ສຳເລັດການແຂ່ງຂັນ ເພງຮ້ອງ, ກອນ ຂັບ-ລໍາ ແລະ ລະຄອນສັ້ນ ທົ່ວປະເທດ ຄັ້ງທີ 1

ຂປລ. ຄະນະກໍາມະການແກ້ໄຂ ບັນຫາຢາເສບຕິດລະດັບຊາດ ສໍາເລັດການແຂ່ງຂັນເພງຮ້ອງ, ກອນຂັບ-ລໍາ ແລະ ລະຄອນສັ້ນ ທົ່ວປະເທດ ຄັ້ງທີ 1 ໃນວັນທີ 2 ສິງຫາ 2025 ຢູ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ ພາຍຫລັງເລີ່ມດຳເນີນການແຂ່ງຂັນ ມາແຕ່ກາງເດືອນພຶດສະພາ ຜ່ານມາ, ເປັນກຽດເຂົ້າຮ່ວມຂອງ ທ່ານ ພົນໂທ ຄໍາກິ່ງ ຜຸຍຫລ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ຮອງປະທານຄະນະກໍາມະການ ແກ້ໄຂບັນຫາຢາເສບຕິດລະດັບຊາດ, ມີບັນດານັກປະພັນ, ສິລະປິນ, ນັກຮ້ອງ, ໝໍລໍາ, ພ້ອມດ້ວຍມວນຊົນໃນນະຄອນຫລວງວຽງຈັນ ເຂົ້າຮ່ວມ.
ການຈັດການແຂ່ງຂັນ ໃນຄັ້ງນີ້, ເປັນການສ້າງຂະບວນການຂໍ່ານັບຮັບຕ້ອນ 3 ວັນປະຫວັດສາດ, ທັງເປັນການສ້າງຂະບວນການ ຕ້ອນຮັບກອງປະຊຸມໃຫຍ່ ຄັ້ງທີ 6 ຂອງອົງຄະນະພັກ ກະຊວງປ້ອງກັນ ຄວາມສະຫງົບ ທີ່ຈະເປີດຂຶ້ນໃນມໍ່ໆນີ້ ແລະ ສຸມໃສ່ຈັດຕັ້ງຜັນຂະຫຍາຍ 6 ວຽກງານຈຸດສຸມ ໃນວາລະແຫ່ງຊາດ ວ່າດ້ວຍການແກ້ໄຂ ບັນຫາຢາເສບຕິດ ປີ 2024-2025 ໃຫ້ເປັນວຽກງານ ທົ່ວປວງຊົນ.
ຜ່ານການແຂ່ງຂັນ, ປະເພດເພງຮ້ອງ ອັນດັບທີ 1 ແມ່ນຜົນງານເພງ “ສິ່ງເສບຕິດຢ່າຄິດຢາກລອງ” ຂອງນັກປະພັນ ຄໍາແຜ່ວ ຫອມຣັດສະໝີ ເຊິ່ງຮ້ອງໂດຍ ທ້າວ ຄໍາຕາ ລໍທິເດດ ໄດ້ຮັບເງິນລາງວັນ 20 ລ້ານກີບ, ອັນດັບທີ 2 ມີ 2 ລາງວັນ ຄື: ຜົນງານເພງ “ເດັດດ່ຽວປາບປາມຢາເສບຕິດ”ຂອງນັກປະພັນ ຄໍາສະແຫວງ ວາດສະໜາສົ່ງ, ຮ້ອງໂດຍ ທ້າວ ວຽງທອງ ລົດຫາລາດ ແລະ ຜົນງານເພງ “ຮ່ວມໃຈ ຕ້ານໄພຢາເສບຕິດ” ຂອງນັກປະພັນ ສຸກສາຄອນ ພົມມະວິຫານ, ຮອງໝູ່ຍິງ-ຊາຍ ໄດ້ຮັບລາງວັນເງິນສົດ ລາງວັນລະ 18 ລ້ານກີບ ແລະ ອັນດັບທີ 3 ມີທັງໝົດ 9 ລາງວັນ ໄດ້ຮັບເງິນສົດ ລາງວັນລະ 15 ລ້ານກີບ.
ສ່ວນ ປະເພດ ກອນຂັບ-ລໍາ ອັນດັບທີ 1 ແມ່ນລໍາແລ່ “ຢ່າຄິດຢາກລອງ” ຂອງນັກປະພັນ ພັນຕີ ສຸລິຍາ ຈັນທະວິໄຊ, ຂັບ-ລໍາໂດຍ ທ້າວ ບຸນນໍາ ໄຊຍະລາດ ໄດ້ຮັບລາງວັນເງິນສົດ 20 ລ້ານກີບ, ອັນດັບທີ 2 ມີ 2 ລາງວັນຄືຶ: ລໍາຜູ້ໄທ “ຈົ່ງຫ່າງໄກຢາເສບຕິດ” ຂອງນັກປະພັນ ຄໍາພຸດ ເທບພະນົມ, ຂັບ-ລໍາໂດຍ ທ້າວ ແນັກ ໂພທິມາດ ແລະ ລໍາຜູ້ໄທ “ຮ່ວມໃຈຕ້ານຢາເສບຕິດ” ຂອງນັກປະພັນ ບ່າວແມນ ອິນເຕີ, ຂັບ-ລໍາໂດຍ ນາງ ການ້ອຍ ຫລ້າພາວັນ ໄດ້ຮັບເງິນສົດ ລາງວັນລະ 18 ລ້ານກີບ ແລະ ອັນດັບທີ 3 ມີທັງໝົດ 7 ລາງວັນ ໄດ້ຮັບເງິນສົດ ລາງວັນລະ 15 ລ້ານກີບ.
ປະເພດລະຄອນສັ້ນ ອັນດັບທີ 1 ແມ່ນລະຄອນສັ້ນເລື່ອງ “ເສຍໂອກາດ” ໄດ້ຮັບເງິນລາງວັນ 30 ລ້ານກີບ, ອັນດັບທີ 2 ມີ 2 ລາງວັນ ຄື: ລະຄອນສັ້ນເລື່ອງ “ເງົາໃນເຮືອນ” ແລະ ລະຄອນສັ້ນ ເລື່ອງ “ສຸດຫົວໃຈ” ໄດ້ຮັບເງິນສົດ ລາງວັນລະ 25 ລ້ານກີບ ແລະ ລາງວັນທີ 3 ມີ 2 ລາງວັນຄື: ລະ ຄອນສັ້ນເລື່ອງ “ໂອກາດ” ແລະ ລະຄອນສັ້ນເລື່ອງ “ເສບ” ໄດ້ຮັບເງິນສົດລາງວັນລະ 20 ລ້ານກີບ.
ຜົນສຳເລັດຂອງການແຂ່ງຂັນໃນຄັ້ງນີ້, ສະແດງໃຫ້ເຫັນເຖິງຄວາມພາກພູມໃຈ ແລະ ປື້ມປິຕິຂອງບັນດາກອງຊົມ ກອງເຊຍແຕ່ລະຄົນ ສ່ອງແສງໃຫ້ເຫັນເຖິງຄວາມສໍາຄັນ ໃນການປະກອບສ່ວນ ຂອງສັງຄົມ ຕໍ່ກັບບັນຫາຢາເສບຕິດ ທີ່ເປັນພິດໄພຕໍ່ສັງຄົມ. ສໍາລັບເພງຮ້ອງ, ກອນຂັບ-ລໍາ ແລະ ລະ ຄອນສັ້ນ ທີ່ໄດ້ຮັບລາງວັນໃນຄັ້ງນີ້ ຈະຖືກນໍາມາສາຍອອກທາງສື່ໂທລະພາບ ແລະ ສື່ສັງຄົມອອນລາຍ ເພື່ອເປັນການ ເຜີຍແຜ່ໃຫ້ສັງຄົມ ຮູ້ໄດ້ເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດ.