເປັນຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງ ແຂວງບໍ່ແກ້ວ (ຜູ້ໃໝ່).

ໂອກາດດຽວກັນ, ສະຫາຍ ທອງຈັນ ມະນີໄຊ ໄດ້ຜ່ານບົດສະຫລຸບການນໍາພາ-ຊີ້ນໍາ ວຽກງານຮອບດ້ານພາຍໃນ ແຂວງບໍ່ແກ້ວຜ່ານມາ, ດ້ານວຽກການເມືອງ-ແນວຄິດ, ວຽກປກຊ-ປກສ, ຂົງເຂດວຽກງານ ເສດຖະກິດ, ວຽກງານວັດທະນະທໍາ-ສົງຄົມ, ວຽກງານກໍ່ສ້າງຮາກຖານການເມືອງ, ວຽກງານແນວລາວສ້າງຊາດ ແລະ 3 ອົງການຈັດຕັ້ງມະຫາຊົນ ໂດຍລວມແມ່ນໄດ້ຮັບການຈັດຕັ້ງປະຕິບັດ ແລະ ມີຜົນສໍາເລັດ, ພ້ອມທັງຜ່ານແຜນວຽກ ເພື່ອໃຫ້ຮັກສາການເຈົ້າແຂວງ ແຂວງບໍ່ແກ້ວ ສືບຕໍ່ນໍາພາ-ຊີ້ນໍາຈັດຕັ້ງປະຕິບັດ ວຽກງານຈຸດສຸມແຕ່ລະດ້ານໃນຕໍ່ໜ້າ. ຫລັງຈາກນັ້ນ, ກໍໄດ້ລົງນາມບົດທຶກມອບ-ຮັບ ໜ້າທີ່ ລະຫວ່າງ ເລຂາຄະນະບໍລິຫານງານພັກແຂວງ, ເຈົ້າແຂວງ ແຂວງບໍ່ແກ້ວ (ຜູ້ເກົ່າ) ແລະ ຮັກສາການແທນເລຂາຄະນະບໍລິຫານງານພັກແຂວງ, ຮັກສາການແທນເຈົ້າແຂວງບໍ່ແກ້ວ (ຜູ້ໃໝ່) ຢ່າງເປັນ ທາງການ.

ໂອກາດນີ້, ສະຫາຍ ພົນເອກ ວິໄລ ຫລ້າຄໍາຟອງ ໄດ້ສະແດງຄວາມຊົມເຊີຍ ຕໍ່ຜົນສໍາເລັດໃນການນໍາພາ-ຊີ້ນໍາ ວຽກງານຮອບດ້ານ ຂອງຄະນະບໍລິຫານງານພັກແຂວງ ແລະ ການນໍາຂອງແຂວງທຸກຂັ້ນ ສ້າງໄດ້ໃນໄລຍະຜ່ານມາ ພ້ອມທັງ, ມີຄໍາເຫັນໃຫ້ທິດຊີ້ນໍາຫລາຍບັນຫາ ​ເປັນ​ຕົ້ນ ການປັບປຸງບຸກຄະລາກອນຢູ່ໃນອົງຄະນະພັກ ຄັ້ງນີ້, ເພື່ອຍົກສູງຄຸນນະພາບໃນການນຳພາ-ຊີ້ນໍາ ໃຫ້ສູງຂຶ້ນກວ່າເກົ່າ ແລະ ຮຽກຮ້ອງມາຍັງບັນດາສະຫາຍ ຕ້ອງໄດ້ປະຕິບັດ ແລະ ເຄົາລົບ ຕໍ່ການຈັດຕັ້ງປະຕິບັດຂອງຂັ້ນເທິງຢ່າງເຂັ້ມງວດ ເປັນຕົ້ນແມ່ນສືບຕໍ່ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດ ຕໍ່ພະນັກງານ ສະມາຊິກພັກ ແລະ ປະຊາຊົນລາວບັນດາເຜົ່າ ໃຫ້ມີທັດສະນະການເມືອງທີ່ໜັກແໜ້ນ, ມີຄວາມສາມັກຄີ ເປັນປຶກແຜນແໜ້ນໜາ, ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ ແລະ ເຊື່ອໝັ້ນຕໍ່ການນຳພາ ຂອງພັກ-ລັດ, ມີຄວາມອຸ່ນອຽນທຸ່ນທ່ຽງ, ມີຄວາມຮັບຜິດຊອບ, ບຸກບືນສູ້ຊົນປະຕິບັດໜ້າທີ່ ວຽກງານທີ່ໄດ້ຮັບມອບໝາຍໃຫ້ ມີຜົນສໍາເລັດເປັນຢ່າງດີ.

ຂ່າວ: ວໍລະສິດ ພິດສະຫາຍ

KPL