ໄຂກອງປະຊຸມສະໄໝວິສາມັນ ເທື່ອທີ 1 ຂອງສະພາປະຊາຊົນ ນວ ຊຸດທີ II
ຂປລ. ກອງປະຊຸມສະໄໝວິສາມັນ ເທື່ອທີ 1 ຂອງສະພາປະຊາຊົນ ນະຄອນຫລວງວຽງຈັນ (ນວ) ຊຸດທີ II ໄຂຂຶ້ນຢ່າງເປັນທາງການ ໃນວັນທີ 22 ພຶດສະພາ 2025 ພາຍໃຕ້ການເປັນປະທານຂອງ ທ່ານ ນາງ ລໍາພອຍ ສີອັກຄະຈັນ ຄະນະປະຈໍາພັກ, ຮອງປະທານສະພາປະຊາຊົນ ນະຄອນຫລວງວຽງຈັນ, ທ່ານ ບຸນທາມ ພຸດທະວົງສາ ຮອງປະທານສະພາປະຊາຊົນນະຄອນຫລວງວຽງຈັນ ໂດຍມີ ທ່ານ ຊົງເລົ່າ ຢົງນູ ຮອງເລຂາຄະນະພັກ ນະຄອນຫລວງວຽງຈັນ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ນວ ແລະ ສະມາຊິກສະພາປະຊາຊົນ ນວ ເຂົ້າຮ່ວມ.
ທ່ານ ນາງ ລໍາພອຍ ສີອັກຄະຈັນ ໄດ້ກ່າວວ່າ: ກອງປະຊຸມໃນຄັ້ງນີ້, ເປັນການປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນ ນະຄອນຫລວງວຽງຈັນ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍວ່າດ້ວຍ ສະພາປະຊາຊົນຂັ້ນແຂວງ ເຊິ່ງກອງປະຊຸມຄັ້ງນີ້, ຈະໄດ້ຄົ້ນ ຄວ້າພິຈາລະນາ ແລະ ຮັບຮອງເອົາການສ້າງຕັ້ງຕາແສງ (ທົດລອງ) ຢູ່ເມືອງໄຊທານີ ເຊິ່ງເປັນວາລະທີ່ສໍາຄັນ, ຈໍາເປັນ ແລະ ຮີບດ່ວນຂອງນະຄອນຫລວງວຽງຈັນ, ທັງຈະເປັນຕົວແບບໃນການພິຈາລະນາ ແລະ ຮັບຮອງເອົາການສ້າງຕັ້ງຕາແສງ ຢູ່ຂອບເຂດທົ່ວປະເທດ.
ໃນໂອກາດນີ້, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ ໄດ້ລາຍງານກ່ຽວກັບ ການຂໍສ້າງຕັ້ງຕາແສງທຳອິດ ຢູ່ເມືອງໄຊທານີ ນະຄອນຫລວງວຽງຈັນ ໂດຍໄດ້ຍົກໃຫ້ເຫັນສະພາບຜ່ານມາ ແລະ ບ່ອນອີງໃນການຄົ້ນຄວ້າສ້າງຕັ້ງຕາແສງ; ເຫດຜົນ ແລະ ຄວາມຈຳເປັນໃນການສ້າງຕັ້ງຕາແສງ; ສະພາບຈຸດພິເສດ, ເຂດແດນ, ທ່າແຮງຕົ້ນຕໍ ແລະ ທີ່ຕັ້ງສຳນັກງານຂອງຕາແສງ; ທີ່ຕັ້ງ, ພາ ລະບົດບາດ, ສິດ ແລະ ໜ້າທີ່ ຂອງຄະນະກຳມະການປົກຄອງຕາແສງ ເຊິ່ງຄະນະກຳມະການປົກຄອງຕາແສງ ແມ່ນອົງການບໍລິຫານຂັ້ນລຸ່ມສຸດ ຂອງອົງການປົກຄອງທ້ອງຖິ່ນ, ມີພາລະບົດບາດຄຸ້ມຄອງບໍລິ ຫານລັດ ທາງດ້ານການເມືອງ, ການປົກຄອງ, ເສດຖະກິດ, ວັດທະນະທຳ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ປົກປັກຮັກສາ ແລະ ນຳໃຊ້ຊັບພະຍາກອນທໍາມະຊາດ, ສິ່ງແວດລ້ອມ ແລະຊັບພະຍາກອນອື່ນໆ ໃນທ້ອງຖິ່ນຂອງຕົນ ຕາມການແບ່ງຂັ້ນຄຸ້ມຄອງ; ຊີ້ນຳ, ກວດກາການຈັດຕັ້ງປະ ຕິບັດແຜນພັດທະນາບ້ານ ໃນຂອບເຂດການຄຸ້ມຄອງຂອງຕົນ.
ຈາກນີ້, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ນະຄອນຫລວງວຽງຈັນ, ສະມາ ຊິກສະພາປະຊາຊົນ ນວ ກໍໄດ້ພ້ອມກັນສຸມທຸກສະຕິປັນຍາ, ຄົ້ນຄວ້າ, ພິຈາລະນາ ແລະ ປະກອບຄໍາເຫັນຢ່າງມີປະຊາທິປະໄຕ, ເລິກເຊິ່ງ, ມີຈຸດສຸມ, ເຈາະຈົງ, ພາວະວິໄສ, ມີເຫດຜົນຕົວຈິງ ແລະ ຮັບປະ ກັນຄວາມສອດຄ່ອງກັບນະໂຍບາຍຂອງພັກ, ຖືກຕ້ອງຕາມລັດຖະທໍາມະນູນ, ກົດໝາຍ, ສະພາບຈຸດພິເສດຕົວຈິງຂອງ ນວ ໃນປັດຈຸບັນ. ທັງນີ້, ກໍເພື່ອແນ່ໃສ່ຮັບປະກັນໃຫ້ ການສ້າງຕັ້ງຕາແສງໃນຄັ້ງນີ້, ສາມາດນໍາໄປຈັດຕັ້ງປະຕິບັດ ໄດ້ຢ່າງເປັນຮູບປະທໍາທີ່ແທ້ຈິງ ແລະ ເກີດດອກອອກຜົນ.
ຂ່າວ: ກິດຕາ